Бишкек шаардык соту 28-майда казакстандык оппозиционер, активист жана блогер Муратбек Тунгышбаевди камакта калтыруу боюнча 1-май райондук сотунун чечимин күчүндө калтырды. Казак бийлиги тарабынан издөөгө алынган активист 10-майда Кыргызстанда кармалган.
Апелляциялык соттун чечимин анын адвокаты Нурбек Токтакунов билдирди. Адвокаттын айтымында, келтирилген жүйөлөр эске алынбай, бир тараптуу бүтүм кабыл алынды.
– Сот жүйөлөрүбүздүн бирин дагы эске алган жок. Кыргызстандын Кылмыш кодексинде Казакстан Кылмыш кодексинин 266-беренесине (кылмыштуу топту каржылоо) дал келген берене жок. Кишинев конвенциясы жана башка эл аралык, улуттук укук нормаларына ылайык, мындай учурда жарандарды башка өлкөгө берүүгө болбойт. Эгер берилбесе, камаганга да болбойт. Бул сыяктуу жүйөлөрдүн бири да сотто эске алынган жок, – деди Нурбек Токтакунов.
Астана Тунгышбаевди бул өлкөдө тыюу салынган “Казакстандын демократиялык тандоосу” кыймылын колдойт деп айыптоодо. Казакстанда кылмыштуу топту каржылоого, экстремисттик уюмдун ишмердүүлүгүнө катышууга айыпталган блогер учурда Мамлекеттик улуттук коопсуздук комитетинин тергөө абагында отурат. Ал саясий куугунтукка кабылганын билдирүүдө.
21-майда Башкы прокуратура Бишкекте кармалган жана саясий башпаанек сураган активист жана блогер Муратбек Тунгышбаевди Казакстанга өткөрүп берүүгө макул болгон. Токтом казакстандык активист Бишкекте кармалгандан 11 күн өткөндөн кийин чыккан.
Булак: «Борбор Азия жаңылыктар кызматы»
КОММЕНТАРИЙ КАЛТЫРУУ