Ош шаарынын мэри Таалайбек Сарыбашев ушу жуманын башында шаардын кышка болгон даярдыгы тууралуу өткөн Ош шаардык кеңешинин жыйынында, шаардык кеңештин депутаттары эле эмес, Жогорку Кеңештин депутаттарын да Ош шаарындагы кадр саясатына кийлигишпөөгө чакырды. Андагы жыйында мэр Сарыбашев «Жогорку Кеңештин депутаттарына айтып койгула, кадр саясатына кирише бербесин» деди. Охо! А балким аныкы деле туурадыр. Бирок, айталы дегенибиз андан да башка.
Кезинде Мелис Мырзакматов дагы өзүн Оштун түбөлүк ханы катары сезип, ордолуу Ош шаарынын борбордук аянтында өтүп жаткан кайсы бир жыйынында ал жерге Мырзакматов келатканда айдакдоочулары «арстан келатат, шер келатат!» деп ураан чакырып, добулбас кагылып турганы көпчүлүктүн эсинен чыга элек болсо керек. Чынында эле ошондо Мелис Мырзакматовдун шаарды хандык «колоритте» башкарып турган кезинде ошол учурдагы Өкмөттүн Ош облусу боюнча ыйгарым укуктуу өкүлү Сооронбай Жээнбеков анын караанында эле калгандай туюм жаратып калганын байкап, көрүп да калбадыкпы. Анын сыңарындай өткөндөгү мамлекеттин эгемендик күнүндө шаар мэри Сарыбашев хандын өргөөсүндөй болон атайы жасалган орундукта майрамдык шаан-шөкөттү маашырланыуу менен көрүп жатканын элдин баары эле көрсө керек. Ага караганда ошол эгемендик күнү Бишкекте мамлекеттик масштабдагы чоң-чоң ишмерлер баштарына күн өтүп, Сарыбашев отургандай хан орундукта эмес, кадимкидей эле жупуну отургучтарда олтурса, айрымдары туруп эле турушкан. Дегенибиз, орто кылымдагыдай мындай «бай-манаптык көз караштагы» жетекчилерди Өкмөт акеби же Президент аке болобу мамлекеттик кызматкердин этикасын эсине салып, этектен тартып койбосо болбойт го?
Нурдин Асанов
Ал эми мобу сүрөттө болсо– Сарыбашев өзүнчө эле бай-манап, анын артында даражасы жана бийлик статусу жагынан жогору ал кездеги КРнын вице-премьер министри Гүлмира Кудайбергенова турат. Антип кызматтык даражаны салыштырбаган күндө да манап мүнөз эмес, кыргыз мүнөз мырзаларыбыз, ар убак аялзатына ызаат көрсөтүп келген. А тигини кара, аял кишини тургузуп коюп тигинтип кол чатырга коргонуп олтурганын, какырдыкы!
Булак: «Айгай-пресс»
КОММЕНТАРИЙ КАЛТЫРУУ