Menu

Author Archives: Адина Сагымбекова

Чек арачылар менен Куралдуу күчтөрдүн күнүнүн урматына майрамдык концерт уюштурулду 

28-май Кыргыз Республикасынын Мамлекеттик чек ара кызматкерлеринин, 29-май КРнын Куралдуу күчтөрүнүн күнүнө карата, Баткен шаарында майрамдык концерт уюштурулду. Бул тууралуу КРнын Өкмөтүнүн Баткен облусундагы ыйгарым укуктуу өкүлүнүн басма сөз кызматы билдирди.

Салтанаттуу иш чарага КРнын Өкмөтүнүн Баткен облусундагы ыйгарым укуктуу өкүлү Абдикарим Алимбаев катышып, чек арачылар менен аскер кызматкерлерин кесиптик майрамдары менен куттуктады. 

Ыйгарым укуктуу өкүл өз сөзүндө,  “эки өлкө менен чектеш жайгашкан Баткен облусунда кызмат өтөп жаткан чек арачылар менен аскер кызматкерлери,  чыныгы мекенчилдик, эркттүүлүк, тайманбастык сапаттарга ээ экенин баса белгилегим келет. Ар бириңиздердин аракетиңиздер менен, Кыргызстан элинин бүтүндүгү сакталып, мамлекеттүүлүк чыңдалып турат.   Күн-түн дебей, күчөтүлгөн тартипте чек араны кайтарып, мамлекет алдындагы ыйык милдетиңиздерди жогорку деңгээлде аткарып, ар-намыстуулуктун үлгүсүн көрсөтүп жатасыздар.Сиздерге алкыш айтып, таазим этебиз” деди. 

Аталган иш чара коомдук ишмер Ассоль Молдокматованын демилгеси менен, белгилүү кыргыз эстрада жылдыздарынын катышуусунда өттү.

Ысык-Көлдө изделип жаткан эже-сиңди аман-эсен табылды

Ысык-Көлдө дайынсыз жоголгон эже-сиңди аман-эсен табылды. Бул тууралуу облустук ички иштер башкармалыгынын басма сөз кызматы билдирет.

Маалыматка ылайык, учурда Аделя жана Мырзайым Сапарахунова мыйзамдуу өкүлдөр менен бирге милиция бөлүмүндө, үйдөн чыгып кетүүнүн себептери жана шарттары аныкталууда.

Каракол шаардык ички иштер башкармалыгы жашы жете элек кыдарын жүргөн жерин аныктоого катышкан бардык жарандарга ыраазычылык билдирет.

Белгилей кетсек, бүгүн милицияга Каракол шаарынын 47 жаштагы тургуну кайрылып, кечээ, саат 10.00 чамасында анын жашы жете элек кыздары – 2005-жылы туулган Аделя Сапарахунова жана 2011-жылы туулган Мырзайым Сапарахунова үйдөн чыгып кеткен бойдон кайтып келишкен эместигин айткан.

Минск шаарындагы КМШ Өкмөт башчылар кеңешинин отурумунун жыйынтыгы боюнча бир катар документтерге кол коюлду

Кыргыз Республикасынын Министрлер Кабинетинин Төрагасы Улукбек Марипов катышкан Көз карандысыз мамлекеттер шериктештигине мүчө өлкөлөрдүн Өкмөт башчылар кеңешинин отурумунун жыйынтыгы боюнча бир катар документтерге кол коюлду. Бул тууралуу министрлер кабинетинин басма сөз кызматы билдирди.

КМШ мүчө мамлекеттердин Өкмөт башчылар тарабынан төмөндөгү документтерге кол коюлду:

–  Көзкарандысыз мамлекеттер шериктештигине мүчө мамлекеттердин Жугуштуу оорулардын жайылышына каршы туруу боюнча биргелешкен иш-аракеттеринин орто мөөнөттүү планы жөнүндө;

– Көзкарандысыз мамлекеттер шериктештигине мүчө мамлекеттердин аймактарын Санитардык жактан коргоо жаатында кызматташуу жөнүндө макулдашуу жөнүндө;

– Көзкарандысыз мамлекеттер шериктештигине мүчө мамлекеттердин калкын жумуштуулук менен камсыздоого көмөктөшүү жаатында кызматташуу жөнүндө макулдашуу жөнүндө;

– Туура эмес товардык белгилердин жана географиялык көрсөткүчтөрдүн колдонулушун алдын алуу жана ага бөгөт коюу боюнча КМШга мүчө мамлекеттердин кызматташтыгы жөнүндө макулдашуу жөнүндө;

– КМШга мүчө мамлекеттердеги мамлекеттик материалдык резервдерди башкаруучу мамлекеттик (аткаруу) бийлик органдарынын 2030-жылга чейинки мезгилдеги кызматташтыгынын концепциясы жана аны ишке ашыруунун негизги иш-чаралар планы жөнүндө;

– КМШга мүчө мамлекеттердин 2025-жылга чейинки шарп оорусунун алдын алуу жана ага каршы күрөшүү боюнча биргелешкен иш-чаралардын топтому жөнүндө;

– Шериктештикке мүчө мамлекеттердин геодезия, картография, кадастр жана жерди аралыктан зонддоо жаатындагы өз ара аракеттенүүсү жөнүндө 1992-жылдын 9-октябрындагы макулдашууга өзгөртүүлөрдү киргизүү тууралуу протокол жөнүндө;

– Көзкарандысыз мамлекеттер шериктештигине мүчө мамлекеттердин куралдуу күчтөрдүн офицерлерин ыкчам-стратегиялык даярдоо жаатындагы негизги уюму жөнүндө.

– Кадрдык дайындоолор жөнүндө.

Белгилесек, Көз карандысыз мамлекеттер шериктештигине мүчө өлкөлөрдүн Өкмөт башчылар кеңешинин жыйыны Беларусь Республикасынын Минск шаарында өткөн.

КМШ Өкмөт башчылар кеңешинин кезектеги жыйыны 2021-жылдын 12-ноябрында Бишкек шаарында өтөт.

Президент Садыр Жапаровдун Куралдуу күчтөр күнү менен куттуктоосу

Кыргыз Республикасынын Президенти Садыр Жапаров бүгүн, 29-майда өлкөнүн аскер кызматкерлерин жана ардагерлерин Куралдуу күчтөр күнү менен куттуктады. Бул тууралуу президенттин администрациясынын басма сөз кызматы билдирет.

Төмөндө Мамлекет башчысынын куттуктоосу:

«Жолдош жоокерлер, сержанттар, старшиналар жана прапорщиктер!

Жолдош офицерлер жана генералдар!

Куралдуу күчтөрдүн урматтуу ардагерлери!

Сиздерди Кыргыз Республикасынын Куралдуу күчтөрүнүн күнү менен куттуктайм!

Биздин армия — биздин ишенимдүү чебибиз. Өлкөбүз Куралдуу күчтөрдүн коргоосунда турат.

Кыргызстандын аскер күчтөрү мамлекеттин аймактык бүтүндүгүнө каршы жасалган ар кандай аракеттерди толугу менен токтотууга даяр! Биздин жоокерлердин тайманбастыгы жана эр жүрөктүүлүгү сырткы душмандардын мизин кайтарарына бекем ишенем.

Сиздердин мойнуңуздарга чоң жоопкерчилик жүктөлгөн. Дал ошол себептен мамлекеттин көз карандысыздыгын, аймактык бүтүндүгүн жана республикабыздын конституциялык түзүлүшүн ишенимдүү коргоо үчүн Куралдуу Күчтөрдүн аскердик потенциалын жогорулатышыбыз керек.

Биз эки багытка көңүл бурушубуз кажет. Биринчиден, армияны тоолуу шарттарда аскердик иш-аракеттерди жүргүзүү үчүн толук даярдалган жана технологиялык жактан жабдылган атайын бөлүктөрдүн принциби боюнча уюштуруу, экинчиден, чек ара аймактарында жашаган калктын мобилизациялык жогорку даярдыгын камсыз кылуу жана аскердик коркунучтарга, кол салууларга каршы олуттуу күчтөрдү топтоо үчүн элдик кошуундарды түзүүгө өтүү.

Мамлекеттин өзгөчө маанилүү жана приоритеттүү милдеттеринин бири аскер кызматчыларын социалдык жактан толук камсыз кылуу болуп саналат. Ошондой эле жогорку деңгээлдеги кесипкөй аскер кызматчыларынын социалдык статусун жана жашоо шарттарын жакшыртуу зарыл.

Мамлекет Куралдуу күчтөрдүн аскердик күжүрмөндүгүн андан ары бекемдөө үчүн бардык аракеттерин жумшайт.

Ардагерлердин жана ардагерлер уюмдарынын жаштарды аскердик-патриоттуулукка тарбиялоо боюнча ишмердигин баса белгилеп кетким келет. Урматтуу ардагерлер! Жаш офицерлер, сержанттар жана жоокерлер сиздерди карап түздөнөт. Сиздердин зор эмгегиңиздер, бай тажрыйбаңыздар жана чыдамдуулугуңуздар үчүн биз чексиз ыраазыбыз.

Мекенди коргоо — чыныгы эр-азаматтардын сыймыктуу милдети!

Биз сиздер менен сыймыктанабыз!

Сиздердин күжүрмөн эмгегиңиздердин аркасында бейпилдикте жашап, эртеңки келечегибизге ишенимдүү карайбыз! Кызматыңыздар үчүн рахмат айтабыз!».

Кыргызстанда дагы 356 адамдан коронавирус жана пневмония табылып, 9 бейтап каза болду

Бүгүн, 29-майга карата өлкөдө коронавирус жана пневмония илдетинин жаңы 356 учуру аныкталды. Бул тууралуу коронавируска каршы күрөшүү боюнча республикалык штаб билдирди.

Жаңы учурлар: Бишкек шаарынан – 162, Ош – 63, Чүй облусунан – 78, Ош облусунан – 10, Талас облусунан – 6, Нарын облусунан – 7, Ысык-Көл облусунан – 22, Жалал-Абад облусунан – 5, Баткен – 3. Ошентип, өлкөдө жалпысынан 104 222 адам ооруга чалдыккан.

Өткөн сутка ичинде 458 адам оорудан айыгып ооруканадан чыгарылган. Алардын жалпы саны 98 000 жетти.

Оорудан айыккандар: Бишкек шаарынан – 321, Ош шаарынан – 11, Чүй облусунан – 89, Ош облусунан – 4, Нарын облусунан – 4,  Ысык-Көл облусунан – 18, Жалал-Абад облусунан – 10, Баткен облусунан – 1.

Акыркы бир сутка ичинде коронавирустан каза болгондор: Бишкек шаарынан – 6, Чүй облусунан – 1, Ысык-Көл облусунан – 1, Баткен облусунан – 1. Илдеттен каза болгондордун жалпы саны 1797ге жетти.

Фото - Улукбек Марипов "Минск трактор заводуна" барды

Кыргыз Республикасынын Министрлер Кабинетинин Төрагасы Улукбек Марипов Беларусь Республикасынын Минск шаарына иш сапарынын алкагында Минск трактор заводуна барды. Бул тууралуу министрлер кабинетинин басма сөз кызматы билдирди.

Ал заводдо чыгарылып жаткан техниканын бир катар моделдери менен таанышты.

Улукбек Марипов биздин өлкөдө Беларус тракторлорунун таанымал экендигин белгилеп, мындан ары да кызматташууга ишенимин билдирди.

Андан кийин Улукбек Марипов 1941-1945-жылдардагы Улуу Ата Мекендик согуштун катышуучусу, Советтер Союзунун Баатыры Жумаш Асаналиевдин эстелигине гүл койду.

Ошондой эле Кыргыз Республикасынын Министрлер Кабинетинин Төрагасы Чынгыз Айтматов атындагы паркта болду.

ОшМЮИде «Кыргыз элинин руханий, адеп-ахлактык жана дене тарбиясынын баалуулуктары» аттуу биргелешкен чөлкөмдүк илимий-практикалык конференция өттү

Кечээ, 2021-жылдын 28-майында  Ош мамлекеттик юридикалык институтунда «Кыргыз элинин руханий, адеп-ахлактык жана дене тарбиясынын баалуулуктары» аттуу студенттер, магистранттар, аспиранттар менен ОПК биргелешкен чөлкөмдүк илимий-практикалык конференция уюштурулуп, өткөрүлдү. Конференция өз максатына жетүү үчүн төмөнкү негизги багыттарда иш алып барды:

  • Кыргыз элинин улуттук тарбиясынын идеалдары, руханий, адеп-ахлактык жана дене тарбиясынын  баалуулуктары.
  •  Азыркы жаштарда руханий, адеп-ахлактык, дене тарбия маселелерин өнүктүрүүнүн максаттары, милдеттери жана укуктук негиздери.
  •  Гуманитардык жана так илимдердин көйгөйлүү маселелери 

Конференцияга баардыгы болуп 125, а.и. 49 сырттан келген өкүлдөрдүн илимий докладдары катталган. Биргелешкен чөлкөмдүк илимий-практикалык конференцияга 63 ОПК, 6 аспирант, 6 магистрант жана 49 студент катталды. Аталган иш чаранын программасына ылайык студенттер, магистранттар, аспиранттар жаш илимпоздор, изденүүчүлөр, калыптанган окумуштуулар пленардык жана секциялык жыйындарда илимий баяндама жасашты. Конференцияда Баткен, Жалал-Абад, Ош облустарынын  жогорку окуу жайларынын өкүлдөрү, баяндамалардын  авторлору маани-маңызы бай өз табылгалары, олуттуу ойлору, омоктуу пикирлери, конструктивдүү сунуштары менен кызыктуу болгон илимий билдирүүлөрүн сунушташты. 

Конференциядагы мыкты баяндамачылар катарында Бабаева Х.С., Кеңешбек кызы Эльмира, Шералиев А.Ш. (БатМУ), Юлдашев К.К., Кудаярова Б.А., Аттокурова М., Сүйүнбаев Т., (К.Токтомаматов атындагы ЭАУ), Абдыманапова К.,  Маматалиев Д., Бекболот кызы Айчолпон (Б.Сыдыков атындагы КӨЭАУ), Калмурзаев Б.А., Алманбетов Ж.Т., Сайдинов Н.С. (ИИМ РОБ  ОФ), Кыбыева З.Ж., Молдоматов А.Т.,  Пирматов Э., Абдыкалыкова А. (ОшМЮИ) ж.б. атоого болот.

«Кыргыз элинин руханий, адеп-ахлактык жана дене тарбиясынын баалуулуктары» аттуу студенттер, магистранттар, аспиранттар менен ОПК биргелешкен чөлкөмдүк илимий-практикалык конференциянын катышуучулары өз ишинин акырында бир катар иштиктүү сунуштарды камтыган атайын резолюция кабыл алды.

Караколдо дайынсыз жоголгон эже-сиңди изделүүдө

Каракол шаардык милициясы жарандардан дайынсыз жоголгон жашы жете элек кыздарды издөөгө жардам сурайт. Бул тууралуу Ысык-Көл облусунун Ички иштер башкармалыгынын басма сөз кызматы билдирет.

Маалыматка ылайык, бүгүн,  29-майда Каракол ШИИБне 47 жаштагы тургун кайрылган. Анын айтымында, 28-майда саат 10:00 чамасында 2005-жылы туулган Аделя Сапарахунова жана 2011-жылы туулган Мырзайым Сапарахунова аттуу кыздары үйдөн чыгып кеткен бойдон кайтып келишкен эмес. Ошондой эле, улуу кызынын уюлдук телефону өчүк болгон.

Кыздардын белгилери: Аделдин бою 155-160 сантиметр, Мырзайымдыкы 130-140 сантиметр, экөө тең арыкчырай, чачтары кара, көздөрү кара.

Кийген кийимдери: Адель узун көйнөк, джинсы куртка, ак түстөгү кроссовка кийип жүргөн. Мырзайым – клетка көйнөк кийип жүргөн. Кыздар кыргыз жана орус тилдеринде эркин сүйлөшөт.

Милиция жашы жете элек балдарды тааныгандардан, алардын жүргөн жерин билгендерден Ички иштер башкармалыгына: 0392251380, 0392258413, 0701549102 же 102 телефондору аркылуу байланышууну өтүнөт.

Кыргыз-казак мамилелеринин актуалдуу маселелери талкууланды

Кечээ, 28-майда Кыргыз Республикасынын тышкы иштер министри Руслан Казакбаев Казакстан Республикасынын Премьер-министринин орун басары – тышкы иштер министри Мухтар Тлеуберди менен сүйлөшүүлөрдү өткөрдү. Бул тууралуу ТИМдин басма сөз кызматы билдирди.

Сүйлөшүүлөр Казакстан Республикасынын ТИМинин башчысы М.Тлеубердинин Кыргыз Республикасына болгон эки күндүк расмий сапарынын алкагында тар жана кенен форматта өттү.

Эки өлкөнүн тышкы саясий ведомстволорунун башчылары кыргыз-казак мамилелеринин саясий, соода-экономикалык, маданий-гуманитардык, регионалдык коопсуздук жана чек ара жаатындагы кызматташуудагы актуалдуу жана күнүмдүк маселелерин талкуулашты.

Министр Р.Казакбаев казакстан тарапка кыргыз-тажик чек арасында болгон кайгылуу окуя, Кыргыз Республикасы менен Тажикстан Республикасынын ортосундагы жогорку жана эң жогорку деңгээлдерде жетишилген келишимдердин деталдары жөнүндө маалымдады. Эки өлкөнүн укук коргоо органдарынын жана аткаруу бийликтеринин өкүлдөрүнөн турган жумушчу топтун тиешелүү турукташтыруу чараларын ишке ашыруу максатында жасаган биргелешкен аракеттерин белгиледи. Ошону менен бирге, Кыргызстан менен Тажикстандын ортосундагы жетишилген макулдашууларды сактоого кыргыз тараптын ниетин баса көрсөттү.

Өз кезегинде, Министр М.Тлеуберди боордош мамлекеттин жарандарынын курман болгондугу боюнча кыргыз элине көңүл айтып, кыргыз тараптын кыргыз-тажик мамлекеттик чек арасындагы куралдуу жаңжалды саясий-дипломатиялык каражаттар менен жөнгө салуу аракеттерин колдоду. Ошондой эле казак тарап бул маселени жөнгө салуу боюнча көмөк көрсөтүүгө даяр экендигин билдирди.

Кыргызстан менен Казакстандын тышкы иштер министрлери эки өлкө ортосундагы өз ара пайдалуу кызматташтыкты союздаштык мамилелер жана стратегиялык өнөктөштүк духунда мындан ары да тереңдетүүгө тараптар умтула тургандыгын баса белгилешти. Эки өлкөнүн мамлекеттеринин, парламенттеринин, өкмөттөрүнүн жана региондорунун башчыларынын деңгээлдеринде регулярдуу саясий жана экономикалык диалогдорду колдоого эки тарап тең кызыкдар экендигин билдиришти. Эл аралык уюмдардын жана регионалдык бирикмелердин алкагында өз ара аракеттенүү маселелери боюнча пикир алмашышты. Ошондой эле министрлер эки өлкөнүн мамлекеттеринин жана өкмөттөрүнүн башчыларынын деңгээлинде жетишилген келишимдерди ишке ашыруунун жүрүшүн карашты.

Тараптар Кыргызстан менен Казакстандын ишкерлери/айыл чарба өндүрүүчүлөрү жана керектөөчүлөрү үчүн жагымдуу шарттарды түзүүнүн маанилүүлүгүн белгилөө менен, өз ара соода байланыштарында болгон көйгөйлөрдү жоюу жана жүк ташуучуларды кыргыз-казак мамлекеттик чек арасынан тоскоолдуксуз өткөрүү зарыл экендигин белгилешти.

Кыргызстан менен Казакстандын тышкы саясий ведомстволорунун башчыларынын катышуусу менен ЖМКнын өкүлдөрү үчүн биргелешкен пресс-конференция өткөрүлдү.

Ошондой эле 2021-жылдын 29-майында расмий  сапардын алкагында Казакстан ТИМинин башчысы М.Тлеубердинин Кыргыз Республикасынын Президенти С.Жапаров, Жогорку Кеңешинин Төрагасы Т.Мамытов менен жолугушуулары, «Ата-Бейит» мемориалдык комплексине гүлчамбар коюу жана башка маданий иш-чаралар пландалган.

Президент Садыр Жапаровдун Баткен жана Ош облустарына иш сапары жыйынтыкталды

Кыргыз Республикасынын Президенти Садыр Жапаровдун Баткен жана Ош облустарына эки күндүк иш сапары жыйынтыкталды. Бул тууралуу президенттин администрациясынын басма сөз кызматы билдирет.

Иш сапарынын жүрүшүндө Мамлекет башчысы Баткен районунун чек ара аймагында жайгашкан айылдардын тургундары менен жолугушуп, аскер бөлүктөрүнөн кабар алды жана жергиликтүү тургундар, аскер кызматчылары менен баарлашты.

Ошондой эле, Президент Садыр Жапаров Ош шаарында Коргоо министрлигинин жана Улуттук коопсуздук комитетинин Чек ара кызматынын кызматчыларына батирлердин ачкычтарын тапшырды.

Меню