Бишкек шаарындагы Октябрь райондук милициясы инклюзивдик билим берүү жайлардын биринде майып бала сабалган окуяны иликтей баштады.
“Бул фактка байланыштуу тергөөгө чейинки иликтөө башталды жана тиешелүү экспертизалар дайындалды. Иликтөөнүн жүрүшүндө бул окуя жашы жете элек М.Н. аттуу бала август айынан бери барып жүргөн 5-кичи райондогу инклюзивдик борборлордун биринде орун алганы аныкталды. Учурда териштирүү уланууда”,-деп жазылган райондук ички иштер бөлүмү тараткан маалыматта.
Милиция бул окуя качан катталганын тактаган жок. Мунун алдында социалдык тармактарда тарбиячы жашы жете элек баланы чыбык менен сабап жатканы тартылган кыска видео тараган жана бул талкуу жараткан.
Рсасмий маалыматтка ылайык, Кыргызстанда 200 миңдей майып адамдын 38 миңдейи 18 жашка чыга элек балдар. Алардын көпчүлүгү жалпы билим берүү мектеп, окуу жай, бала бакчаларга бара албайт, айрымдары мектеп-интернаттарда, инклюзивдик билим берүү борборлорунда окуйт.
Кыргызстан Бириккен Улуттар Уюмунун майыптыгы бар адамдарды коомго интеграциялоо боюнча конвенциясын 2019-жылы ратификациялаган.
КОММЕНТАРИЙ КАЛТЫРУУ