Menu

ВИДЕО

Видео - Садыр Жапаровдун кудалыкка барган видеосу тарады

28-мартта президент Садыр Жапаровдун уулу Ренат үйлөндү. Социалдык тармактарда Садыр Жапаровдун кудалыкка барган видеосу тарады.

Анда кудаларды тааныштырып жаткан Сабыр Жапаров Ренат Садыр Жапаровдун үй-бүлөсүнө таандык экенин айтты.

“Кудаңар президент. Балабызды өстүргөн, ушулардын үйүндө өскөн. Бала ушуларга таандык”, – деди ал.

Белгилей кетсек, Ренат 1997-жылы туулган. Келиндин аты Аяна, 21 жашта. Учурда Улуттук университеттин кытай факультетинде үчүнчү курста окуйт. Ренат менен Аяна көп жылдардан бери кыз-жигит болуп сүйлөшүп келишкен.

Ренат Садыр Жапаровдун бир тууган агасы Эркин Жапаровдун уулу. Агасы жол кырсыгынан каза болгондон кийин Садыр Жапаров Ренатты багып алган.

Видео - Ошто 26 жаштагы кыз бийик зоодон секирип, өз жанын кыйды

Кара-Суу районунун Төлөйкөн айылында 26 жаштагы кыз өз жанын кыйды. Бул тууралуу Ош ОИИБнен кабарлашты.

Маалыматка ылайык, кечээ, 25-мартта милициянын нөөмөт бөлүмүнө Кара-Суу районунун Төлөйкөн айыл аймагында орун алган Дача участкасында белгисиз адам бийиктиктен өзүн-өзү боюн таштап каза болгондугу тууралуу маалымат түшкөн.

Факт КЖБРге КР Кылмыш-жаза кодексинин 136-беренеси “Өзүн-өзү өлтүрүүгө жеткирүү” боюнча катталган.

Маалыматка ылайык,  26 жаштагы З.Т.Э 25-мартта кечки саат бештер чамасында Кара-Суу районунун Төлөйкөн айылындагы Дача участкасында жайгашкан көпүрөдөн боюн таштап, өзүн-өзү өлтүргөн. Ал Россиянын жараны, улуту боюнча кыргыз. Ошко 24-мартта саат 4:30да Москвадан келген. Тергөө иштери жүрүп жатат.

Кыз кулаган учурда тартылган видео соцтармактарга тарады. Ал бутка жип байлап атайын секирүү үчүн курулган «тарзанка» аттракционунан кулаган.

Видео - Баткендин кичинекей тургуну чек ара маселесин чечип берүүнү суранып Садыр Жапаровго кайрылды

Баткен облусуна караштуу Көк-Таш айылынын Адил аттуу кичинекей тургуну президент Садыр Жапаровго кайрылуу жасады. Баланын видеокайрылуусу социалдык тармактарда жарыяланды.

Ал үйү Тажикстандын чек арасына аябай жакын болгондуктан, коркуп, жашай албай жатканын айтат. Ал президенттен кыргыз-тажик  чек ара маселесин чечип берүүнү суранды.

«Урматтуу Садыр Жапаров, менин атым Адил. Мен Баткен облусундагы Көк-Таш айылынан болом. Былтыр менин үйүмдү өрттөп кетишкен. Мен бул жакта жашаштан корком. Анткени, үйдөн эки метр алыс жерде тажик чек арасы жайгашкан. Бул жерде жашаш аябай кооптуу болуп калды. Сизден чек ара маселесин чечип берүүнү суранам», — деди ал.

Видео - "Чоң казат" кыймылынын лидери алмашты

Бүгүн, 22-мартта революционер Бакай Кашкарбаев видеокайрылуу жасап, “Чоң казат” кыймылынын лидери алмашканын билдирди.

“Урматтуу мекендештер! Доор алмашат, ситуация алмашат. Ошол ситуацияга жараша баары өзгөрүп турат. Ошол улуу кыймылдын, улуу жолдун жаңы лидери мына, Актан деген бир тууганыбыз шайланды. Мындан ары “Чоң казат” кыймылынын лидери Актан баатыр деп тааныгыла. Актанга Кудай күч-кубат берсин, жемкорлордун, коррупционерлердин үйүнө жеткиче биз токтобойбуз”, – деп тааныштырды Бакай Кашкарбаев.

Эсиңиздерге сала кетсек, буга чейин “Чоң казат” кыймылынын лидерлери болуп экс-чиновниктер Сыймык Жапыкеев менен Максат Мамыткановдор саналышкан.

Видео - Грек-рим күрөшү боюнча Бишкектин биринчилигинде “Беш сары” спорт клубунун балбандары жеңишке жетишти

Кечээ, 21-мартта Бишкек шаарында  грек-рим күрөшү боюнча өспүрүмдөр арасындагы биринчилик өттү. Ал мелдешке жалпысынан 180 балбан катышты.

Бул биринчиликтен уткан балбандар эл аралык мелдештерге жана Кыргызстандын грек-рим күрөшү боюнча чемпионатына жолдомолорду утуп алышты.

Ошондой эле бул биринчиликтин натыйжалары менен мыкты балбандардын катышуусунда грек-рим күрөшү боюнча Бишкек шаардык курама командасы түзүлдү.

Бул мелдеште “Беш сары” спорт клубунун балбаны Өскөнбаев Алишер биринчи орунду жеңип алды. Муратбек уулу Саид  51 кг салмактагылардын арасында 2-орунга татыды.  Дастан Эсенгулов 55 кг салмактагылардын арасында 3-орунга ээ болду.

Эсиңиздерге сала кетсек, “Беш сары” спорт клубун депутат Камчыбек Жолдошбаев негиздеп, каржылап келе жатат.

 

Видео - Таластын тургуну: "Жер үй алтын кенин Атамбаев менен Темир Сариев 2015-жылы ит бекер сатышкан, эми Садыр Жапаров оңдой албайт"

“Жер үй алтын кенин 2015-жылы президент Алмаз Атамбаев менен премьер-министр Темир Сариев ит бекер сатышкан. Ошондо биз чыгып каршылык көрсөтсөк, бизге каршы кылмыш иштерин козгоп, куугунтуктап, айрымдары качып кутулду, айрымдары өлүп кутулду”, – деп билдирди Таластык активисттердин бири.

“Эми бизди “торпеда” кылбагыла, Атамбаев менен Темир Сариев бизди куугунтуктаганда катын-бала, үй-бүлөбүз кыйналды, ата-энебиз оруулуу болду, урук-туугандарыбыз кыйналды, өзүбүз жалгыз калдык… Биздин эл өзү ушундай эл экен. Биздин айылдан эле Атамбаев 12 кишини камады. Жер үй кетти, эми эч ким эч нерсе кыла албайт. Убагында, Атамбаев менен Сариев сатып жатканда көтөрүлүш керек болчу. Эми Садыр Жапаров оңдой албайт, оңдош үчүн биз аны колдошубуз керек, ошондо президент оңдойт, биз колдобосок президент оңдой албайт…”, – деди активист.

 

Видео - Кумтөр алтын кени боюнча мамлекеттик комиссия: "Кумтөрдө" дагы 180 тоннадан ашык таза алтын бар

Кумтөр алтын кенинин ишмердүүлүгүн текшерүү боюнча түзүлгөн мамлекеттик комиссия өндүрүш жайынын абалы менен жеринде таанышты. Бул тууралу  парламенттин басма сөз кызматы билдирет.

Белгилей кетсек, Кыргызстанда эле эмес, дүйнөдөгү ири кендердин бири саналган Кумтөр алтын кенин иштетүү максатында 1992-жылы Канаданын Торонто шаарында кыргыз өкмөтү “Камеко” корпорациясы менен Башкы макулдашууга кол койгон. Тилекке каршы, кен жайы иштеп баштагандан бери ар кандай талаш-тартыштар менен катар келишимдердеги мүчүлүштүктөр тууралуу ызы-чуу токтобой келет. Ага ылайык, алтын өндүрүшүн иликтөө багытында бир нече комиссиялар түзүлгөн.  Тагыраагы, 2007-жылы парламенттик жана өкмөттүк комиссия, ал эми 2012-жылы учурдагы мамлекет башчы Садыр Жапаров жетекчилик кылган депутаттык жана мамлекеттик комиссия иликтөө жүргүзгөн. Депутат Акылбек Жапаровдун ырастоосунда ошол учурда  Жогорку Кенештин токтому кабыл алынып, бирок чечимдер толук аткарылбай калган. Андыктан, тиешелүү комиссиялардын буга чейинки  чыгарган бардык чечимдерин кайрадан карап, алардын аткарылышын көзөмөлдөө багытында 2021-жылдын 17-февралында жаңы мамлекеттик комиссия ишин баштады.

Бийиктиги  3600-4200 метрге чейинки алкакта жайгашкан “Кумтөр Голд Компани” ишканасында 4100дөн ашуун адам иштейт. Алардын 98,5%ы Кыргызстандын жарандары. Андан тышкары, комиссия барган учурда компанияда иштеген чет элдик адистерди ырааттуу түрдө жергиликтүү кадрлар менен алмаштыруу аракети жигердүү жүргүзүлүп жатканы айтылды.

Өндүрүштөгү иш процесси менен таанышкан комиссия мүчөлөрү бир катар сунуштарга токтолушту. Алсак, депутат Эрмамат Тагаев бир нөөмөттө 12-18 саат иштеген жумушчулардын иш убактысын 6 саатка кыскартууну сунуштап, кызматкерлердин саламаттыгы башкы орунда экенин жүйө келтирди. Ал эми депутат Рыскелди Момбеков кен казуу аймагында мөңгүлөргө аяр мамиле жасоо маселесин көтөрдү. Анткени, ал жердеги беш мөңгүнүн экөө гана толугу менен таза турат.

Андан сырткары комиссия төрагасы Акылбек Жапаров уулуу заттарды сактоо, компанияда иштегендердин эмгек акысын, жөлөк пулдарын толук чегерүү, алардын саламаттыгына кам көрүү, саркынды сууларды сакталуучу жайды коопсуз кармоо маселелерине байланышкан сунуштарды берди. Ошондой эле депутат Айнуру Алтыбаева кенди калктын келечеги үчүн пайдалангыдай иштетүү керектигин белгилесе, депутат Ныязбек Арзыбаев бардык кен жана шахталарды иштетүүгө бирдиктүү салык системасын киргизүү зарылчылыгына токтолду.

Депутат Каныбек Иманалиев болсо саркынды сууларда калган болжолдуу 106 тонна алтынды кайрадан иштеп чыгуу керектигин билдирип, бул жаатта жаңы тендер өткөрүү мүмкүнчүгү бар экенин кошумчалады. “Мамлекеттик комиссиянын ишинин жыйынтыгы менен алтын өндүрүшүнүн жаңы формуласын иштеп чыгышыбыз керек”, – деди эл өкүлү.

Эскерте кетсек,  Кыргызстан Кумтөрдү иштетүү ишканасында 26% үлүшкө ээ. Аталган мекеме 2020-жылы мамлекеттик бюджетке салыктар жана милдеттүү төлөмдөр түрүндө 15,3 миллиард сом которгон. Адистердин айтымында, 500 миң тоннага чейин топурак казылып, 18 миң тоннасы иштетүүгө жөнөтүлгөндөн кийин, күнүнө таза 31 кг алтын алынат.

 

Видео - УКТнын мүчөсү өзүн-өзү өлтүрүүгө жеткирүү фактысы боюнча кармалды

Өзүн-өзү өлтүрүүгө жеткирүү фактысы боюнча иликтөө жүрүп жатат. Бул тууралуу бүгүн, 18-мартта ИИМдин басма сөз кызматы билдирди.

Аллардын айтымында, 2021-жылдын март айынын ортосунда ички иштер органдарына арыз келип түшүп, анда мурда бир нече жолу соттолгон адам аялды өзүн-өзү өлтүрүүгө жеткирген факты боюнча тиешелүү чараларды көрүп берүүлөрүн суранышкан. Арызында чала тааныш адам аялдын ишенимине кирип,  анын баасы 5000 АКШ доллары турган “Тайота” үлгүсүндөгү автоунаасын сатууга көндүрүп, акча каражатын карызга алган.

Андан соң, башында эле карызга алган акча каражатын кайтарып берүүнүн ордуна аны ар дайым аңдып, өлтүрөм деп коркутуп, стресстик абалга жеткирген. Анын кесепетинен аял өзүн-өзү өлтүрүүгө аракет жасаган.

Бул факты КЖБРге катталып, Октябрь РИИБдин Тергөө кызматы КР Жазык кодексинин 136-беренеси (өзүн-өзү өлтүрүүгө
жеткирүү) сотко чейинки өндүрүштү баштаган.

Ыкчам-тергөө иштерине ИИМдин Криминалдык милиция кызматы дагы тартылган.

Жакында, ИИМдин Криминалдык милиция кызматынын Үчүнчү башкармалыгынын кызматкерлери тарабынан көрүлгөн тиешелүү чаралардын натыйжасында жогорудагы кылмыш ишине тиешеси бар адамдын өздүгү такталып кармалды.

Кармалган жаран мурда соттолгон Ош облусунун Кара-Суу районунун тургуну 1983-жылы туулган М.К. болот. Алынган маалымат боюнча  ал уюшкан кылмыштуу топтун мүчөсү катары ИИМдин ыкчам каттоосунда  турат.

Иликтөө жүрүп жатат.

Видео - "Замандаш" партиясынын мурунку жетекчиси Жеңиш Молдокматовдун кеңсесине тинтүү жүргүзүлдү

Бүгүн, 16-мартта укук коргоо кызматкерлери саясатчы Жеңиш Молдокматовдун иш бөлмөсүндө тинтүү жүргүзүштү. Бул тууралуу видеотасманы экс-замандашчы Facebook баракчасына өзү жарыялады.

Кеңсеге бет кап кийген бир нече адам келгенден кийин, саясатчы Facebook баракчасы аркылуу түз эфирге чыгып, окуяны видеого тарта баштаган. Бирок укук коргоочулар ага тергөөнүн купуялуулугун айтып, видеого тартууга тыюу салышкан.

Жеңиш Молдокматовдун айтымында, тинтүү “Ханституцияга каршы” борборунун мүчөсү Тилекмат Күрөновго козголгон кылмыш ишине байланыштуу болду.

Белгилей кетсек, кечээ, 15-мартта жарандык активист Тилекмат Куренов кармалып, 48 саатка камалган. Белгилүү болгондой, укук коргоо кызматкерлери активисттин Facebook социалдык тармагындагы постторунан бийликти басып алуу боюнча чакырыктарды тапкан. Кандай билдирүүлөр жөнүндө сөз болуп жатканы азырынча белгисиз. Кийинчерээк анын үйү тинтүүгө алынган.

Жеңиш Молдокматов менен Тилекмат Күрөнов 9-мартта Ак үйдүн жанында Конституциянын жаңы редакциясына каршы митингдин уюштуруучулары болушкан.

Акыркы күндөрү активист Тилекмат Күрөнов социалдык тармактардан президентти кызматтан кетирүү чакырыгын байма-бай айтып калган.

Видео - Бишкекте УКТнын мүчөсү ээнбаштыкка жана киши урдоого шектелип кармалды

ИИМдин КМКнын Үчүнчү башкармалыгынын кызматкерлери ээнбаштыкка жана киши урдоого шектүү жаранды кармашты. Бул тууралуу ИИМдин басма сөз кызматыбилдирди.

2021-жылдын 27-январь күнү  саат 23.00  чамасында 1993-жылы туулган  М. М.  шериктештери менен алдын-ала  сүйлөшүү боюнча  адамдардын тобун түзүшүп, ээнбаштык  жасоого  багытталган кылмыштуу  кыймыл-аракеттерин ишке  ашырууну көздөшүп,  “Тойота-Эстима” үлгүсүндөгү автоунаа менен  Бакай-Ата районунун айылдарынын биринде жашаган Ж. уулу Б. аттуу жергиликтүү тургундун үйүнө барышып, үйүнөн  аны  жана анын үйүндө болгон  К. Чны чакырып чыгышып, ошол эле айылдын  көчөсүнөн зомбулук көрсөтүп, физикалык күч колдонуп сабап, андан ары аларды  автоунаага салып Таластын токойуна алып барып сабашып, денесине жаракат
келтиришкен.

Бул факт 2021-жылдын 27- январь күнү  Талас облусунун Бакай-Ата РИИБнүн КЖБРне катталып, Кыргыз Республикасынын Жазык кодексинин  170-берене  (киши уурдоо) менен 266-беренеси (ээнбаштык)   боюнча сотко чейинки өндүрүш иши башталган. Тергөөнүн жүрүшүндө жогорудагы кылмышка тиешеси бар үч жаран кармалып убактылуу кармоочу жайга киргизилген.  Ал эми М.М. карата 2021-жылдын 6-февралында  издөө иши ачылган.

2021-жылдын 12-мартында жүргүзүлгөн ыкчам иш-аракеттердин натыйжасында, Кыргыз Республикасынын ИИМдин Криминалдык милиция кызматынын Үчүнчү башкармалыгынын Уюшкан кылмыштуулукка каршылык көрсөтүү бөлүмүнүн кызматкерлери  тарабынан Бакай-Ата районунун жашоочусу 1993-жылы туулган М. М. Бишкек шаарынын  Батыш автобекетинен кармалып, Талас облусунун Бакай-Ата РИИБнө жеткирилди.

ИИМдин Криминалдык милиция кызматынын маалыматы 1993-жылы туулган М. М. уюшкан кылмыштуу топтун мүчөсү катары ИИМдин ыкчам каттоосунда турат.

Учурда иликтөө иштери уланып жатат.

Меню