Израил Газа тилкесине сокку уруп, анда Палестинадагы «Ислам жихады» куралдуу тобунун кол башчыларынын бири Баха Абу аль-Атта өлтүрүлгөнүн билдирди.
Аталган өлкөнүн армиясынын басма сөз кызматы «Баха Абу аль-Атта Израилдеги жайкын тургундарга каршы уюштурулган жүздөгөн терактка жооптуу болгон» деп жазды.
Иран колдогон «Ислам жихады» тобу Газа тилкесинин чыгышындагы Шежая районундагы соңку соккуда Баха Абу аль-Атта аялы экөө ажал тапканын ырастады.
Сириялык мамлекеттик жалпыга маалымдоо каражаттары Израил Дамасктагы «Ислам жихады» тобунун дагы бир лидери Акрам аль-Ажуринин үйүн да аткылаганын, анда эки адам мерт болгонун, бирөө Ажуринин уулу экенин маалымдады.
Палестинадагы куралдуу топтор Израилге жооп иретинде Тел-Авив баштаган бир канча шаарларды ракета менен аткылашты. Соккунун кесепети, жабыркагандар тууралуу азырынча маалымат жок.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ