Бүгүн, 28-январда, Т.Сатылганов атындагы Кыргыз улуттук филармониясында Кыргыз Республикасынын Президенти Садыр Жапаровдун кызматка киришүү аземи болуп өттү. Бул тууралуу президенттин аппараттын басма сөз кызматы билдирет.
Жаңы шайланган Мамлекет башчысы Филармониянын алдындагы Айкөл Манастын эстелигине токтоп, ата-бабаларыбызга таазим кылып, муну менен кыргыз рухунун туу чокусу болгон «Манас» эпосуна да сый-урмат көрсөттү.
Инаугурация аземинде Садыр Жапаров Конституцияга колун коюп, Кыргызстан элине ак кызмат кылууга ант берди. Ага Кыргыз Республикасынын Президентинин күбөлүгү, төш белгиси жана штандарты тапшырылды. Андан кийин Садыр Жапаров инаугурациялык сөз сүйлөдү.
Иш-чаранын жүрүшүндө Казакстан Республикасынын Туңгуч Президенти Нурсултан Назарбаевдин куттуктоосун анын атайын өкүлү Жансеит Туймебаев окуп берди. Ошондой эле Европа Бирлигинин (ЕБ) төрагасы Шарль Мишелдин куттуктоосун ЕБдин Борбор Азия боюнча атайын өкүлү, элчи Петер Буриан окуду.
Социалисттик Эмгектин Баатыры, Кыргыз Республикасынын Баатыры, СССР эл сүрөтчүсү Тургунбай Садыков Садыр Жапаровго бата берип, анын мамлекеттик ишмердүүлүгүнө ийгиликтерди каалады.
Андан соң Кыргыз Республикасынын Куралдуу күчтөрүнүн башкы кол башчысы катары ал Улуттук гвардиянын жоокерлеринин парадын кабыл алды.
Параддан кийин Президент Садыр Жапаров Өкмөт үйүнө келип, Жогорку Кеңеш Төрагасы Талант Мамытовдун коштоосунда иш бөлмөсүнө кирди.
Иш-чарага катардагы жарандардан, коомдук ишмерлерден, чыгармачыл жана илимий интеллигенциянын өкүлдөрүнөн, ата мекендик жана чет элдик алдыңкы маалымат каражаттарынын жетекчилеринен турган миңден ашуун мейман катышты.
Инаугурация аземи Кыргыз Республикасынын Коомдук телерадиоберүү корпорациясы жана республикалык телеканалдар аркылуу түз эфирде көрсөтүлдү. Ошондой эле Бишкек шаарынын борбордук «Ала-Тоо» аянтында шаардыктар үчүн иш-чараны түз эфирде көрсөтүү уюштурулду.
КОММЕНТАРИЙ КАЛТЫРУУ