Ашхабадда жергиликтүү бийлик 2017-жылы Азия оюндары учурунда спортчулар жашаган олимпиадалык шаарчадагы батирлерди сатыкка койду.
Түркмөнстандагы “Азатлык” радиосу өз булактарына таянып билдиргендей, учурда батирлер министрликтер менен мекеме-ишканалардын кызматкерлерине сунушталууда.
Көп кабаттуу үйлөрдөгү батирлерде бардык ыңгайлуу шарттар болгону менен сатып алууну каалагандар аз. Себеби баасы кымбат.
Түркмөнстанда 2-3 миң манаттык айлык акы расмий курс боюнча 666-857 долларды түзөт. Батирлердин эң эле төмөнкү наркы 5 миллион манат же 1,5 миллион доллардын тегереги.
Ашхабаддагы олимпиадалык шаарча 2017-жылы Азия оюндарына карата бюджеттин эсебинен курулган эң ири инфраструктуралык объект болуп эсептелет. Жалпы аянты – 157 гектар. Курулуш иштерин Polimeks түрк компаниясы жүргүзгөн. Айрым маалыматтар боюнча шаарчаны салуу үчүн 5,5 миллиард доллардан ашык каражат жумшалган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ