Бүгүн, 6-майда мурунку “Замандаш” партиясынын лидери Жеңиш Молдокматов КР Ички иштер министрлигинин тергөө башкармалыгындагы сурактан кийин камакка алынды. Укук коргоо органдары Жеңиш Молдокматовду былтыр, 9-октябрдагы бийликти басып алуу аракеттерине айыптап жатат.
Эсиңиздерге сала кетсек, 2020-жылдын 9-октябрь күнү абактан тарапкерлери тарабынан 5-октябрда чыгарылып алынган Алмаз Атамбаев эски жана жаңы саясатчылар: Өмүрбек Бабанов, Темир Сариев, Тилек Токтогазиев, Фарид Ниязов жана башкаларды “Ала-Тоо” аянтына жыйнап алып, бийликти алмаштыруу аракетин жасаган. Алмаз Атамбаевдин бул тобуна каршы ал кезде парламент тарабынан жаңы эле дайындалган премьер-министр Садыр Жапаровдун жана ошол учурдагы президент Сооронбай Жээнбековдун тарапкерлери аянтка чыгып, атамбаевчилерди кууп таратышкан.
Эртеси, 10-октябрда кылмыш иши козголуп, анын натыйжасында Алмаз Атамбаев жана Фарид Ниязовдор 9-октябрдагы окуялар боюнча да камакка алынышкан. Бир нече атамбаевчилер суракка алынууда. Бүгүн Жеңиш Молдокматов сурактан кийин абакка камалды.
Жеңиш Молдокматов 2020-жылдын 4-октябрындагы Жогорку Кеңешке шайлоодо “Замандаш” партиясынын лидери катары катышкан, бирок жеңилип калып, нааразычылык акциясына чыккандардын катарында болгон.
Жакында эле бир кезде Тайырбек Сарпашевге тиешелүү деп айтылып жүргөн “Туран” партиясынын лидери болуп шайланганы жарыяланган.
Булак: KyrgyzToday.kg
КОММЕНТАРИЙ КАЛТЫРУУ