Чиназ райондук ооруканасынын ак халат кийген ондогон кызматкери колдоруна кетмен кармап, отоо жулуп, таштанды терип, медициналык мекеменин айланасын тазалап жүрүшкөн учуру тартылган видео тарады. Тасмада дагы үч ак халатчан аялдын эс алып отурганын көрүүгө болот.
“Азаттыктын” өзбек кызматы менен байланышкан медайымдар бул аялдардын экөө башкы жана улуу медайым экенин, алар күн сайын оорукананын аймагын тазалатууга мажбурлашарын билдиришүүдө.
Чиназ райондук бириктирилген ооруканасынын улуу медайымы Дилором Холкузиева медайымдар жана техникалык кызматкерлер район башчысынын буйругу менен тазалык иштерине чыгышарын, өзү да кол кабыш кыларын айтты. Ал кызматкерлер бул ишти өз ыктыярлары менен жасап жатышканын кошумчалады.
Оруукананын атын атагысы келбеген башка бир кызматкери алар тазалык иштери менен алектенип жүргөндө, бейтаптар кароосуз калып жатканын белгиледи.
13-апрелде Өзбекстан президенти Шавкат Мирзиёев Сырдарыя облусунун Сайхунабад районунун активдери менен жолугушуу учурунда мугалимдер менен дарыгерлерге көчө шыпыртуу – ага, анын саясатына карата чыккынчылык кылуу экенин билдирген. Өзбек лидери бюджеттик мекемелерде иштеген кызматкерлерди мажбурлап коомдук иштерге тарткандар жаза алышарын эскерткен.
КОММЕНТАРИЙ КАЛТЫРУУ