Москвадагы көпүрөнүн кулашынан жапа чеккен кыргыздарга компенсация төлөнгөндүгүн Кыргызстандын Россия Федерациясындагы элчилигинин басма сөз кызматы билдирди.
Кырсык 27-сентябрда “FM LOGISTIC” ишканасынын кампасында болгон. Кыргызстандын 51 жараны жаракат алышкан, бирок 22 адам медициналык текшерүүдөн кийин үйүнө чыгарылган. 29 адам үч ооруканага жеткирилди, алардын үчөө оор абалда.
Элчиликтин билдиришинче, ошол күнү ишканада 160 кыргызстандык иштеген – 139 адамга компенсация төлөнгөн. Дагы 11 жарандын документтерин карап жатышат.
“29 жабырлануучунун ичинен дээрлик бардыгы айыгып, амбулатордук дарыланууга жөнөтүлдү. Азыр ооруканада бир гана адам жатат”, – деп билдиришти элчиликтен.
Окуядан кийин Россия Федерациясынын Кылмыш-жаза кодексинин 143-беренеси “Эмгекти коргоо талаптарын бузуу, этиятсыздыктын кесепетинен адамдардын ден соолугуна оор зыян келтирүү” беренеси боюнча иш козголгон.
КОММЕНТАРИЙ КАЛТЫРУУ