Казакстандын «АрселорМиттал Темиртау» ишканасынын 8 шахтасында жер алдынан чыкпай, иш таштаган жумушчулардын саны 684 кишиге жетти. Бул тууралуу өлкөнүн Эмгек жана социалдык коргоо министри Тамара Дүйсенова билдирди.
Кенчилер айлыктарды эки эсе көбөйтүүнү, пенсияга 50 жаштан чыгарууну жана шаардагы социалдык инфраструктураны жакшыртууну талап кылышууда. Айтымдарында, учурда шаарда «сыра ичкен жайлар менен супермаркеттер гана» бар.
Алар ошондой эле шахтага ээлик кылган индиялык миллиардер Лакшми Миттал менен жолугушууну талап кылышууда. “Түшүнөбүз, анын колу бошобойт, бирок азыр XXI кылым го. Скайп, онлайн телеберүү деген бар. Биздин өкүл ага суроолорду берип, Миттал жооп берип койсо болду”, – деп билдиришти алар.
Кенчилер компания өкүлдөрү менен сүйлөшүү үчүн ар бир шахтадан бирден өкүл жөнөтүштү. Министр бул маалыматты ырастап, учурда кенчилердин 32 өкүлү жумуш берүүчүлөр менен сүйлөшүп жатканын айтты.
Иш таштаган жумушчулардын сырттагы кесиптештери дагы алар менен сүйлөшүп чыгышкан. Айтымдарында, шахтадагы жумушчулар талаптары аткарылмайынча сыртка чыкпай тургандыктарын билдиришкен.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ