Республика аймагында жарандар тарабынан мыйзамсыз сакталган ок атуучу куралдарды, окторду аныктоо боюнча атайын иш-чаралар жүрүп жатат. Бул туурасында ИИМдин Басма сөз кызматы билдирет.
Ушунун негизинде Кара-Суу районунда милиция кызматкерлери 14-декабрь күнү соттун чечими менен Тээке айылынын 1963-жылы туулган Б.О. аттуу жашоочусунун үйүн текшеришкен. Натыйжада шектүүнүн үйүнөн 1951-жылы чыккан “ТОЗ-8” үлгүсүндөгү 5,6-калибрдеги сайлуу ок атуучу курал табылган.
Ошондой эле, Ат-Башы РИИБнин кызматкерлери тарабынан көрүлгөн чаралардын негизинде Ат-Башы айылынын 1997-жылы туулган Р.Т. аттуу жашоочусу жанына “ИЖ-18” үлгүсүндөгү 20-калибрдеги сайсыз ок атуучу куралын Бирлик айылында алып жүргөн жеринен кармалган.
14-декабрь күнү Свердлов РИИБнин кызматкерлери соттун чечими менен Чүй облусунун Люксембург айылынын 1987-жылы туулган А.Б. аттуу тургундун үйүн текшерүүгө алган учурунда “ПМ” үлгүсүндөгү тапанчанын 1 даана кутучасы жана 8 даана огу табылып алынган.
Манас районунун аймагынан милиция кызматкерлери Чоң-Кара-Буура айылынын 1972-жылы туулган А.С. аттуу жашоочусун текшерүү учурунда “ТОЗ-8” үлгүсүндөгү ок атуучу куралы 9 даана огу менен табылган. Жети-Өгүз райондук милиция кызматкерлери тарабынан жүргүзүлгөн иликтөө иштеринин негизинде жергиликтүү тургундардан “Байкал” үлгүсүндөгү 7,62-калибрдеги, “ОПС КС” үлгүсүндөгү 7,362-калибрдеги, “ТОЗ-8” үлгүсүндөгү, жасалма “ИЖ-17” үлгүсүндөгү ок атуучу куралдар жана 11 даана 7,62-калибрдеги, 1 даана 5,45-калибрдеги октор табылган.
Ал эми, 15-декабрь күнү Ноокен райондук милиция кызматкерлерине жергиликтүү тургундар “ИЖ-18” үлгүсүндөгү 20-калибрдеги сайлуу ок атуучу куралы менен 1950-жылы чыккан “КО” үлгүсүндөгү ок атуучу куралдарын өз ыктыярлары менен тапшырышкан.
Алынган ок атуучу куралдар баллистикалык экпертизага жөнөтүлүп, иликтөө иштери жүрүп жатат.
КОММЕНТАРИЙ КАЛТЫРУУ