2021-жылы Тажикстандын Согди облусунда чек арадан мыйзамсыз өтүү учурунда Кыргызстандын 39 жараны кармалган. Бул тууралуу 15-февралда облустук соттун төрагасы Бахтиер Окилзода билдирди.
«Кармалгандарга карата «Тажикстан Республикасынын мамлекеттик чек арасын мыйзамсыз кесип өтүү» беренеси боюнча 27 кылмыш иши козголду. Тартип бузгандар ар кыл мөөнөткө эркинен ажыратылды», – деп түшүндүрдү судья.
Ошол эле маалда Бахтиер Окилзода чек ара жаңжалына катышуу айыбы менен соттолгон кыргызстандыктар жок экенин белгиледи.
Кыргыз-тажик чек арасынын узундугу 970 чакырымдай болсо, анын 519 чакырымы гана такталган. Чек араларды тактоодо эки тарап кайсы карта жана кайсы юридикалык документ менен иштөө керектиги боюнча орток пикирге келе албай, көп жолугушууларда иш жылбай жатканы айтылып келген.
Эки мамлекеттин чек арасындагы тактала элек тилкелерде куралдуу кагылышуулар катталып турат.
КОММЕНТАРИЙ КАЛТЫРУУ