Тажикстанда Конституциянын кабыл алынгандыгынын 25 жылдыгына карата жарыяланган мунапыстын алкагында камактагы адамдардын алгачкы тобу эркиндикке чыкты. Бул тууралуу өлкөнүн Жазаларды аткаруу кызматы билдирди.
Мекеменин маалыматына караганда, Явандагы түрмөдөн, Нуректеги аялдар абагынан жана Душанбедеги атайын түрмөдөн жалпысынан 1060тан ашык адам бошотулду. Алардын арасында 165 аял жана 60 өспүрүм бар.
Тажикстандын президенти Эмомали Рахмон «Мунапыс тууралуу» мыйзамга 25-октябрда кол койгон.
Мурдараак өлкөнүн башкы прокурору Юсуф Рахмон мунапыс оор эмес кылмыш үчүн абакта отурган жана учурда иши сотто каралып жаткан 20 миңден ашуун адамга жарыялана турганын билдирген. Анын айтымында, мындан тышкары коомдук жумуштарды аткарууга милдеттендирилген 4,5 миң киши жеңилдик алып, түрмөдө 12 жылдан ашык жаза өтөгөн аялдарга жана өспүрүмдөргө ырайым берилет.
– Мыйзамга ылайык абактарда отурган 300 аялдын 165и, ошондой эле тарбиялоочу жайлардагы 75 өспүрүмдүн 58си бошотулат. Буга кошумча жашы 55тен өткөн эркектер, майыптар, оорукчандар, өлкөдө жана чет жакта согушка катышкандар менен Чернобыль алааматынан жабыр тарткандарга мунапыс берилет. 9 миңге жакын кишинин жаза мөөнөтү кыскартылат, – деген башкы прокурор.
Анткен менен күнөөсүн мойнуна албаган өлкө абактарындагы саясий туткундар мунапыска илинбейт.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ