Бүгүн, 13-июнда Саламаттыкты сактоо министринин орун басары Нурболот Үсөнбаев маалымат жыйын өткөрдү. Ал жыйында коронавирус илдети боюнча статистикалык маалымат берди. Андан тышкары, бир жуманын ичинде 4 миң рейд жүргүзгөнүн белгилеп өттү.
“Өзүнүн экономикалык ишмердүүлүгүн жандандырган объекттердин бардыгын катуу көзөмөлгө алып жатабыз. Көптөгөн рейддерди жүргүзүүдөбүз. 4 миң рейд бир жуманын ичинде жүргүзүлдү. Миллондогон акчага айып салынып жатат. Биз барыбыз санитардык эрежелерди кармабасак, айып салуу менен жакшы жыйынтыкка келе албайбыз. Коркунуч зор экенин жакшы түшүнүшүбүз керек”, – деди ал.
Ошондой эле Үсөнбаев улуу муундун өкүлдөрүнө кайрылуу жасап өттү.
“Улуу муундагы адамдарга кайрылуум бар эле. Сиздер ооруканаларга, көчөлөргө, эс алуу жайларына барып жатасыздар. Бираз үйдө отуруп, сыртка чыкпоого чакырып өтөт элем. Мындан тышкары, той-аштарга сакалдуу адамдарды чакырышууда. Аларды дагы азайтуу керек”, – деди ал.
Булак: KyrgyzToday.kg
КОММЕНТАРИЙ КАЛТЫРУУ