Menu

ДҮЙНӨ ЖҮЗҮНДӨ

Орусия президентинин басма сөз катчысы Дмитрий Песков менен премьер-министр Михаил Мишустиндин уулдары аскерге мобилизациялоого баруудан баш тартышты

Шаршембиде “Популярная политика” YouTube-каналынын алып баруучулары Орусия Федерациясынын жогорку кызматтагы аткаминерлеринин жакын туугандары делген бир нече кишиге түз эфирде чалган.

Алып баруучу өзүн аскердик комиссариаттын кызматкеримин деп тааныштырып, маектештерине мобилизация жараянына тартылууга чакырган.

Орусия президентинин басма сөз катчысы Дмитрий Песковдун уулу Николай катары тааныштырылган абонент аскердик комиссариатка келүүдөн баш тарткан.

“Сиз менин Песков мырза экенимди билсеңиз, менин ал жерге барышым канчалык туура эмес экенин түшүнүшүңүз керек”, -деген ал маселени башка деңгээлде чечүүгө убада берген.

Владимир Путиндин басма сөз катчысы Дмитрий Песков уулу Николай “жалгыз туура тандоону” жасоодон баш тартканына ишенбей турганын айтып, анын сөзү бурмаланганын билдирди. Бирок чалуу түз эфирде көрсөтүлгөн.

Орусиянын премьер-министри Михаил Мишустиндин уулу катары тааныштырылган абонент Алексей Мишустин мобилизацияга кирбей турганын, себеби Жогорку экономика мектебинде магистратурада окуп жатканын айткан. Ошол эле маалда ал согушууга ниети жоктугун жана өз билими менен алектенүүнү каалай турганын кошумчалаган.

Росгвардиянын башчысы Виктор Золотовдун небереси Артём Чечихин ушул тапта аскерде кызмат өтөп жатканын жана командир койгон тапшырмаларды аткарууга даяр экенин, бирок аскердик келишимге кол койбой турганын айткан.

21-сентябрда Орусиянын президенти Владимир Путин жарым-жартылай мобилизация жарыялады. Мунун алкагында согушка запастагы жоокерлер тартылары кабарланган. Коргоо министри Сергей Шойгу мобилизация жарлыгынын алкагында 300 миңдей адам аскерге тартыларын айтып, бул мындан ары да пландуу улантыларын билдирген.

Өзбекстандын Башкы прокуратурасы: Россиянын куралдуу күчтөрүнө кошулуп, Украинага каршы согушкандар 10 жылга чейин соттолот

Орусияда жарым-жартылай аскердик мобилизация башталгандан кийин Өзбекстандын Башкы прокуратурасы өзбек мигранттарына чет өлкөлүк армиянын катарында согушка катышуу үчүн 10 жылга чейин эркинен ажыратуу жазасы бар экенин эскертти.

Мекеменин билдирүүсүндө Өзбекстандын Кылмыш кодексинин 154-беренесинин биринчи бөлүмүндө согуштук аракеттерге катышуу үчүн жалдангандарга беш жылдан 10 жылга чейин эркинен ажыратуу жазасы каралганы белгиленген.

Аталган беренеде башка мамлекеттердин армиясында, коопсуздук кызматтарында, полициясында, аскердик юстициясында же башка органдарында кызмат өтөгөн Өзбекстандын жараны 300 базалык эсептик көрсөткүч өлчөмүндө айып пул төлөп же үч жыл коомдук жумуштарды аткарууга милдеттендириле турганы жазылган. Эгер жаран аталган чет өлкөлүк түзүмдөргө жалданма болсо беш жылга чейин эркинен ажыратылат.

“Мындан улам чет өлкөлөрдө жашаган өзбек жарандарын куралдуу күчтөрдүн катарына кошулбоого, аскердик аракеттерге катышпоого чакырабыз. Мындай аракеттер үчүн кылмыш жоопкерчилиги каралган”, – деп жазылган Башкы прокуратуранын билдирүүсүндө.

21-сентябрь күнү эртең менен Орусиянын президенти Владимир Путин өлкөдө жарым-жартылай мобилизация жарыяланганын билдирген. Путиндин артынан эле мамлекеттик медиаларга маек курган Орусиянын коргоо министри Сергей Шойгу мобилизациянын алкагында 300 миңдей адам аскерге тартыларын айтты. Министр армияга негизинен запастагылар жана аскердик кызматтан өткөндөр чакырыларын, алар кошумча даярдыктан өткөрүлөрүн кошумчалады.

20-сентябрда Мамлекеттик дума өлкөнүн Кылмыш-жаза кодексин “мобилизация”, “аскердик абал”, “аскердик мезгил” деген түшүнүктөр менен толуктап, дезертирлердин жазасын катуулата турган, өз ыктыяры менен туткунга түшкөндөргө, талап-тоноочулукка баргандарга жана коргонуу тармагындагы мамлекеттик буйрукту аткаруудан баш тарткандарга жаза мөөнөттөрүн аныктаган. Анда бул мобилизацияга даярдык катары сыпатталган.

Орусия Украинага кол салгандан бери көптөгөн аскердик эксперттер Владимир Путин армиянын алдына койгон максаттарга кошумча мобилизациясыз жетүү мүмкүн эмес экенин айтып келишкен. Кремль буга чейин бир нече жолу жалпы мобилизация жарыяланбай турганын билдирген.

Орусияда аскердик мобилизацияга каршы акцияларда 1400дөн ашык киши кармалды

Орусиянын Москва жана Санкт-Петербург шаарларында өткөн мобилизацияга каршы акцияларда жүздөгөн киши кармалды.

Москвада Старый Арбатка, Санкт-Петербургда Исаакиев соборунун алдына чогулгандар “Балдарыбызга жашоо”, “Путинди окопко” жана “Согушка каршыбыз” деп кыйкырышты.

“ОВД-Инфо” укук коргоо уюмунун Москва убактысы боюнча саат 01:00гө карата жарыялаган маалыматына ылайык, Санкт-Петербургда мобилизацияга каршы акцияга чыккан 537, Москвада 535 киши кармалды. 21-сентябрда мындай акциялар Орусиянын 38 шаарында өтүп, өлкө боюнча кармалгандардын жалпы саны 1410 жетти.

21-сентябрь күнү эртең менен Орусиянын президенти Владимир Путин өлкөдө жарым-жартылай мобилизация жарыяланганын билдирген. Путиндин артынан эле мамлекеттик медиаларга маек курган Орусиянын коргоо министри Сергей Шойгу мобилизациянын алкагында 300 миңдей адам аскерге тартыларын айтты. Министр армияга негизинен запастагылар жана аскердик кызматтан өткөндөр чакырыларын, алар кошумча даярдыктан өткөрүлөрүн кошумчалады.

20-сентябрда Мамлекеттик дума өлкөнүн Кылмыш-жаза кодексин “мобилизация”, “аскердик абал”, “аскердик мезгил” деген түшүнүктөр менен толуктап, дезертирлердин жазасын катуулата турган, өз ыктыяры менен туткунга түшкөндөргө, талап-тоноочулукка баргандарга жана коргонуу тармагындагы мамлекеттик буйрукту аткаруудан баш тарткандарга жаза мөөнөттөрүн аныктаган. Анда бул мобилизацияга даярдык катары сыпатталган.

Орусия Украинага кол салгандан бери көптөгөн аскердик эксперттер Владимир Путин армиянын алдына койгон максаттарга кошумча мобилизациясыз жетүү мүмкүн эмес экенин айтып келишкен. Кремль буга чейин бир нече жолу жалпы мобилизация жарыяланбай турганын билдирген.

Садыр Жапаров Түркиянын Президенти Режеп Тайып Эрдоган менен жолугушту

Кыргыз Республикасынын Президенти Садыр Жапаров Нью-Йорк шаарында (АКШ) өтүп жаткан БУУнун Башкы ассамблеясынын 77-сессиясынын алкагында Түркия Республикасынын Президенти Режеп Тайып Эрдоган менен жолугушту.

Мамлекет башчылары эки жана көп тараптуу кыргыз-түрк кызматташтыгынын учурдагы абалы менен келечегин жана өз ара аракеттенүүнүн башка актуалдуу маселелерин талкуулашты.
Мындан тышкары, кыргыз-тажик мамлекеттик чек арасындагы соңку каргашалуу окуяларга байланыштуу пикир алмашышты.

Президент Садыр Жапаров тажик тарап Кыргызстандын чек арасына аскерлерин алдын ала алып чыгып, куралдуу күчтөрүн жана оор аскердик техникасын колдонуу менен Кыргызстандын аймагындагы чек ара жана жарандык объектилерге, калктуу конуштарга чыккынчылык менен кол салганын баса белгиледи. Ошол эле учурда ал күжүрмөн аракеттер кыргыз аймагында болгонун баса белгиледи.

Садыр Жапаров тажик тараптан түзүлгөн кырдаал карапайым калк арасында, аскер кызматкерлеринин арасында орду толгус жоготууларга алып келгенине, аскердик жана жарандык инфратүзүмгө олуттуу зыян келтиргенине көңүл бурду.

Режеп Тайып Эрдоган Садыр Жапаровго адамдар курман болгонуна байланыштуу терең кайгыруу менен көңүл айтып, жабыркагандардын тезирээк сакайып кетишин каалады.

Өлкө лидерлери өз ара кызыкчылык туудурган бардык багыттар боюнча активдүү кызматташууну улантууну макулдашышты.

Путин Орусияда ата мекенди коргоо үчүн жарым-жартылай аскердик мобилизация башталганын билдирди

Орусиянын президенти Владимир Путин 21-сентябрда эртең менен орусиялыктарга кайрылып, өлкөдө жарым-жартылай аскердик мобилизация башталганын билдирди.

“Ата мекенибизди коргоо жана анын бүтүндүгү үчүн жарым-жартылай мобилизациялоону колдоо зарыл деп эсептейм”, – деди президент.

Путин шаршемби күнү кол койгон тиешелүү жарлыкка ылайык, армияга аскердик кызмат өтөгөн запастагы жарандар гана чакырылат. Аларга келишимдик негизде кызмат өтөгөн аскерлердин макамы, төлөмдөр жана социалдык кепилдиктер берилет.

Мобилизациялык иш-чаралар бүгүн, 21-сентябрда башталды.

Орусиянын Коргоо министри Сергей Шойгу жарым-жартылай мобилизациянын алкагында армияга 300 миң киши чакырыларын билдирди.

Шойгу бир нече айдан бери алгачкы жолу орус армиясынын Украинадагы жоготууларын расмий билдирди. Анын айтымында, февралдан бери Украинадагы согушта 5937 орус аскери өлгөн. Бул батыш өлкөлөрүнүн чалгын кызматтары берген сандардан, ошондой эле “Медаизона” жана “Би-Би-Си” басылмаларынын иликтөөлөрүндө айтылган жоготуулардан бир нече эсе аз. Басылмалар өз иликтөөлөрүндө ачык булактар аркылуу Украинада 6 миңден ашык орус аскери каза болгонун аныктап чыгышкан.

Шойгунун айтымында, мобилизациянын жүрүшүндө студенттер армияга чакырылбайт – бул армияда кызмат өтөгөн жана аскердик адистиги барларга гана тиешелүү болот.

20-сентябрда Мамлекеттик думанын депутаттары Кылмыш кодексине сунушталган өзгөртүүлөрдү дароо экинчи жана үчүнчү окууда жактырган. Өзгөртүүлөр менен кодекс “мобилизация”, “аскердик абал” жана “согуш маалы” деген түшүнүктөр менен толукталып, армиядан качуу үчүн жаза күчөтүлүп, өз каалоосу менен туткунга түшүп бергендер, коргоо тармагындагы мамлекеттик буйрутмаларды аткаруудан баш тарткандар жана мародерлук кылгандар үчүн кылмыш жоопкерчилиги киргизди.

Күн мурун Украинанын чыгышындагы жикчил республикаларда, ошондой эле Орусиянын көзөмөлүндөгү Херсон жана Запорожье облустарында Орусияга кошулуу тууралуу референдумдардын даталары дайындалганы белгилүү болду. Оккупациялык бийликтер добуш берүүнү 23-27-сентябрь күндөргө белгилешти.

Референдумдар Харьков облусундагы шаарлар орус аскерлеринен бошотулган украин армиясынын ийгиликтүү контрчабуулдары жүрүп жаткан маалда жарыяланды.

Орусия Украинага кол салгандан бери көптөгөн аскердик эксперттер Владимир Путин армиянын алдына койгон максаттарга кошумча мобилизациясыз жетүү мүмкүн эмес экенин айтып келишкен. Кремль буга чейин бир нече жолу жалпы мобилизация жарыяланбай турганын билдирген.

Садыр Жапаров БУУнун Башкы катчысы менен чек арадагы кагылышууну талкуулады

Кыргызстандын президенти Садыр Жапаров 20-сентябрда Нью-Йорк шаарында Бириккен Улуттар Уюмунун (БУУ)Баш катчысы Антониу Гутерриш менен жолугушту.

Жолугушууда Антониу Гутерриш Садыр Жапаровго БУУнун Башкы Ассамблеясынын 77-сессиясына катышуу үчүн келгенине кубанычта экенин белгилеп, кыргыз-тажик чек арасындагы кырдаалда мерт болгондор үчүн Садыр Жапаровго көңүл айтты.

Кыргызстан менен Тажикстандын ортосундагы чек ара маселесинин чечилишин чыдамсыздык менен күтүп жатканын билдирди.

Президент Садыр Жапаров БУУнун алкагында кызматташуунун күн тартибиндеги актуалдуу маселелерди талкуулоо мүмкүнчүлүгү үчүн ыраазычылык билдирди. Мамлекет башчы Кыргызстандын БУУга мүчө болгонуна 30 жыл болгонун, бул аралыкта Кыргызстандын демилгеси менен көтөрүлгөн маселелер Башкы Ассамблеянын эл аралык күн тартибинин эң актуалдуу маселелерине айланганын белгиледи.

Кыргызстан БУУнун алдында жоопкерчиликтүү мүчө катары, өзүнө алган милдеттерин жана Уюмдун Уставын жактай турганын айтты.

Кыргызстандын президенти Баш катчы менен жолугушуу кыргыз-тажик чек арасындагы “негизсиз агрессиянын” фонунда өтүп жатканына өкүнүчүн билдирди.

14-15-16-сентябь күндөрү тажик тарап мурда жетишилген бардык макулдашууларды бузуп, кыргыз-тажик мамлекеттик чек арасынын бардык периметри боюнча чек ара жана жарандык объектилерге ок атканын эске салды.

Садыр Жапаров Баш катчынын Кыргызстанга өзгөчө көңүл бөлүүсүнө жана көрсөтүп жаткан колдоосуна терең ыраазычылыгын билдирди.

20-cентябрда Кыргызстандын президенти Садыр Жапаров Нью-Йоркто Улуттар Уюмунун Башкы ассамблеясынын 77-сессиясында сөз сүйлөп, кыргыз-тажик чек арасындагы соңку окуялар тууралуу маалымат берген.

Быйыл 14-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги “Тажикстандын алдын ала пландаган куралдуу агрессиясы” деп атады.

Анын алдында Тажикстандын Тышкы иштер министрлиги ушундай эле мазмунда айыптаган билдирүү жарыялаган.

Кыргыз-тажик чек арасындагы соңку куралдуу кагылышта Кыргызстан 59 жаранынан айрылды, алардын кыркы аскер кызматкери экени айтылды, жараат алгандардын расмий эсеби 200гө жакындады. Чек арадагы кыргыз айылдарынан коопсуз жайларга убактылуу көчүрүлгөндөр 140 миңден ашты.

Тажикстандын Тышкы иштер министрлиги чек арада 41 жараны каза тапканын 19-сентябрда расмий билдирди. “Озоди” радиосу өз булактарына таянып, 59 кишинин тизмесин жарыялады, жергиликтүү жашоочуларга шилтеме берип тажик айылдарында да дүкөн, турак жайлар өрттөлүп, талкаланганын жазды.

Жараат алгандар, канча турак жай талкаланганы тууралуу маалыматтарды көз карандысыз булактардан тактоого азырынча мүмкүн болбой турат.

БУУнун баш катчысы Антониу Гутерриш 17-сентябрда Кыргызстандын тышкы иштер министри Жээнбек Кулубаев менен телефондон сүйлөшүп, кыргыз-тажик чек арасындагы кырдаалга тынчсыздануусун билдирген жана президент Жапаров менен жеке жолугушууга даяр экенин айткан.

Москванын муниципалдык депутаттары Владимир Путиндин отставкасын талап кылышууда

Москванын муниципалдык Ломоносов округунун депутаттары президент Владимир Путинге кайрылып, анын отставкасын талап кылышты. Алар өлкөнүн бакубаттуулугу үчүн бийлик алмашып турушу керек деп эсептешет. Алар “Путин экинчи мөөнөткө шайланып келгенден кийин “баары бузулганын” да белгилешкен. Депутаттардын президентке кайрылуу жасаганы боюнча протоколдук чечими округдун расмий сайтына жарыяланды.

Кайрылууда депутаттар Путин жана анын кол алдындагылардын агрессивдүү риторикасы Орусияны кайра “кансыз согуш” дооруна алып келгенин, ички дүң өнүм кыскарганын, минималдуу айлык акы мурда айтылган көрсөткүчкө чейин көтөрүлбөгөнүн, акылдуу жана жумушка жарамдуу адамдар өлкөдөн кетип жатканын белгилешкен. Орусияда убада кылынган туруктуулуктун дайыны да жок экенин айтышкан.

Буга байланыштуу алар президенттин кызматтан кетүүсүн суранышууда.

“Сиздин көз карашыңыз, башкаруу моделиңиз эскирип, Орусиянын өнүгүшүнө жана анын адамдык потенциалына тоскоол болууда”, – деп жазган муниципалдык депутаттар.

Муниципалдык депутаттар Москва шаарынын мэри Сергей Собянинге да кайрылышкан. Кайрылууда Москвада жергиликтүү өзүн өзү башкаруу системасы факт түрүндө иштебей жатканы, райондук деңгээлде жергиликтүү тургундардын кандай гана демилге болбосун аны ишке ашырууга тоскоол кыла тургандай кош бийлик түзүлүп калганы айтылган.

7-сентябрда Санкт-Петербургдун Смольнинское муниципалитетинин депутаттары Мамлекеттик Думага Владимир Путинди мамлекетке чыккынчылык кылды деп айыптоо жана аны кызматтан алууну талап кылуу боюнча кайрылуусун жарыялашкан.

Санкт-Петербургдун депутаттары Путиндин Украинага каршы согуш баштап, бастырып кириши Орусиянын жана анын жарандарынын коопсуздугуна зыян келтирет деп эсептешет. Кайрылууга кол койгон депутаттар 9-сентябрда милицияга чакырылып, аларга “орус армиясын каралоо” беренеси боюнча протоколдор түзүлгөн.

Булак: Борбор Азия жаңылыктар кызматы

Сербиянын борбору Белградда грек-рим, эркин күрөш боюнча дүйнөлүк чемпионат башталды

Бүгүн 10-сентябрь күнү  Сербиянын борбору Белград шаарында спорттук күрөш: грек-рим, эркин күрөш жана кыз келиндер арасында эркин күрөшү боюнча дүйнө чемпионаты башталып, курч таймашуулар болгону турат. Эр азаматтардан эгемен өлкө болгону бир дагы кыргызстандык балбан дүйнө чемпиону боло элек. Ал эми кыз-келиндердин таймашууларында Айсулуу Тыныбекова дүйнөнүн эки жолку чемпиону болсо, былтыр Мээрим Жуманазарова дагы алтын мелдаль тагынып, дүйнө чемпиону аталган. Сербияда башталган дүйнө чемпионатында Кыргызстандын намысын канча балбан коргоп жатканын, алардын даярдыгын Кыргыз Республикасынын Олимпиадалык спорт түрлөрү боюнча дирекциянын директору Мелис Тобокелов спорттук баяндамачы Кабыл Макешовго айтып берди. 

 – Мелис мырза, Кыргызстандан дүйнөлүк таймашууга канча балбан барды? Кайсы балбандардын даярдыгы жакшы болду? Балбандар кайсы жерде даярдык көрүшкөн эле? 

– Белград шаарында 10-сентябрдан баштап 18-сентябрга чейин спорттук күрөш боюнча дүйнөлүк биринчилик болуп, курч таймашууларга күбө болгону турабыз. Бул жерге бизден грек-рим, эркин күрөш жана кыз келиндер күрөшү боюнча  тандалган 15 балбаныбыз катышып, өлкө намысын коргоп жатышат.  Алгач грек рим күрөшү боюнча алты спортчубуз мөрөй талашат. Алар: Шаршенбеков Жоламан, Шаршенбеков Тынар, Исмаилов Амантур, Махмудов Акжол, Азисбеков Атабек, Махмудов Бексултан жана аларды улук машыктыруучубуз Карачолоков Улукбек менен башкы машыктыруучубуз Эркинбаев Азат, машыктыруучулардын жардамчысы Махметов Мейрамбек агайыбыз коштоп барышты. Бүгүн, 10-сентябрда килем үстүндөгү таймашууларга Токио олимпиадасынын күмүш байге ээси Акжол Махмудов менен Токио олимпиадасынын катышуучусу Атабек Азисбеков катышат.

Ал эми эркин күрөштү дагы алты спортчубуз биздин Кыргызстаныбыздын намысын коргойт, алардын атын атай кетсем: Мырзаназар уулу Бекболот, Жолдошбеков Улукбек, Осмонов Алибек, Акматалиев Эрназар, Орозбеков Исламбек, Будажапов Арслан жана улук машыктыруучулар Тазабеков Исламбек менен Таабылды уулу Сүймөнкул жана башкы машыктыруучубуз Мажинов Русланбек агай коштоп барды. Кыз-келиндер арасындагы спортчуларыбыз болсо Айсулуу Тыныбекова, Мээрим Жуманазарова жана Айпери Медет кызы, аларды улук машыктыруучу Кенжебаев Байгазы жана башкы машыктыруучу Изабеков Нурбек агайыбыз жетектеп барышты. Ушундай эле булардын ден-соолугун карап, ошол жерден калыбына келтирүү процесстерин аткаруу үчүн эки дарыгерибиз жана бир укалоочубуз барды. Атын атай кетсем: дарыгер Алишева Бактыгүл, Бичанов Иса менен Кыдыев Улукбек агайыбыз балбандарга камкордук көрүшмөкчү. 

– Балбандардын даярдыгына, жол киресине жана башкасына жалпы чыгымдары кандай болду?

– Унаа чыгымдары, авиа учактары, тамак-ашы жана жатаканасы төлөнүп бүткөн, алар үчүн баардыгы даяр. Буга дүйнө чемпионатынын алдындагы окуу машыктыруучу толук кандуу өтүлгөн. Грек-рим жана кыз келиндер күрөшү боюнча тандалган балбандарыбыз  Ысык-Көлдө “Орион” пансионатында болуп, бул жерден окуу-машыгуулары жана килем үстундө практикалык машыгууну өтүп бүтүшкөн, эркин күрөштөн спортчуларыбыз Бишкек шаарыбыздагы  “Изабек”  спорт клубунда даярданышкан.  

–  Быйылкы дүйнө чемпионатында байгелүү орунга илинип калышы мүмкүн деген божомолду кайсы спортчуларга айтсаңар болот? Жалпы даярдыктары кандай?

– Биздин балбандарыбыз дайыма керектүү машыктыруудан, бардык нерседен даярдыктан өтүшкөн, менин жеке оюм ар бир спортчунун бул жерде өзүн көрсөтүп, Дүйнө чемпионатында биздин желегибизди желбиретүүгө мүмкүнчүлүгү бар. Бирок бөлүп айта турган болсом мен Шаршенбеков Жоламан, Шаршенбеков Тынар жана Махмудов Акжол үчөө байгелүү орундага жетишип ыктымал. Анткени булардын спорттук чеберчиликтери азыркы убакытта абдан жакшы. Акжол жаш курагынан өтүп, алгачкы жолу чоңдор арасындагы дүйнө чемпионатына катышып жатат.  Бирок буга чейинки чоң ири мелдештерге катышып, такшалып тажрыйбасы толду деп ойлойм, Дүйнө биринчилигинен жеңишке жетип биринчи медаль алууга мүмкүнчүлүгү, өзүнүн деңгээли толук кандуу жетти. Эркин күрөштөн жеңил салмактан Мырзаназар уулу Бекболот менен Акматалиев Эрназардин дүйнө чемпионатына күрөшө турган тажрыйбасы жетиштүү деп ойлойм. Осмонов Алибек дагы бир жолу дүйнө чемпионатында коло медаль алган, анын дагы тажрыйбасы жетиштүү. Улукбек Жолдошбеков  ортодон биртке убакыт кое берип эс алды, азыр спорттук калыбы, даярдыгы жакшы, бул спортчунун дагы тажрыйбасы жетиштүү болуп, чеберчилиги жогорулады деп ойлоймун. Мен бирөөнү бөлүп айтканды каалабайм, бул жерде ар бир тизмени агайларыбыз коюп, мыктыларын тандап берген, өзүңүз байкагандай Олимпиада салмактарына басым жасалып, таразага  аларды койуп коюшкан. Бирөөнү “татыктуу же татыксыз” деп айткым келбейт, ар бирөөндө байгелүү орундарды утканга мүмкүнчүлүктөрү бар.

Кыргызстандык балбандардын 2022-жылдагы дүйнө чемпионатында чыгуу графиги төмөнкүдөй: 

Алдын ала мыктыларды иргеп алуу раунддун беттештери 14:30 башталат.

Жарым финалдык таймашуулар 20:45 болсо, финалдык куч сынашуулар саат 22:00 башталмакчы. 

10-сентябрь – Акжол Махмудов, Атабек Азисбеков

11-сентябрь – Тынар Шаршенбеков, Аматур Исмаилов, Бексултан Мазмудов

12-сентябрь – Жоламан Шаршенбеков, Айсулуу Тыныбекова

13-сентябрь – Айпери Медет кызы

14-сентябрь – Мээрим Жуманазарова

15-сентябрь – Эрназар Акматалиев, Арсалан Будажапов

16-сентябрь – Бекболот Мырзаназар уулу, Исламбек Орозбеков

17-сентябрь – Улукбек Жолдошбеков, Алибек Осмонов

– Кыздар күрөшүнөн Айсулуу Тыныбекова дүйнөнүн эки, Мээрим Жуманазарова бир жолку чемпиону болгон, алар бул ирет өздөрүнүн чемпиондугун коргошу керек да. Ал эми Айпер Медет кызынын алтын байге утууга толук мүмкүнчүлүгү барбы?

– Айсулуу менен Мээримге салыштырмалуу Айперинин көбүрөөк мүмкүнчүлүгү бар, үч балбан кызыбыз тең “чемпион” деген наамга татый алышат, ал эми Мээрим менен Айсулууга бул жерден дагы чоң жоопкерчилик турат, өзүнүн наамын эч качан алдырбашы керек, кыздарыбыз “Дүйнө чемпионатын багындыраарына 99 пайыз ишенем. 

Былтыр Норвегиянын Осло шаарында өткөн дүйнө чемпионатында кыз-келиндер күрөшүндө Айсулуу Тыныбекова менен Мээрим Жуманазарова бардык атаандаштарын жеңип, алтын медаль тагынып, дүйнө чемпиону болгон. Айсулуу экинчи ирет дүйнө чемпиону аталган. Айпери Медет кызы коло байге уткан. Эркин күрөштөн Эрназар Акматалиев (70 кг) күмүш жана Алибек Осмонов коло байге (65 кг) тагынган. Ал эми грек-рим күрөшүндө Жоламан Шаршенбеков экинчи ирет күмүш байгелүү болгон. 

– Бүткүл Дүйнөлүк  Бириккен Күрөш Уюмунун конгресси болуп,  жыйында кандай маселелер каралды? Кийинки Париж олимпидасына  жолдомо берилүүчү дүйнө чемпионаты кайсы мамлекетке берилди? Бул жөнүндө маалымат барбы?

– 9-сентябрь күнү Бүткүл Дүйнөлүк Бириккен Күрөш Уюмунунда жыйы болуп, бир топ маселелер каралды. Конгресске  Кыргызстандын спорттук күрөш федерациясынын президенти, генерал Турганбаев Мелис агайыбыз баштаган делегация катышты. Конгресске 106 өлкөнүн делегаттары катышып, жыйынга Эл аралык олимпиада комитетинин президенти Томас Бах да күбө болду. Ошондой эле бул уюмдун Бюро мүчөлүгүнө талапкер болгон 16 талапкерден жетөө шайланды. Талапкерлердин катарында Кыргызстандын спорттук күрөш федерациясынын вице-президенти Динарбек Асылбек уулу да бар эле. Брюо мүчөлөрү болуп, төмөнкүлөр шайланды : Теодорос Хамакос (Греция, 82 добуш), Мартин Диттман (Германия, 81), Рудика Якши (Түркия, 79),  Намик Алиев (Азербайджан, 73), Даниель Игали (Нигерия, 83), Разван Пиркалабу (Румыния, 79) жана Чжан Йе (Кытай, 62).

Париж олимпиадалык оюндарына лицензия ойнотулуучу дүйнөлүк чемпионат эмдиги 2023-жылы Орусиянын Красноярск шаарында болот деп былтыр айтылган. Себеби быйылкы дүйнө чемпионаты Красноярск шаарында өтмөк болчу, кырдаалга байланышуу Белград шаарына жылдырылган эле.  Быйылкы дүйнөлүк саясый окуялардан, Украинадагы кырдаалдан улам Орусияга чектөөлөр киргизилип жаткандыктан  бул маселе чечилип, так айтыла элек.

-Балбандарыбызды сүрөөнгө алып, жеңиш менен келүүлөрүнө үмүт кылып туралы!

WW 76kg – Aiperi MEDET KYZY (KGZ) df. Tatiana RENTERIA RENTERIA (COL)

Кабыл Макешов,  спорттук баяндамачы

Петербург депутаттары Мамдумага Владимир Путинди мамлекеттик чыккынчылыкка айыптап, импичмент жарыялоону сунушташты

Санкт-Петербургдагы Смольнинск муниципалдык кеңеши Мамлекеттик думага Орусиянын президенти Владимир Путинди кызматынан ажыратуу үчүн мамлекеттик чыккынчылыкка айыптоону сунуштады. Бул тууралуу депутат Дмитрий Палюга билдирди.

Петербург депутаттары Путиндин Украина аймагына кол салуу жөнүндө чечими Орусиянын жана анын жарандарынын коопсуздугуна зыянын тийгизет деп эсептешет. Палюга чечим Смольнинск кеңешинин депутаттарынын көпчүлүк добушу менен кабыл алынганын белгиледи.

Депутаттар Украинадагы согуштан жаш жигиттер өлүп, майып болуп, согуштан Орусия экономикасы жабыркап жатат деп эсептешет. Алар Орусия согушту баштагандан кийин НАТО блогу чыгышты көздөй активдүү түрдө кулачын жайып, Украина ири көлөмдө курал-жарак ала баштаганын белгилешти.

Орусия Украинага согуш ачкандан кийин – март айында Смольнинск муниципалдык кеңеши Путинге кан төгүүнү токтотуу, Украина аймагынан аскерлерди чыгарып кетүү жана отставкага кетүү чакырыгы менен депутаттык өтүнмө жолдогон.

5 орус олигархы Путинге 583 миллион долларлык суперяхтаны Жаңы жылга белекке беришкен

Документтер боюнча “Роснефть” компаниясынын мурдагы президенти Эдуард Худайнатовго таандык Италияда камакка алынган “Шехерезада” суперяхтасы 583 миллион еврого курулган. Аны орус олгархтары президент Владимир Путинге Жаңы жылга белек катары беришкен.

Бул тууралуу “Досье” иликтөө борборунун материалында жазылган.

Суперъяхта быйыл май айында Италиянын Марина ди Каррара деген портунда камакка алынган. Анда ал санкциялык тезмеге киргизилген орусиялыктардын бирине таандык болушу мүмкүн экени айтылган. Яхтанын ээси тууралуу Италиянын бийлигине жөнөтүлгөн катта ага Худайнатов ээлик кылары жазылган. Ошол эле маалда Худайнатов АКШ санкциялык тизмедеги миллиардар Сулейман Керимовго таандык деп эсептеп жаткан 106 метрлик “Амадея” суперяхтасына жана Испаниянын бийлиги Игорь Сечиндин менчиги катары камакка алган 135 метрлик “Кресент” яхтасына да ээлик кылат.

Европа биримдигине мүчө өлкөлөрдүн биргелешкен иликтөөсүнүн материалдарында Худайнатов жогоруда айтылган яхталардын баарына ээлик кылгыдай бай эмес экени белгиленген. ЕБ яхталардын курулушун беш компания каржылаганын аныктап чыккан.

“Досье” борборунун маалыматына караганда, аталган офшорлордун бери дегенде эле бирөө орус бизнесмендерине түздөн-түз байланыштуу болушу мүмкүн. Иликтөөчүлөр компаниянын ээси катары “Сумма” тобунун ээлеринин бири Зиявудин Магомедовду атап жатышат. Долбоордун аты-жөнүн айтпаган булагы Магомедов Путинге “Шехерезаданы” белек кылган олигархтардын бири экенин айткан.

Басылма жаңы жылдык белекке акчаны миллиардер Геннадий Тимченко чогултканын жазды. Ошол эле маалда белек берүүчүлөрдүн башкаларынын аты-жөнү айтылган эмес.

Буга чейин “Шехерезада” суперяхтасына Орусиянын президенти Владимир Путин ээлик кылары башка иликтөөлөрдө да айтылып, анын экипажы Федералдык коопсуздук кызматынын өкүлдөрүнөн тураары белгилүү болгон. Кремль азырынча “Досьенин” бул материалы боюнча комментарий бере элек.

7-сентябрда Путин орусиялыктардын чет өлкөлөрдөгү активдеринин камакка алынышы – “бардыгы үчүн сабак” экенин билдирди. Анын айтымында, эгер орусиялык ишкерлер яхталарын Орусияда кармап, акчасын чет өлкөлүк активдерге салбаганда, “эч нерсе жоготпой болчу”.

Февраль айында Гамбург портунан Калининградга Путинге байланышы бар экени айтылып жүргөн 82 метрлик “Грейсфул” деген суперяхта жеткирилген. Андан эки апта өткөндөн кийин Путин Украинга согуш жарыялаган.

Меню