Медицина илимдеринин доктору, академик, Гиннестин рекорддор китебинин дипломунун ээси Мамбет Мамакеев 94 жаш курагында COVID-19 оорусуна каршы эмдөөдөн өттү. Ал бүгүн Бишкек шаардык №7 үй бүлөлүк медицина борборуна келип, Россия өндүргөн “Гам-КОВИД-Вак” вакцинасын биринчилерден болуп алды. Бул тууралуу коронавируска каршы күрөшүү боюнча республикалык штаб билдирди.
“Эпидемиологиялык абал начарлап жатат. Оорудан өлгөндөрдүн саны өсүүдө. Дүйнөлүк медицина өнүккөнүнө карабай COVID-19 оорусуна каршы эффективдүү дары табылбай келет. Мындан улам эселеп лабораториялык текшерүүлөрдөн өткөн вакциналарды алып, бул жугуштуу оорунун алдын алууга болот”, – деди академик.
Оорулардын алдын алуу жана мамлекеттик санитардык-эпидемиологиялык көзөмөл департаментинин иммунопрофилактика бөлүмүнүн башчысы Бурул Асыкбекованын айтымында, Бишкек шаарына жана Чүй облусуна “Гам-КОВИД-Вак” вакцинасынын 2500 дозасы бөлүнүп берилген.
“Аны жашы 65тен ашкан жарандар, өнөкөт оорусу бар адамдар алышса болот. “Гам-КОВИД-Вак” вакцинасы менен эмдөө ордо калаанын 3 пунктунда: №2, №6, №7 үй бүлөлүк медицина борборлорунда жүргүзүлүп жатат. Анткени Россия өндүргөн вакцинаны -18, -25 градуста сактоо талап кылынгандыктан азырынча 3 жайда эмдөө жүргүзүлмөкчү”, – деди Асыкбекова.
Белгилей кетсек, 22-апрель күнү Кыргызстанга Россиядан “Гам-КОВИД-Вак” вакцинасынын 20 миң дозасы жеткирилген.
КОММЕНТАРИЙ КАЛТЫРУУ