Өнөр жай, энергетика жана жер казынасын пайдалануу боюнча мамлекеттик комитеттеги жолугушуу учурунда Ала-Букадагы Иштамберди кенин иштеткен “Фул Голд Майнинг” компаниясынын өкүлү Чи Шуань Тань кызматкерлердин массалык жумуштан бошотулганы боюнча түшүндүрмө берди.
– “Эмгек келишимин узартуудан баш тартты” деген туура эмес. Биз сүйлөшүү жүргүздүк. Келишимдин мөөнөтү 31-декабрда соңуна чыккан. Жаңы келишимде айрым пункттар өзгөргөн, биз айрым бир пункттар боюнча орток пикир таба алган жокпуз. Бирок сүйлөшүү жүргүзүп жатабыз. Биздин компания иштегенден бери чыгымга учурап жатат. Биздин компания бул кенге 200 млн. доллар жумшады, иштегенден бери маянага 958 млн. сом төлөп бердик. Жумушчулар аябай көп чыгым келтирип атат. Ошондуктан келишимди өзгөртүүнү чечтик. Ушул катаал учурду чогуу баштан кечиргенге жардам беришин сурайбыз. Акчабыз актала элек, банкрот болбош үчүн ушундай кадамдарга барып жатабыз.
Кытай компаниясынын өкүлүнүн айтымында, ишкана кызматкерлердин стажына кошумча акы төлөөдөн баш тартып, тамак-ашка берилчү күнүмдүк акчаны азайткан. Ошондой эле ар бир жумушчуга маянадан сырткары берилчү айына 3 миң сом акча берүүнү да токтотмокчу болгон.
Ишкананын жетекчилиги ошондой эле “Кытайдан келген жумушчуларды дагы 30% азаткан жатабыз” деди.
Ал эми жолугушуу учурунда Тоо-кен тармагы боюнча кесиптик кошуундун башчысы Элдар Тажибаев компаниянын азыркы абалына тушүнүп, айлык акыны көбөйтпөгөнгө макул болуп, шартты жакшыртуу боюнча талаптарынан баш тартканын билдирди. Бирок ал стаж, тамак-аш үчүн кошумча акчаны кыскартуу мыйзамсыз экенин айтты.
Өнөр жай, энергетика жана жер казынасын пайдалануу боюнча мамлекеттик комитеттин башчысы Улан Рыскулов “Иштемберди кенин иштетүүгө “Фул Голд Майнинг” компаниясына 20 жылга лицензия берилгенин, ошондуктан жумушчулар менен мөөнөтсүз келишим түзүлүшү керек экенин” жолугушууда билдирди.
5-январда Ала-Бука районундагы Иштамберди алтын кенин иштеткен “Фул Голд Майнинг” компаниясы жаңы келишим менен иштөөгө макул болбогон 370 кызматкерди жумуштан бошотконун Тоо-кен тармагы боюнча кесиптик кошуун билдирип чыккан. Маалыматтарга ылайык, компанияда 600дөй кызматкер болгон. Алардын 370и жумуштан бошотулса, калган 200ү жарым-жартылай төлөнгөн эмгек өргүүсүнө чыгарылган. Алардын орточо маянасы 30 миң сомду түзөт.
“Фул Голд Майнинг” компаниясы Иштамбердиде 2011-жылдан баштап иштейт.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ