Бүгүн, 4-ноябрда Бишкек ЖЭБди модернизациялоо тууралуу кылмыш ишин кароо Свердлов райондук сотунда уланууда. Процесс сот Инара Гилязетдинованын жетекчилигинин алдында өтүүдө. Мурунку премьер-министр Сапар Исаков суралып бүттү. Кезек 2012-2014-жылдары премьер-министр болгон Жантөрө Сатыбалдиевге келди. Бүгүн ал сурак берүүдө. Ал 31-октябрда кан басымы көтөрүлүп кеткенин айтып, суракты дүйшөмбүгө калтырууну суранган.
Эске сала кетсек, 2018-жылдагы кышкы чилдеде, ЖЭБде авария болуп, Бишкектин тургундары бир жума бою жылуулуксуз калган. Үшүп калган эл андагы аткаминерлерди катуу сынга алып, алардын жоопко тартылышын талап кылган. Ошондон улам, териштирүү болуп, оңдоп-түзөө иштеринде коррупция бар экени аныкталып, биртоп адамга кылмыш иши козголгон. Бир гана мурдагы финансы министри Ольга Лаврова үй камагына чыгып, калганы камакта калган. Алар: экс-премьер-министрлер Сапар Исаков, Жантөрө Сатыбалдиев, мурдагы энергетика министри, депутат Осмонбек Артыкбаев, «Улуттук энергохолдинг» компаниясынын мурдагы төрагасы Айбек Калиев, анын ошол кездеги орун басары Жолдошбек Назаров, «Электр станциялары» ишканасынын мурдагы жетекчиси Салайдин Авазов жана ЖЭБди модернизациялоо долбоорунун мурдагы аткаруучу директору Темирлан Бримкулов. Булардын баарына«Коррупция» жана «Кызмат абалынан кыянаттык менен пайдалануу» беренелери менен айып тагылган.
Булак: KyrgyzToday.kg
КОММЕНТАРИЙ КАЛТЫРУУ