Билим берүү жана илим министрлигинин “Кыргыз Республикасынын жалпы билим берүү уюмдарында окуу процессинде уюлдук байланыш каражаттарын окуучулар тарабынан чектелүү түрдө колдонуу тууралуу Сунуштарды бекитүү жөнүндө” 2022-жылдын 30-августундагы №1655/1 буйругу бекиди.
Ага ылайык, төмөндөгү учурларды кошпогондо жалпы билим берүү уюмдарынын окуу процессинде уюлдук байланыш каражаттарын колдонууга чектөө киргизүү сунушталат:
- Маалыматтык компетенттүүлүктү калыптандыруу үчүн окуу предмети боюнча маалымат издөөдө;
- Окуу процессинде онлайн тесттерди түзүүдө жана колдонууда;
- Окуу видеосун көрүүдө же аудио жазууларды колдонууда;
- Маалымат издөө үчүн QR-коддорду окууда;
- Электрондук күндөлүктү колдонууда;
- Атайын шаймандар жана техникалар менен жабдылган атайын багыттагы класстарда (информатика кабинеттери, smart-класстар) смартфондорду колдонуу;
Ден соолугуна байланыштуу телефонду колдонууга муктаж болгон балдарга уюлдук байланыш каражаттарын колдонууга чектөө коюлбайт;
Өзгөчө кырдаалдар учурунда жалпы билим берүү уюмдарында уюлдук байланыш каражаттары менен колдонууга чектөө коюлбайт;
Класста смартфондорду рюкзактардан алып чыгуу жогоруда көрсөтүлгөн пунктарга ылайык, максаттуу колдонуу учурларда гана сунушталат.
Жалпы билим берүү уюмуна киргенде уюлдук байланыш каражаттарын “үнсүз” режимге которуу зарыл (анын ичинде элес термелүүлөрдү болтурбоо үчүн титирөө режимин колдонууга болбойт).
Сунуштар окуучулардын ден соолугунун начарлашынын алдын алуу, окуу-тарбиялоо процессинин натыйжалуулугун жогорулатуу максатында иштелип чыкты.
КОММЕНТАРИЙ КАЛТЫРУУ