Урматтуу мекендештер,
Өлкөдө эки күн катары коронавирус инфекциясынын жана өпкө оорусунун миңге жетпеген жаңы учуру катталды. 25-июлда – 995 жана 26-июлда 973 учур. Оорунун көрсөткүчтөрү төмөндөдү, бирок эпидемиологиялык кырдаал курч бойдон калууда.
Организмди COVID-19 коргоо жана оорулардын саны кайтадан жогорулабашы үчүн милдеттүү түрдө санитардык-эпидемиологиялык эрежелерди сактоо жана вакцинациядан өтүү зарыл экендигин Республикалык ыкчам штаб эскертет.
Эпидемиологиялык кырдаал жакшырганга чейин ар кандай салтанаттуу жана массалык иш-чараларды өткөрүү жана аларга баруу сунушталбайт. Менчик формасына карабастан бардык мекемелерде, жабык имараттарда, коомдук транспортто милдеттүү түрдө беткап режимин сактоо зарыл.
COVID-19 таралышынын алдын алуу, өзүңүздү жана жакындарыңызды оорунун күчөп кетишинен сактоо, организмди алдын-ала даярдоо жана иммундук коргоону камсыз кылуунун ишенимдүү ыкмасы вакцинация болуп саналат.
Белгилей кетсек, учурда Кыргыз Республикасынын жарандарына COVID-19 каршы эмдөө акысыз жана ыктыярдуу негизде жүргүзүлүүдө. Бүгүнкү күндө 352 миң 877 адам вакцинацияланган (107 826 адам экинчи дозаны алган).
Өзүңүздү жана жакындарыңызды сактаңыз!
КОММЕНТАРИЙ КАЛТЫРУУ