Ленин райондук сотунда мурунку мэрлер Кубанычбек Кулматов менен Албек Ибраимовдун кылмыш иши боюнча процесс уланууда. Жактоочу Сергей Слесарев Албек Ибраимовго карата ишти өзүнчө өндүрүшкө бөлүүнү суранды. Бирок, сот канааттандырган жок.
«Анда бул ишти кылмыштын курамында жок деген бүтүм менен токтотууну суранам. Албек Ибраимов пансионат сатылганда «Дастан» ТНКнын директору эмес болчу. Ал андай укугу жок туруп кантип бир нерсе сатмак эле», – деди жактоочу.
Эске салсак, мурунку шаар башчыларына жемкорлук айыбы тагылууда. «Албек Ибраимов мэр болуп турган кезинде 250 миң доллар жана 20 миң доллар пара алган. Бул каражат «Дастан Инжиниринг» компаниясынын кассасынан чыгарылган», – деп билдирген Коопсуздук кеңешинин катчысы Дамир Сагынбаев. Кубанычбек Кулматовго былтыр 18-май күнү «жемкорлук» беренесинин негизинде кылмыш иши козголуп, айыбы 21-майда угузулган. Ага 2014-жылы Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айып тагылууда.
Булак: «13-квартал»
КОММЕНТАРИЙ КАЛТЫРУУ