Бүгүн, 4-мартта “Ала-Тоо” аянтында “Ак калпак” күнү салтанаттуу белгиленди. Бул тууралуу Маданият, маалымат, спорт жана жаштар саясаты министрлигинин басма сөз кызматы билдирди.
Салтанаттуу иш- чара улуттук кийимдердин парады менен башталып, маданий иш- чаранын расмий бөлүгү “Ала- Тоо” аянтында уланды.
Ага Кыргыз Республикасынын Маданият, маалымат, спорт жана жаштар саясаты министри Кайрат Иманалиев, Кыргыз Республикасынын Жогорку Кеңешинин Төрагасынын орун басары Нурбек Сыдыгалиев, Бишкек шаарынын вице- мэри Жамалбек Рысалиев, коомдук маданий ишмерлер, шаар тургундары жана меймандар катышты.
Иш – чараны министр Кайрат Иманалиев ачып, жалпы катышуучуларга ыраазычылык билдирип, куттуктоо жолдоду.
Министр өз сөзүндө, өлкөдө майрамдалып жаткан ак калпак майрамынын мааниси жогору экендигин билдирип, аны аздектеп сактоо, улуулардын жолун улай, мындай иш- чараларды дагы жогорку деңгээлде уюштурула тургандыгын айтты. Ак кар баскан Ала Тоонун чокуларын чагылдырган улуттук баш кийимибиз Кыргыз жигиттерине айбат,сүр берип, айкөлдүгүн көргөзүп эң негизгиси Ак калпагы менен алар ар дайым бийик экенин даңазалап келет. Касиети бийик Калпактын кадыры да жогору жана ар дайым жогору бойдон калышы керек. Аны муундан- муунга сактап, кыргыз жигиттери башынан түшүрбөй кийип жүрсө деген изги тилек менен бүгүнкүдөй жакшы саамалыктар уюштурулуп, өтүп келет”-, деп кошумчалады министр. Салтанатта Ак калпак күнүн майрамдоо демилгесин көтөргөн Рысбек Жабировго Маданият, маалымат, спорт жана жаштар саясаты министрлигинин Ардак грамотасы жана белеги тапшырылды. Ошондой эле иш- чаранын жүрүшүндө уюштуруу жана даярдоо аракеттерин көргөн Элнура Кулуева, Ырыс Окенова жана Аманбол Бабакуловго ыраазычылык айтылды.
Эске салсак, бүгүнкү майрамда улуттук кийимдердин парады “Ала Тоо” кинотеатрынан башталып, “Ала Тоо” аянтына чейин созулду.
Учурда «Курманжан Датка» эстелигинин жанында кол өнөрчүлөрдүн жарманкеси өтүп жатат. Ага ак калпактардын түрлөрү, улуттук кийимдер жана кол өнөрчүлөрдүн эмгектери коюлган. Жарманке 4-5 март күндөрү өтөт.
Иш- чараны Кыргыз Республикасынын Маданият, маалымат, спорт жана жаштар саясаты министрлиги, “Улуттук намыс” уюму жана Бишкек шаарынын мэриясы менен биргеликте уюштурду.
КОММЕНТАРИЙ КАЛТЫРУУ