“ЭлТР” телеканалынын жамааты ишин убактылуу улантууну чечишти. Бул тууралуу бүгүн, 27-октябрда журналист жана алып баруучу Бакыт Сакыбаев журналисттерге билдирди.
«Эртең менен биз саат 14: 00гө чейин иштейбиз деп чечтик, анткени ага чейин Шаиста Шатманова каналдын башкы директорунун кызматынан алынат деп өкмөт убада кылды. Эми өкмөттүн өкүлдөрүнүн келишин күтүп жатабыз. Эгерде биздин талаптар чечилбей калса, анда биз дагы жумуш ордубузду таштайбыз», – деди Бакыт Сакыбаев.
Ошондой эле ал белгилегендей, эгер телеканалдын учурдагы директору кызматтан алынса, анда ЭлТРдин кызматкерлери жалпы чогулушта шайлануучу кесиптештеринин бирин жетекчиликке көрсөтүшөт.
Эскерте кетсек, кечээ, 26-октябрда “ЭлТР” телеканалына Шаиста Шатманова башкы директор болуп дайындалгандыгына байланыштуу бардык кызматкерлер өз жумуштарын таштап кетишкен.
КОММЕНТАРИЙ КАЛТЫРУУ