2018-жылдын январь айы суук болуп, андан улам Бишкек жылуулук энергия борборунда (ЖЭБ) авария болуп, шаар тургундары жылуулук жок, бир канча күн суук үйлөрдө жашашты. Ошол күндөн тарта жаңы эле оңдоо иштери жүргөн ЖЭБдин эмне себептен жарылгандыгын, ага кимдер күнөөлүү экендигин аныктоо иштери жүрүп, натыйжада алардын топ башында Сапар Исаков тургандыгы аныкталды.
Сапар Исаков ЖЭБна байланыштуу болгон ар бир жыйындарга катышып келгени маалым. Маселен 2010-жылы КР Өнүгүү, инвестициялар жана инновациялар боюнча борбордук агенттиги (М.Бакиевдин ЦАРИИси) тарабынан Бишкек шаарынын ЖЭБ реконструкциялоо боюнча даярдыктар башталган.
2010-жылдын январда аталган агенттик долбоорлордун 2 вариантын: атап айтканда Дүйнөлүк банктын 150 млн. долларлык сунушун жана «ТВЕА» компаниясынын 200 млн. долларлык долбоорлорун карап чыгып, «ТВЕА» компаниясынын сунушу Кыргызстандын кызыкчылыктарына туура келбейт деп баш тарткан. Сапар Исаков ошол учурда ЦАРИИнин да Коммуникация кызматынын жетекчиси болуп иштеп, ар бир жыйынга катышкан.
Бирок, 2013-жылы январь айларында С.Исаков КР Президентинин Аппаратында тышкы саясат боюнча бөлүмдүн жетекчиси болуп турган кезде ТВЕА компаниясынын долбоору 2010-жылы баасы жана ЖЭБ курууга анчейин тажрыйбасы жоктугуна байланыштуу четке кагылганын билип туруп, ал долбоорду кайра таңуулап (лобби) баштаган.
Тактап айтканда ал учурдагы президент А.Атамбаевке улам-улам кат жөнөтүп жатып акыры анын колдоосуна ээ болуп, Сапардын көксөгөн иши ишке кирген. Башкача айтканда С.Исаков КР Президентинин Аппаратында тышкы саясат боюнча бөлүмдүн жетекчиси болуп турса да, өзүнө тиешеси жок иштерге кийлигишкени айдан ачык. Анткени, 2013-жылдын июнь айларында “Бишкек ЖЭБ моденизациялоо” иши боюнча жыйын өткөрүп, өкмөткө тапшырмаларды берген.
Маселен, Тышкы иштер министрлигине Кытай тараптан насыя алуу проектисинин келишимин сурап, аны Энергетика жана өнөр жай министрлигине тапшырып берүүнү; Энергетика жана өнөр жай министрлиги, Каржы минстрлиги, Экономика министрлиги, Юстиция министрлиги жана Тышкы иштер министрлигине 2013-жылдын август айынын башында кытай тараптан алынуучу насыянын бардык шарттарын карап чыгууну;
Энергетика жана өнөр жай министрлигине Тышкы иштер министрлигинин жардамы аркылуу ТВЕА компаниясы менен келишимге кол коюуну тапшырган.
Акыры жүрүп олтуруп “ТВЕА” компаниясы 2014-жылы “Бишкек ЖЭБ модернизациялоо” иштери башталып, 2017-жылы июль айларында аяктаган. Бирок, С.Исаков 150 млн. доллар деп болжонгон долбоорду 386 млн. доллар менен ишке ашырууну уюштурган.
Бул жашоодо бир нерсе себеп болуп ар бир адам кылган иши үчүн жооп берээр күн акыры келет тура. Эгерде ошол жылы катуу суук болбогондо көп сумманы чапчыган бул иштердин туура эмес жүргүзүлгөнү билинбей калат беле. Исаковдун келишим түзүлүп жатканда кыргыз тараптын кызыкчылыгы жакшы корголбой калгандыгын билип туруп жасаган иши жанынды кейитпей койбойт.
Бишкек ЖЭБ боюнча парламентте талкуу болгондо, ошол учурдагы аткаминерлер жылуулук борборун модернизациялоодо алынган 600 долларлык аттиш, наркы 300 доллар турган видео көзөмөл камералары боюнча түшүндүрмө берип жатышты. Бул жаңылык элдин оозун ачырып, кыжырын келтирген өзүнчө бир сенсация болуп калды.
Ринат Медет уулу
Булак: «Факты.kg»
КОММЕНТАРИЙ КАЛТЫРУУ