«Административдик-территориалдык реформа боюнча өтө көп айтылып келген. Буюрса, болот. Буга биз даярбыз», — деп баса белгиледи Кыргыз Республикасынын Президенти Сооронбай Жээнбеков бүгүн, 8-августта, Коомдук телерадиокорпорациясынын «Биринчи радиосуна» берген кезектеги маегинде.
Мамлекет башчысы белгилегендей, бул реформа (АТР) ар кандай себептер менен жүргүзүлбөй келген.
«Парламенттик шайлоо өткөн соң, бул реформага киришебиз. Ошондо бир топ бири-бирин кайталаган мамлекеттик органдар жоюлуп, өзгөрүүлөр жана кыскартуулар болот. Мамлекеттик системанын ыкчам иштешине, бюрократияны азайтып, маселени тез чечкенге өбөлгө түзүлөт», — деди Президент Сооронбай Жээнбеков.
Мамлекет башчысы административдик-территориалдык реформаны жүргүзүү зарылдыгын белгиледи.
«Пандемия шартында баарыбыз көрдүк. Жеке сектор да, ишкер чөйрө да, мамлекеттик органдар да өз ишин өзгөртсө болот жана өзгөртүшү керек экендиги айкын болду», — деп жыйынтыктады Президент Сооронбай Жээнбеков.
КОММЕНТАРИЙ КАЛТЫРУУ