Акыркы маалыматтар боюнча, Түркиянын батыш тарабындагы Измир шаарындагы жер титирөөдө каза болгондордун саны 98 адамга жетти. Бул тууралуу “Anadolu” маалымат агенттиги билдирет.
Маалыматка ылайык, жабыркагандардын саны 994тү түздү. Алардын 884ү ооруканалардан чыгарылды, 147си дарыланууда, 12си жандандыруу бөлүмүндө жатат. Кыйратылган 17 турак үйдүн ичинен 12синин урандыларын демонтаждоо иштери аяктады.
Эскерте кетсек, 30-октябрда Самос аралына жана Түркиянын Измир провинциясындагы Сеферихисар шаарына жакын Эгей деңизинде күчү 6,7 баллга жеткен жер титирөө катталган. Анын кесепетинен Измирдеги 20 үй талкаланган.
Жер титирөө бир катар Грек аралдарында да сезилген. Самос аралында дагы адамдар жер титирөөдөн каза болуп, жаракат алышты.
КОММЕНТАРИЙ КАЛТЫРУУ