Menu

Япон-Кыргыз биримдигине кошуласызбы?! – Караш Насерден бийликке жана коомчулукка кайрылуу

Бөлүшүү:

Кайрылуу

Урматтуу Президент Сооронбай мырза! 

Жогорку Кеңештин депутаттары!

Өкмөт башчылары!

Мекендештер!

Жүрөгүмдү өйүп-эзип келе жаткан бир орчундуу маселе ойумдан кетпей койду. Ушул ойумду сиздер менен кеңешип көрүүнү туура таптым.

Себеби: бизди ороп турган коңшу мамлекеттер, суубузга, жайлообузга, жер байлыктарыбызга жана жаратылышыбыздын сулуулугуна көздөрүн кызартып, кызыгып келе жатышкандыктарын күндөп-айлап, жылдап эле көрүп-билип келе жатабыз. Кээ бир чет элдик кара ойлуу саясатчылар, Кыргызстан келечекте жок болуп, кыргыз эли башка улуттарга сиңип кетет деп жооруп да жүрүшпөйбү, “ооздоруна таш тыгылып, тилдери тешилгилер десе…”

Жайлообузду кошпогондо да, кен-байлыктарыбызды талап жатышкандыктары жалганбы? Же суубузга, башка өлкөө үчүн бант болуп жаткан жерлерибизге акы төлөшсөчү?.. Тим эле “жетим балабыз”. Бизди өссүн-өнсүн дешпейт.

Өзүбүздүн күчкө толгон жаш жигиттерибиз менен бойго жеткен кыздарыбыз кор болуп, чет мамлекеттерде кул болуп жүрүшсө, а чет элдик жарандар биздин Кыргызстанда иштеп, байып жатышкандыктан, бизде күмөндүү ойлор жаралууда.

Кээ бир мамлекеттер жерибизге кыйладан бери өз уруктарын сээп келатышат… Ал үрөндөр келечекте өнүп-өсүп, жетилип, көбөйүп кетсе, эмне болоорубузду элестетип көрүү өтө эле опурталдуу. “жылан баласын баксаң, өзүңдү чагат” болбойбузбу?

Ушул кооптуу байкоолорго байланыштуу: Мекендештер! Сиздер туура көрсөңүздөр, эсен-сообузда ичинде кири жок, кыйналгандарга жардамын аябаган, жасаган жардам-жакшылыктарын милдет кылбаган бир туугандарыбыз Япон эли макул болуп, биздин сунушубузду кабыл алса, жүз жылга келишим тузуп, мамлекеттерибизди бириктирип, кен- байлыктарыбызды биргелешип иштетип, тапкан пайдабызды ортодон тең бөлүп иштетсек, кандай болоор эле?

“Ат айланып казыгын табат” дейт, Япондор менен Кыргыздар бир ата, бир энеден тараганбыз, түбүбүз бир. Ошондуктан, түбүбүздү таап, бирибизге-бирибиз жөлөк болуубуз керек. Жүз жылдан кийин кайра бөлүнүп, өз-өзүбүзчө оокатыбызды кылууга макулдашып, кол койсок.

Асел аарыдай өжөр, чыдамкай, таза эмгектенген Япон эли маданыят менен экономиканы заматта өнүктүргөнүн кошпогондо да, эки жылдын ичинде эле Кыргызстандын кыштактарынан бери жалтыраган асфальт жолдор пайда болуп, чет жерде бозуп жүргөн кыргыздар мекенибизге келип, жумуш менен камсыз болушаар эле.

Өмүр бою ылай кечип, чалынып-мүдүрүлүп жүргөндөн көрө, жалтыраган жолдордо рахат алып басып жүрүү өмүргө да берекесин берээр элего.

Андан тышкары, Япон “акалар, укалар, браттар” менен биригип, завод-фабрикаларды куруп, жеңил өнөржайларды иштетип, дүңгүрөтүп өнүп-өсүп, дүйнөдөгү эң алдыңкы мамлекеттердин катарына кошулсак жаманбы?!

Кара ниэттердин ооздоруна таш капталып, кийинки урпактарга, небере-чеберелерге жаңы доор түптөп кетээр элек.

Биргелешүү жөрөлгөсү дүйнөлүк практикада дагы бар. Бир мисал -Ангилия менен Гонконгдун мамлеси. Англия мамлекети 1898-жылы түзүлгөн жүз жылдык мөөнөттөгү келишимдин негизинде Гонконг менен биргелешип иштеди. Анын натыйжасында Гонконг укмуштуудай өнүгүп-өсүп, дүйнөдөгү алдыңкы экономикага ээ болду. Ал эми 1997- жылы, келишим мөөнөтү бүткөн соң жапжакшынакай эле өз-өзүнчө бөлүнүп кетишти.

15 улуттук республиканын башын бириктирген СССРдин тагдырыда буга мисал кылса болот. СССРдин 70 жылдан ашыгыраак жашаган коомунда мурда жок эсептуүү, артта калган элдер- майда республикалар социалдык- экономикалык, маданий өнүгүштүн белгилүү бийиктигине чыга алды. Ошентип, СССР өз милдеттин өтөп болгондон кийин, 1991-жылы АЛЛА ТААЛАнын амири менен бир эле күндүн ичинде тыптынч тарап кетти да, ар улуттук өз-өзүнчө жашап калышты.

Европа Биримдигин түзгөн Европа өлкөөлөрүнүн учурдагы өрнөгү да ушуга үндөш. Европанын өнүккөн мамлекеттери азыр чегараларын ачып, бирдиктүү валютага өтүп, социалдык-экономикалык маселелерин биргелешип чечип, Биримдиктин кучагында мамыр-жумур, ынтымакта жашап жатышпайбы.

Демек, Япон мамлекети менен жакындашуудан кооптонбо керек. Келечектин күмүш дооруна кадам шилтөөнү каалаган мекендештер! Сиздер да ой- пикирлериңиздерди билдирип, жооп жазууңуздарды суранабыз. Япондор да макул дейби же жокпу, ал да чоң суроо.

Коңшуларыбыз, Кытай, Казакстан, Өзбекстан, Тажикстан жана казандаш Россиялар менен да кыяматтык достукта жашоого милдеттүүбүз!

Бүткүл дүйнө жүзүндө тынчтык орносун!

Эгерде менден катачылык кетсе, баардыгыңыздардан кечирим сурайбыз.

Караш Насер, коомдук ишмер

Бишкек шаары. 24.01.2019- жыл.

Эгер бул тексттен ката таап калсаңыз, ошол ката сөздү белгилеп, Ctrl+Enter кнопкаларын чоогу басуу менен билдирип коюңуз.

КОММЕНТАРИЙ КАЛТЫРУУ

Төмөндө көрсөтүлгөн уячаларга керектүү маалыматтарды туура киргизгениңизди текшериңиз.HTML-код киргизүүгө уруксат жок.

Captcha − 3 = 3

ОКШОШ МАКАЛАЛАР

Меню

Орфографиялык ката тууралуу Отчет

Редакцияга төмөнкү текст жөнөтүлөт: