Жогорку Кеңештин депутаттары парламенттин 6-апрелдеги жыйынында Бишкек шаарынын мэрин түз шайлоо боюнча мыйзам долбоорун биринчи окууда четке какты. Документке 38 депутат “каршы”, 13ү “макул” добуш берди.
“Жергиликтүү мамлекеттик администрация жана жергиликтүү өз алдынча башкаруу органдары жөнүндө” жана “Борбордун статусу жөнүндө” мыйзамга өзгөртүү киргизүү тууралуу документти “Альянс” фракциясынын депутаттары иштеп чыккан.
“Баш мыйзамда жазылгандай бийликтин булагы – эл. Бишкек шаарынын мэрин шаар тургундары шайлашы керек деген пикирдебиз. Борбордо шаарды каптаган кара түтүн, авто тыгын, башаламан курулуш, жаңы конуштардагы туташ көйгөйлөр чечилбей келатат. Биз мэр болчу адамдан “мен мэр болсом маселени ушундай чечем” деген планын уга элекпиз. Эгерде мэрди шаардык түз шайласа биз талапкердин программасын угат элек””, – деди долбоордун авторлорунун бири, депутат Жанарбек Акаев.
Мыйзам долбоорун талкуулоодо айрым депутаттар Ош шаарынын мэрин да түз шайлоо керектигин айтышты. Кээ бир эл өкүлдөрү Кыргызстан президенттик башкарууну тандап алганын, мэр туруктуу иштеши үчүн президент дайындашы керектигин белгиледи.
Мурда шаар мэрлерин жергиликтүү кеңештин депутаттары шайлачу. 2021-жылы мыйзам өзгөртүлүп, республикалык жана облустук маанидеги шаарлардын мэрлерин президент, райондук маанидеги шаарчалардын башчысын аким дайындап калган.
Бишкекте бир топ жылдан бери коомдук транспорт, жол тыгыны, борборду каптаган ыш маселеси чечилбей келет.
КОММЕНТАРИЙ КАЛТЫРУУ