Бүгүн, 20-ноябрда Свердлов районундук соту Бишкек ЖЭБди модернизациялоо тууралуу кылмыш ишин кароону улантты. Процесс судья Инара Гилязетдинованын жетекчилиги алдында өтүүдө.
Сот кылмыш ишинин материалдарын изилдөөгө өттү. Изилдөөнүн жүрүшүндө, эртең менен экс-депутат Феликс Куловдун каты окулган. Андан кийин айыпталуучулар Бүткүл дүйнөлүк банктын документтерин жана Роза Отунбаеванын Кытайга болгон сапары тууралуу материалды окууну судьядан суранышты. Алардын суранычын судья Инара Гилязетдинова канааттандырбай, алардын ишке тиешеси жоктугун баса белгилеп, окубай койду. Ошондон улам, ортодо кайым айтышуулар болду. Адвокат Замир Жоошев ага нааразы болуп, “судья иштин материалдарынын баарын изилдеши керек, ал болсо барактап да койгон жок”,-деп соттун иш алып барганына ичи чыкпай турган кези…
Эске сала кетсек, 2018-жылдагы кышкы чилдеде, ЖЭБде авария болуп, Бишкектин тургундары бир жума бою жылуулуксуз калган. Үшүп калган эл андагы аткаминерлерди катуу сынга алып, алардын жоопко тартылышын талап кылган. Эксперттердин жыйынтыгы боюнча, «Бишкек ЖЭБин модернизациялоо» долбоорун даярдоо, кол коюу жана ишке ашыруудагы коррупция мамлекетке 5 миллиард 439 миллион сом зыян алып келген. Оңдоп-түзөө иштеринде коррупция бар экени аныкталып, бир топ андагы атка минерлерге кылмыш иши козголгон. Бир гана мурдагы финансы министри Ольга Лаврова үй камагына чыгып, калганы камакта калган. Алар: экс-премьер-министрлер Сапар Исаков, Жантөрө Сатыбалдиев, мурдагы энергетика министри Осмонбек Артыкбаев, «Улуттук энергохолдинг» компаниясынын мурдагы төрагасы Айбек Калиев, анын ошол кездеги орун басары Жолдошбек Назаров, «Электр станциялары» ишканасынын мурдагы жетекчиси Салайдин Авазов жана ЖЭБди модернизациялоо долбоорунун мурдагы аткаруучу директору Темирлан Бримкулов. Булардын баарына «Коррупция» жана «Кызмат абалынан кыянаттык менен пайдалануу» беренелери менен айып тагылган.
Айыпталуучулар четинен суралууда. 6-ноябрда “Улуттук энергохолдинг” компаниясынын мурдагы төрагасы, айыпталуучу Айбек Калиев суралган. Ага чейин мурдагы энергетика министри Осмонбек Артыкбаев суралып, ал андагы президент Алмазбек Атамбаевдин тапшырмасы аткарылып турганын ачык эле айтып берген. «Электр станциялары» ишканасынын мурдагы жетекчиси Салайдин Авазов суракка алынып, “ЖЭБди реконструкция кылбасак, тезек терип калмакпыз”,-деп “коркуткан”.
Булак: KyrgyzToday.kg
КОММЕНТАРИЙ КАЛТЫРУУ