А дегенде бир нерсени элестетип көрөлүчү, ооба, мыйзамдын алкагында. Мисалы, ар бир саясий партиянын ички бекем тартиби катары саналган Уставы болот да? Анан кайсы гана саясий партия болбосун анын бир нече курамдан турган Саясий Бюросу болот эмеспи? Анан ал партиянын башында турган лидери турат. Ошентип, алар Уставда көрсөтүлгөн боюнча коомчулукта иш алып барат, ушундайда? Ал эми Кыргызстандагы чейрек кылымдык тарыхы бар КСДП партиясында эмне болуп жатат? Жогорку айтылган эрежелерди уруп да койбой, аталган партиянын Борбордук аппаратынын билдиргени боюнча партиянын катарынан чыгарылган Сагынбек Абдрахманов деген неме өзүн-өзү билип, бир жылга жакын убакыттан бери Кыргызстандын жарымын кыдырып, партиянын лидери аталган Алмазбек Атамбаевди КСДПдан бөлүп салуу аракети менен каалаган жеринде конференция өткөрүп жүрөт. КСДПнын башкы кеңсесинде отургандар болсо «Сагынбек Абдрахманов биздин партиянын мүчөсү эмес, анткени ал партиянын катарынан чыгарылган. Анын антип жер-жерлерде «КСДП Атамбаевсиз» деп жыйындарды өткөрүп жүргөнү мыйзамсыз. Абдрахманов бул оюнда кичинекей гана фигура (пешка), анын артында чоң күч турат» деген таризде билдирүүсүн бир нече ириет билдирди. Кечээ жакында болсо ошол айтылуу Абдрахманов ноябрь айынын ичинде борбордо КСДПнын республикалык жыйынын өткөрүп, ошол жыйында партиянын лидери Алмазбек Атамбаевди алып ыргытаары тууралуу массалык-маалымат каражаттарында ачык эле айтып кирди. Канчалык билмексендикке салбайлы, чыны менен эле бул оюнда Абдрахманов кичинекей гана фигура экени, аны артынан жөлөп-таяп, бара турган жолун тазалатып турган кудурети күчтүү адам ким экенин баары сопсонун туйуп эле турат. «Улуу сөздө уят жок» дейт, кыргызда, бул көрүнүштү узартпай кыскача чечмелесек накта көтөнзордук, жумшартып, орусчалап айтканда накта рейдерлик.
Кыясы, «соккусу күчтүү болсо кийиз казык жерге кирет» дегендей Абдрахмановдун колу менен жасалып жаткан бул «оюн» чыны менен эле өз эңсөөсүнө жеткени калды окшойт? Абдрахмановдун миссиясы аяктагандан кийин сценарий кандай өңүттө уланат? КСДПнын башына, биз баарыбыз туйуп жаткан кудурети күчтүү адамдын көрсөтмөсү менен дагы бир «пешка» дайындалат. Эң өкүнүчтүүсү, ошол «фигура» Атамбаевдин дагы бир 25 жылга жакын ишенип келген адамы, (досу десек да болот го?) Иса Өмүркулов КСДП партиясынын «лидери» болуп дайындалаары тар чөйрөдө айтылууда. Дегинкиси Кыргыз саясатындагы саясатчыларда бет деле калбай калды го? Барыдан да күйдүргөнү башка жалтырак-жултурактарды «мүлжүп» бүтүшүп, адам баласындагы баалуулуктардын бири болгон ДОС деген сонун түшүнүктүн да тамтыркайын чыгарышмак болду? А бирок дээрлиги ушундай саткындардан турган КСДП партиясына алдыдагы күтүлүп жаткан парламентке болгон шайлоодо аларга өз тагдырын ишенип, ким, кандай электорат добуш берет болду экен?
Нурдин Асанов
Булак: «Айгай-пресс»
КОММЕНТАРИЙ КАЛТЫРУУ