Author Archives: admin_kyrgyztoda

Евразия өкмөттөр аралык кеңешинин алкагында Кыргыз Республикасынын Премьер-министри Улукбек Мариповдун Россия Федерациясынын Өкмөтүнүн Төрагасы Михаил Мишустин менен кыскача пикир алышуусу орун алды. Бул тууралуу бүгүн, 5-февралда өкмөттүн басма сөз кызматы билдирет.

Тараптар эки тараптуу кызматташтыктын артыкчылыктуу багыттары боюнча пикир алмашты.

Михаил Мишустин Улукбек Мариповду Кыргыз Республикасынын Премьер-министри кызматына дайындалышы менен куттуктады.

Жалал-Абад облусундагы суу каптаган үйлөрдү куткаруучулар тазалоодо. Бул тууралуу бүгүн, 5-февралда КР ӨКМнын басма сөз кызматы билдирди.

Маалыматка караганда, Жалал-Абад облусунун Аксы районунда кечээ, 4-февраль күнү саат 14:55 чамасында Кербен шаарынын Беш-Батман каналында тос пайда болуп, суу ашып 11 турак үйдүн огороддорун, анын ичинен 4 турак үйдүн пай дубалынын аба өткөрүүчү тешиктеринен суу кирген.

Окуя болгон жерге КР ӨКМнин Аксы райондук №70 ӨКБдан 17 куткаруучу, жергиликтүү тургундардан 20 адам, райондук суу чарба башкармалыгынан 1 экскаватор жана мэриядан 1 экскаватор тартылган.

Тартылган күчтөрдүн жардамында каналдагы суунун нугу токтотулуп, 4 турак үй тазаланган.

Италья Республикасынын Президенти Серджо Маттарелла Садыр Жапаровду Кыргыз Республикасынын Президенти кызматына киришүүсү менен куттуктады. Бул тууралуу бүгүн, 5-февралда президенттик аппараттын басма сөз кызматы билдирет.

«Кыргызстан менен Италиянын ортосундагы достук мамилелерди эки тараптуу деңгээлде, ошондой эле Бишкек шаарынын, бүткүл Борбордук Азия аймагынын жана Европа Бирлигинин ортосундагы мамилелердин кеңири маанисинде мындан ары дагы бекемдөөгө үмүтүмдү билдирем», — деп айтылат куттуктоодо.

Кечээ, 4-февралда КРнын Пакистан Ислам Республикасындагы Атайын жана Ыйгарым укуктуу элчиси Э.Бейшембиев Пакистан Ислам Республикасынын Тышкы иштер министринин орун басары М.А.А.Куреши менен жолугушту. Бул тууралуу ТИМдин басма сөз кызматы билдирди.

Маалыматка караганда. маектешүүнүн жүрүшүндө тараптар эки тараптуу мамилелердин актуалдуу маселелерин, анын ичинде парламенттер аралык деңгээлде жана эки өлкөнүн мамлекеттик органдарынын линиясы боюнча иш-сапарлар менен алмашуу, Covid-19га байланыштуу Пакистандын Кыргызстанга гуманитардык жардам көрсөтүү мүмкүнчүлүгү, соода-экономикалык жана илимий-техникалык кызматташуу боюнча кыргыз-пакистан өкмөттөр аралык комиссиясынын кезектеги жыйынын өткөрүү, ошондой эле Кыргыз Республикасынын медициналык жогорку окуу жайларын Пакистандын медициналык комиссиясынын “кара тизмесинен” чыгаруу маселелерин талкуулашкан.

КРнын элчиси Э.Бейшембиев болуп өткөн КРнын Президентинин  шайлоосунун жана мамлекеттик түзүлүш жөнүндө референдумдун жыйынтыктары, Кыргыз Республикасынын Өкмөтүнүн жаңы курамын бекитүү, Кыргызстандын инвестициялык климаты, экономикалык жана туристтик потенциалы боюнча маалымат берип, пакистандык тарапка Борбордук Азиянын, ЕАЭБдин жана ЕБтин рынокторуна товарларды өндүрүү жана экспорттоо максатында ишканаларды түзүү үчүн Кыргызстандын транзиттик жана соода-экономикалык мүмкүнчүлүктөрүн жигердүү пайдаланууну сунуш кылган.

Токмок шаарынан уюшкан кылмыштуу топтун мүчөсү кармалып, жанынан “Макаров” тапанчасы жана октору алынды. Бул тууралуу бүгүн, 5-февралда Чүй ОИИББынын басма сөз кызматы билдирди.

Маалыматка караганда, Чүй облусунун ИИББдүн криминалдык милиция кызматынын уюшкан кылмыштуулукка каршы күрөшүү бөлүмү тарабынан Токмок шаарынын жашоочусунун бири мыйзамсыз ок атуучу курал сактап жүргөндүгү тууралуу ыкчам маалымат алышкан.

Бул окуя кылмыштардын жана жоруктардын бирдиктүү реестрине Кыргыз Республикасынын Жазык кодексинин 253-беренеси (Куралды, ок-дарыларды мыйзамсыз жүгүртүү) боюнча катталып, сотко чейинки өндүрүш иштери башталган. Кызматкерлер тарабынан жүргүзүлгөн бир катар ыкчам иш-чаралардын натыйжасында, анын өздүгү аныкталган.

4-февраль күнү Чүй облусунун ИИББдүн КМКнын уюшкан кылмыштуулукка каршы күрөшүү кызматы, Токмок шаарынын ИИБдүн криминалдык милиция кызматы жана ИИМдин “Шумкар” атайын багыттагы полкунун Чүй облусу боюнча атайын отрядынын кызматкерлеринин катышуусунда Токмок шаарынан 1975-жылы туулган А.Б. кармалган. Кароо жүргүзүү учурунда, жанынан номери өчүрүлгөн “Макаров” үлгүсүндөгү тапанча, 5 огу жана колго жасалган бычак алынган.

Кармалган жаран мурда бир нече жолу соттолуп, «Точка» каймана аталып, крим чөйрөдө «смотрящий» жана «положенец» статусуна ээ болуп, КР ИИМдин ыкчам алдын алуу боюнча каттосунда уюшкан кылмыштуу топтун мүчөсү катары турганы аныкталган.

Маалымат катары белгилеп коюучу жагдай, кармалган жаран буга чейин тоноо, ууроо, опуза талап кылуу жана мыйзамсыз баңгизатын сактоо беренелери менен бир нече жолу соттолгон.

Учурда Токмок шаарынын ИИБдүн убактылуу кармоочу жайына камакка алынган. Сотко чейинки өндүрүш иштери улантылууда.

Жалал-Абад облусунда профилактикалык иштер уланууда. Бул тууралуу бүгүн, 5-февралда Жалал-Абад ОИИБдин басма сөз кызматы билдирди.

Маалыматка караганда, Чаткал РИИБдин жана социалдык коргоо бөлүмүнүн кызматкерлери район аймагында өспүрүмдөргө карата зордук-зомбулуктун алдын алуу максатында профилактикалык иштерди жүргүзүшкөн. Алар тоголок жетим балдар менен да маектешип, алардын көйгөйлүү маселелерин жеринде талкуулашкан.

Ошондой эле кылмыштуулукту болтурбоо багытында мектеп окуучулары менен жолугушуулар өткөрүлүп, аларга терс көрүнүштөрдөн алыс болуу керектиги эскертилген.

“Ала-Бука жана Ноокен РИИБдеринин кызматкерлери милициянын көчмө кабылдама унаасы менен айыл аралашып, жергиликтүү тургундардын кайрылууларын кабыл алып жатышат. Чек арага жакын жайгашкан айыл элдери менен жолугушуулар өткөрүлүп, мал жандыктарына сак болуу керектиги жеткирилди. Ошондой эле жашы жете элек балдарды ар дайым көзөмөлдөө жана татыктуу тарбия берүү зарылдыгы белгиленди”,- деп айтылат билдирүүдө.

Багдат Бактыбаев.

Жамбыл облусунун Шу шаардык соту жарандык активист Багдат Бактыбаевди “тыюу салынган уюмдун ишине аралашты” жана “мыйзамсыз маңзат сактады” деген айып менен эркиндигин эки жылга чектеди.

Сот 46 жаштагы активисттин “уруксат бирилбеген жыйындарга”, митингдерге, акцияларга катышуусуна тыюу салды. Ал жазасы аяктаганга чейин соцтармактарга билдирүү же комментарий да жаза албайт. Мессенжер колдонбойт. Шу районуну аймагынан чыгар алдында тиешелүү органдарга эскертүү берүүгө милдеттүү болот.

Өкүмдө эгер бул талаптар аткарылбаса, анын шарттуу жаза мөөнөтү түрмө менен алмаштырылышы мүмкүн экени жазылган.

Багдат Бактыбаев 2020-жылы 2-октябрда тыюу салынган уюмдун ишине катышуу (“Көчө партиясы”) айыбы менен кармалган.

Казакстандык укук коргоочулар Бактыбаевди саясий туткундардын тизмесине кошушкан.

Казак укук коргоочуларынын маалыматына караганда, ушул тапта өлкөдө 110 киши “Казакстандын демократиялык тандоосу” жана “Көчө партиясы” уюмдарынын ишине катышуу, экстремисттик топ түзүү же ага катышуу айыбы менен камакта отурат.

Булак: “Борбор Азия жаңылыктар кызматы”