Тажикстанда “Ворух” чек ара комендатурасынын башчысы, подполковник Нухзат Лазуриев кармалды. Бул тууралуу өлкөнүн Башкы прокуратурасы кабарлады.
Лазуриев кызмат өтөгөн №0215 аскер бөлүгү Согд облусундагы Канибадам жана Исфара райондорунун чек араларын кайтарат.
Прокуратуранын билдирүүсүндө офицерге каршы “Кызмат абалынан кыянат пайдалануу” беренеси менен кылмыш иши козголгону жазылган. Тажикстанда бул берене боюнча күнөөлүү деп табылгандар үчүн сегиз жылдан 12 жылга чейинки мөөнөткө эркинен ажыратуу жазасы каралган.
Көзөмөл органдын билдирүүсүндө Лазуриевдин кармалышы аскердик бөлүктөрдүн биринде жоокерлердин катуу сабалганы тартылган видеого байланышы бар-жоктугу жазылган эмес.
24-апрелде Башкы прокуратура жаш жоокерлерди сабоого шектелип беш аскер кызматкери кармалганын билдирген. Мекеменин маалыматына караганда, окуя 2022-жылы декабрда Согд облусунун Канибадам районунда жайгашкан №0215 аскердик бөлүктө болгон.
Кармалган аскер кызматкерлерине каршы “Уставдык мамилелерди бузуу” беренеси менен кылмыш иши козголуп, ишти Согд облустук Аскердик прокуратурасы иликтеп жатканы кабарланган.
Бирок кийинчерээк бул билдирүү Башкы прокуратуранын расмий сайтынан өчүрүлгөн. Мекеме маалыматтын алынганы боюнча комментарий берген жок.
24-апрелде интернетке жаш жоокерлерди кенже командирлер же мурда келген жоокерлер сабап жатканы тартылган видео жарыяланган. Анда аскер кийимчен адамдар казармада тизилген жоокерлерди башка-көзгө койгулап, таяк менен сабап жатканын көрүүгө болот.
Бул видео тажикстандык соцтүйүн колдонуучуларынын аоасында катуу талкуу жаратып, көпчүлүгү тажик бийлигин күнөөлүүлөрдү тезинен аныктап, жоопко тартууга чакырышкан.
КОММЕНТАРИЙ КАЛТЫРУУ