Айсулуу Тыныбекова Эл аралык күрөш уюмунун виртуалдык турниринин жеңүүчүсү болду. Бул тууралуу аталган уюмдун Instagram баракчасына жарыяланды.
Турнир Бириккен күрөш уюмунун Инстаграмдагы расмий баракчасында өтүп, жеңүүчү социалдык тармактын колдонуучуларынын добуштарынын саны менен аныкталды.
Ага учурда дүйнөдөгү аялдар күрөшүнүн 16 мыкты өкүлү катышып, алар эки топко бөлүнүшкөн.
Айсулуу Тыныбекова турнирдин 1/8 финалында Рио-2016 Олимпиада чемпиону (63 кг чейин) япониялык Рисако Кавай менен “жолугуп”, жеңишке жетти. Ал эми чейрек финалда 2012-жылдагы Лондон олимпиадасынын чемпиону (76 кг чейин) орусиялык Наталья Воробьеваны “жеңип алды”. АКШнын беш жолку дүйнө чемпиону Аделин Грей жарым финалда Тыныбековадан жеңилип калды.
Ал эми финалда индиялык спортчу Винеш Пхогат менен Айсулуу Тыныбекова “беттешип”, индиялык спортчуга 121,907 адам добуш берилсе, Тыныбекованы 170,989 адам колдогон.
КОММЕНТАРИЙ КАЛТЫРУУ