Бүгүн, 18-январда Маданият министри Нуржигит Кадырбеков менен ырчылар Кайрат Примбердиев жана Курал Чокоевдин жолугушуусу болуп өттү. Бул тууралуу аталган башкармалыктан билдиришти.
Билдирүүдө жолугушуу достук маанайда өткөнү айтылат. Жаңы муун арасынан мыкты таланттарды таап, эл аралык аренага алып чыгуу менен кыргыз маданиятын дүйнөгө таанытуу багытындагы долбоорлорду ишке ашыруу идеялары талкууланды.
Тараптар ошондой эле фонограмма көйгөйүн да талкуулашты. Муну менен бирге, артка кылчактабай, эл-журтубуз үчүн мыкты, пайдалуу демилгелерди биргеликте аткаруу боюнча жалпы позиция такталды.
Белгилей кетсек, ырчылардын чуу жараткан долбоорунан кийин Маданият министрлиги тарабынан Курал Чокоевге ыйгарылган “Маданияттын мыкты кызматкери” төш белгисин кайтарып алынган. Кайрат Примбердиевди “КР эмгек сиңирген артисти” наамынан ажыратуу боюнча маданият министрлининин сунушу президенттин аппаратына расмий жөнөтүлгөн.
Мамлекеттик сыйлыктар боюнча комиссия Маданият, маалымат жана туризм министрлигинин ырчы Кайрат Примбердиевди “Кыргыз Республикасынын эмгек сиңирген артисти” наамынан ажыратуу боюнча сунушун четке какты.
КОММЕНТАРИЙ КАЛТЫРУУ