Бүгүн, 29-октябрда Юстиция министрлигинин жана Европа Биримдигинин жана GIZ «Кыргыз Республикасында укуктун үстөмдүгү 2 – фаза» программасынын өкүлдөрүнүн жолугушуусу болуп өттү. Бул тууралуу Юстиция министрлигинин басма сөз кызматы билдирди.
Жолугушуу юстиция министринин орун басары Марат Канулькуловдун төрагалыгы алдында өткөн.
Жолугушуунун жүрүшүндө Европа Биримдигинин жана GIZ программаларынын адам укуктары боюнча кеңешчиси Болот Исаков үстүбүздөгү жылдын май айында өткөрүлгөн мамлекеттик жана муниципалдык кызматтардын алкагында укуктук маалыматтардын пайдалануучуларынын муктаждыктарына баа берүү боюнча талаа изилдөөлөрүнүн жыйынтыктарын сунуштаган.
Изилдөөлөр Ош, Баткен жана Жалал-Абад облустарынын пилоттук райондорунда жарандардан мамлекеттик жана муниципалдык кызмат көрсөтүү чөйрөсүндө маалыматтык, консультациялык жана укуктук жардам алууга жетишүүдөгү бар болгон тоскоолдуктарын аныктоо жана сунуштарды иштеп чыгуу максатында өткөрүлгөн.
Жолугушуунун жыйынтыгында Юстиция министрлиги Европа Биримдигинин жана GIZ Программасы тарабынан жүргүзгөн иштери үчүн ыраазычылык билдирип жана калкка укуктук маалымат берүү маселеси боюнча оптималдуу инструменттерди иштеп чыгуу үчүн мамлекеттик аймактык органдарынын арасында ушундай эле изилдөөлөрдү жүргүзүүнүн зарылдыгы жөнүндө сунуштарын кароого даярдыгын билдирген.
КОММЕНТАРИЙ КАЛТЫРУУ