Menu

ДҮЙНӨ ЖҮЗҮНДӨ

Путиндин баасы 100 миллион доллардык жаңы яхтасы тууралуу иликтөө жарыяланды

Алексей Навальныйдын командасы Орусиянын президенти Владимир Путинге байланышы бар экени болжолдонгон кымбат баалуу яхта тууралуу иликтөөсүн жарыялады.

Graceful деп аталган 82 метрлик яхтанын болжолдуу баасы 100 миллион долларга жакын. Анда эки бассейн, тик учак коно турган аянтча, спортзал, кинозал жана камин коюлган тамактануучу бөлмө бар. Яхтага өтө кымбат эмеректер коюлуп, ички жасалгасында мрамор жана алтын жалатылган материалдар колдонулган. Анын экипажы Федералдык күзөт кызматынын өкүлдөрүнөн туруп, өкмөттүк байланыш менен камсыздалган.

Активисттердин айтымында, Graceful яхтасынын корпусу Северодвинсктеги “Севмаш” кеме куруу жайында жасалган. Аны жасалгалоо жана техникалык жабдууларды орнотуу иши Гамбургдагы Blohm + Voss кеме куруу жайында уланып, 2014-жылы аяктаган.

Алгач яхтанын формалдуу ээси катары Путиндин көп жылдардан берки досу Пётр Колбин ээлик кылган Британ-Виргин аралдарында катталган офшор компания көрсөтүлгөн. 2020-жылы декабрда яхта ээси жашырылган “Аргумент” деп аталган орусиялык акционердик коомго сатылган.

Маалыматка караганда, Graceful яхтасы 2022-жылы январда Гамбургдагы кеме куруучу жайда пландык оңдоодон өтүп жатканда шашылыш түрдө Орусияга кайтарылган. Иликтөөчүлөр Москва мындай жол менен яхтаны Украинага кол салгандан кийинки камакка алуулардан коргоп калууга аракет кылган деп болжолдоодо.

2022-жылдын 24-февралынан кийин АКШнын Каржы министрлиги Путинге байланышы бар мүлк катары Graceful яхтасын санкциялык тизмеге киргизген. Бирок бүгүнкү күндө Эстония, Италия жана Түркия сыяктуу өлкөлөр ортомчу фирмалар аркылуу бул кемеге жабдууларды жеткирүүнү улантып келишет.

Былтыр май айында Италиянын бийлиги Путинге таандык экени айтылган “Шехерезада” аттуу яхтаны камакка алып, АКШдагы кеме токтотуучу жайга жеткирген. Узундугу 140 метрди, баасы 700 миллион долларды түзгөн бул яхтанын формалдуу ээси катары “Роснефтинин” мурдагы башчысы Эдуард Худайнатов көрсөтүлгөн.

Владимир Путин кирешеси тууралуу декларациясында айына 850 миң рубль маяна аларын, “Волга” жана “Нива” үлгүсүндөгү эки автоунаасы жана “Скиф” чиркегичи бар экенин көрсөткөн.

Сентябрда Нью-Йоркто АКШ менен Борбор Азия лидерлеринин саммити өтөт

АКШ президенти Жо Байден Борбор Азия мамлекеттеринин башчыларынын катышуусунда саммит өткөрүүнү пландоодо.

18-августта Forbes АКШ президенти Жо Байдендин Өзбекстандын президенти Шавкат Мирзиёевге жолдогон катынын текстин жарыялады.

АКШ президенти Жо Байден өз катында Өзбекстандын президенти Шавкат Мирзиёвди сентябрдын аягында Нью-Йоркто БУУнун Башкы ассамблеясынын сессиясынын ачылышы учурунда өтө турган “Борбор Азия-АКШ” (С5+1) форматындагы биринчи саммитке чакырган.

Gazeta.uz басылмасынын Өзбекстан өкмөтүндөгү өз булагы мындай саммит чындап эле пландалып жатканын жана ал АКШнын демилгеси экенин ырастады.

Жо Байдендин катында АКШ менен Борбор Азия өлкөлөрүнүн президенттеринин жолугушуусу 19 же 20-сентябрга белгиленгени айтылат.

“Мен БУУнун Башкы Ассамблеясынын сессиясын чыдамсыздык менен күтүп жатам. Анда биз элибиздин жашоосундагы эң маанилүү маселелер боюнча прогресске жетишебиз. 19-20-сентябрдагы “C5+1” форматындагы расмий жолугушууда сиз мага жана биздин кесиптештерибизге кошулуп, коопсуздук, экономика жана экология чөйрөсүндөгү жалпы максаттарга жетүү үчүн биргелешип иштөөнү кантип уланта аларыбызды талкуулайбыз деп үмүттөнөм”, – деп жазган Жо Байден.

Петербургда орус жарандыгын алган 100гө жакын мигрант аскер комиссариатына жеткирилди

Полициянын Санкт-Петербург шаарынын түштүгүндөгү эки күндүк рейди учурунда орус жарандыгын алып, бирок аскердик каттоого турбаган 100гө жакын мигрант аныкталып, аскер комиссариаттарына жеткирилди. Бул тууралуу РБК басылмасы ИИМдин Ленинград облустук башкармалыгына шилтеме кылып кабарлады.

“Текшерүүнүн жыйынтыгында 400дөй чет элдик жаран аныкталды. Алардын ичинен жүзгө жакыны Орусиянын жарандыгын алып, бирок аскердик каттоого турбаса, 55и миграциялык мыйзамдарды бузуп жүргөн. Жасалма документтерди көрсөткөн бир мигрантка кылмыш иши козголду”, – деп жазылган полициянын билдирүүсүндө.

Бул рейдден кийин Адам укуктары боюнча кеңештин башчысы Валерий Фадеев “Орусиянын жаңы жарандарынын укуктары гана эмес, милдеттери да болушу керектигин” билдирди. Ал мигранттарга жарандык берүүдө аларды дароо аскердик каттоого алууну сунуштады.

Бир нече күн мурда Петербургдун тургундары аскердик комиссариатка чакырган СМС-билдирүүлөр келип жатканын билдиришкен. “Ротонда” басылмасы чынында эле мындай билдирүүлөр орто адистик билими бар жаштарга жөнөтүлгөнүн аныктаган.

“Аларды күзгү аскерге чакыруу өнөктүгүнүн алдында маалыматтарын салыштырып, тактоо үчүн чакырып жатышат. СМС билдирүүлөр электрондук аскерге чакыруу эмес. Келбегендер жоопкерчиликке тартылбашы керек”, – деген басылманын шаардык администрацияда иштеген булагы.

Күн мурун Чебоксары жана Новочебоксарск шаарларында Орусиянын жарандыгын алып, бирок аскердик каттоого турбаган бир нече чет өлкөлүк кармалып, аскердик комиссариатка жеткирилгени кабарланды. Аскердик каттоо боюнча милдеттерин аткарбаганы үчүн аларга 500дөн 3 миң рублге чейин административдик айып пул салынышы мүмкүн.

АКШ сенатору Боб Менендес кыргыз президенти Садыр Жапаровду Москвага Батыш салган санкциядан буйтап өтүүгө жардамдашпоого чакырды

АКШнын Сенатындагы Эл аралык мамилелер комитетинин башчысы Боб Менендес санкциялык чектөөлөр бузулган жагдайга байланыштуу Кыргызстандын президенти Садыр Жапаровго кайрылды.

Ал анда Бишкекти Москвага Батыш салган санкциядан буйтап өтүүгө жардамдашпоого чакырды. Бул тууралуу “Америка үнү” (Voice of America – ред.) сайты жазып чыкты.

Сенатордун Жапаровго жолдогон катында Орусия Украинага каршы согуш ачкандан кийин Кыргызстан менен Орусиянын ортосунда импорттук-экспорттук операциялар болуп көрбөгөндөй көбөйгөнүн белгилеген. Анда коргонуу багытындагы, анын ичинен дрон, учактын жана курал-жарактын тетиктери, ошондой эле микросхемалар өңдүү тыюу салынган буюм-тайымдарды Орусияга мыйзамсыз импорттоо жагынан Кыргызстан ага шерик болуп жатканын эскерткен.

“Сиздин өкмөтүңүздү ушундай санкциялык чектөөлөрдүн бузулушу тууралуу айыптоолорду чукул иликтөөгө, өлкөңүз аркылуу товарлардын мыйзамсыз өтүшүнүн алдын алган ишенимдүү жол-жоболорду орнотууга чакырам”, – деп жазылган катта.

Менендес “Кыргызстандын Орусияга салынган эл аралык санкциялар боюнча эрежелерди сактай албаганы – демократиядан жана адам укугун сактоодон чегинип жатканынын белгиси” деген кооптонуусун билдирди.

Сенатор азыркы өкмөт “журналисттердин жана эркин медиалардын укугун бир канча жолу бузуп, укук коргоочуларды жана жарандык коомду чектегенин” белгилеген.

“Бир кезде Борбор Азиядагы демократиянын көрсөткүчү болгон Кыргыз Республикасы автократиянын кооптуу жолуна түштү. Мен көз карандысыз бардык медиаларга коюлган чектөөлөрдү алып, абакта жаткандарды бошотуп, эркин чогулуу укугуна коюлган чектөөлөрдү жокко чыгарууга чакырам”, – деген Менендес.

Садыр Жапаров жана анын администрациясы буга байланыштуу азырынча комментарий бере элек.

Өткөн айда АКШнын санкциясына кабылды делген кыргызстандык компанияларга байланыштуу Улуттук коопсуздук комитети иликтөө баштаган.

Кыргызстандын экономика жана коммерция министри Данияр Амангелдиев “Азаттыкка” курган маегинде тзүлгөн жагдай жана мындан аркы кызматташууну талкуулоо үчүн АКШ өкүлдөрү менен жолугушуу пландалып жатканын айткан.

“Кайсы өнүмдөр жана товарлар санкциянын алкагында кандай кооптонуу жаратып жатканын чогуу карап иш жүргүзгөнгө толук даярбыз”, – деген министр.

Ал АКШ жана Европа өлкөлөрү Кыргызстандын жана Евразия экономикалык биримдигинин аймагына кирген кайсы товарлар жана өнүмдөр санкцияга илиниши ыктымалдыгы тууралуу маалымат бере электигин белгилеген.

Амангелдиев буга карабай кыргыз бийлиги экспорттук көзөмөл тизмесине киргизилген товарларды дыкат текшере баштап, буга байланыштуу электрондук счет-фактураны колдонууну күчөткөнүн айткан.

Анын алдында АКШнын Каржы министрлиги Орусиядагы 120дан ашуун компания менен катар Кыргызстанда катталган төрт ишканага да санкция салган. Аталган мекеменин маалыматында айтылгандай, “кара тизмеге” илинген компаниялардын айрым жабдуулары орустардын Украинага каршы колдонулган курал-жарактарынан табылган.

Кыргызстандагы RM Design and Development, “ГТМЕ Технологии”, “Прогресс лидер” жана “Карголайн” компанияларынан товар алып турган Орусиядагы бир катар ишканалар да санкциялык тизмеге кошулду.

“Азаттык” буга чейин Орусиянын согушка жардамдашып жаткан компаниялары менен кызматташуусу ыктымал делген кыргызстандык ишканалар боюнча атайын иликтөө жасаган.

Буга чейин АКШ Кыргызстандагы “Тро, Я” аттуу компанияга да санкция салган.

Адатта “кара тизмеге” киргизилген компаниялар эл аралык деңгээлде иш жүргүзө албайт жана Батыш өлкөлөрүндөгү ишканалар менен кызматташуусуна жол жабылат. Андай компанияларды тейлөөгө да тыюу салынат.

"Барби" кинотасмасы дүйнөлүк прокатта 1 миллиард доллар чогултту

“Барби” комедиясынын авторлору тасма дүйнөлүк прокатта миллиард доллардан ашык киреше тапканын айтышты, муну серепчилер да тастыкташты.

“Барби” азыр кассада 2023-жылдын эң көп киреше тапкан экинчи тасмасы болууда. The Super Mario Bros (“Бир тууган Супер Мариолор”) 1,35 миллиард доллар менен 1-орунда турат. Буга чейин жарыкка чыккан бардык тасмалардын ичинен “Барби” прокаттагы ийгилиги боюнча 45-орунда.

“Барби” режиссёр айым тарткан эң көп киреше тапкан тасма болгону белгиленүүдө. Ага чейин Пэтти Женкинстин 2017-жылы жарыкка чыккан Wonder Woman тасмасы прокатта болжол менен 822 миллион доллар чогулткан.

Расмий түрдө “Барби” орус кинотеатрларында көрсөтүлгөн жок. Анткени Голливуд студиялары Украинада толук масштабдуу согуш башталгандан кийин Орусиядан чыгып кетишкен.

Жарым жылда Илон Маск $105 миллиард, Алишер Усманов $564 миллион долларга байыды

Дүйнөнүн эң бай адамы катары таанылган Илон Маск алты айда 105 миллиард доллар киреше таап, байлыгы 242 миллиард долларга жетти. Кийинки орундарды Бернард Арно (198 миллиард доллар) жана Жефф Безос (157 миллиард доллар) ээледи.

Муну планетанын эң бай 500 адамын тизмектеген Bloomberg Billionaires Index тастыктайт.

Дүйнөдө миллиардерлер 2023-жылдын биринчи жарымында 852 миллиард долларга байышты. Bloomberg агенттигинин маалыматы боюнча бул ар бир миллиардер күнүнө 14 миллион доллар киреше алып жатканын билдирет.

Эң бай адамдардын тизмесине кирген Алишер Усманов алты айда 564 миллион доллар киреше тапты. Ал 19 миллиард доллар байлыгы менен дүйнөдөгү эң бай адамдарынын арасында 93үнчү жана Орусиядагы эң бай адамдардын арасында алтынчы орунда турат.

Быйыл алты айында орусиялык миллиардерлердин жалпы байлыгы 32 миллиард долларга өстү.

ЛУКОЙЛдун башчысы Вагит Алекперов 2023-жылдын биринчи жарымында эң көп киреше тапкан орусиялык миллиардер болду. Ал байлыгын 5,9 миллиард долларга көбөйтүп, 21,3 миллиард долларга жеткирди. Бирок Орусиянын эң бай адамдарынын тизмесинде биринчи орунда 29,8 миллиард доллар байлыгы менен “Норникель” компаниясынын ээси Владимир Потанин турат. Ал алты айда 1,23 миллиард доллар тапкан.

Жозеп Боррел: Россия азык-түлүктү курал катары колдонууну токтотууга тийиш

Жозеп Боррел Фонтеллес, Союздун тышкы иштер жана коопсуздук саясаты боюнча Жогорку өкүлү жана Европа комиссиясынын вице-президенти

17-июлда, Стамбулда макулдашууга кол коюлгандан дээрлик бир жылдан кийин Россия Украинага айыл чарба продукциясын дүйнөлүк рынокторго экспорттоого мүмкүндүк берүүчү Кара деңиз эгин демилгесин (КДЭД) узартпоо жөнүндө чечимге келди. БУУнун Башкы катчысы баса белгилегендей, бул демилге “өтө муктаж болуп жаткан дүйнөдө үмүттүн маягы болгон эле”. 

Россия Украинага каршы агрессорлук согуш баштаганга чейин Украина  дүйнөдө азык-түлүктүн өтө маанилүү экспорттоочусусу болуп, дүйнөдө арпанын бештен бир бөлүгүн, жүгөрүнүн алтыдан бир бөлүгүн жана буудайдын сезгизден бир бөлүгүн берип турган. Россия Украинага басып кирип, эгин талааларына жана кампаларына кол салып, Украинанын портторун бөгөп салгандан кийин дүйнөдө азык-түлүктүн баасы рекорддук деңгээлге чейин кымбаттап, көптөгөн импортер өлкөлөргө азык-түлүктүн келишине коркунуч жаралды. КДЭДдин максаты айыл чарба продукциясын Украинадан экспорттоонун маршрутун калыбына келтирүү жана азык-түлүктүн дүйнөлүк баасын арзандатууга багытталган болчу. 

Көптөгөн кыйынчылыктарга карабастан КДЭД өзүнүн башкы максатына жетти. 2022-жылдын августунан баштап Украинадан дүйнөнүн 45 өлкөсүнө дээрлик 33 млн тонна дан эгиндер жана азык-түлүктөр экспорттолушу Россия кол салгандан көп өтпөй тамак-аштын рекорддук деңгээлге кымбаттаган бааларын болжол менен 25%га арзандатуу менен маанилүү роль ойноду. Мамлекеттик сооданын маалыматтары көрсөтүп тургандай, эгиндин жарымынан ашыгы, анын ичинен буудайдын үчтөн экиси өнүгүп жаткан өлкөлөргө барган. 

Андан тышкары, КДЭД Дүйнөлүк азык-түлүк программасы (ДАТП) үчүн эгиндин такай болуп турушун камсыздады. Украина 2023-жылы Афганистан, Жибути, Эфиопия, Кения, Сомали, Судан жана Йемен сыяктуу азык-түлүк өтө тартыш болгон өлкөлөрдү гуманитардык колдоо үчүн сатып алынган буудайдын 80%ын берген.  Кара деңиз маршрутусуз ДАТП эгинди башка өлкөлөрдөн кымбатыраак баада сатып алууга жана дүйнөдө болуп көрбөгөндөй азык-түлүк кризиси учурунда бул аракетке көбүрөөк убакыт сарптоого мажбур болот. 

Россиянын бул чечими БУУнун Башкы катчысынын бул проблеманы чечүү боюнча иш жүргүзүү жөнүндө кайта-кайта берилген сунуштарына карабастан кабыл алынды. Россия күнөөнү башкаларга оодаруу үчүн анын айыл чарбалык экспорту жетиштүү деңгээлде жеңилдетилген жок деп жатат. Соода жөнүндө жалпыга ачык маалыматтарда андай эмес экени, Россиянын айыл чарба экспорту гүлдөп өсүп жатканы көрүнүнп турат. Россия ошондой эле БУУ менен КДЭДге параллель кол коюлган Жер семирткичтерди экспорттоо боюнча өз ара түшүнүшүү жөнүндө меморандумдан да орчундуу пайда алган. БУУ ченемдик укуктук актыларды тактоо боюнча тынымсыз иш жүргүзүп жатат жана банк жана камсыздандыруу секторлорунда тийиштүү чечимдерди издөө үчүн жеке сектор менен дайыма тыгыз иштөөдө. Бул күч-аракеттер ЕБ жана анын өнөктөштөрү менен тыгыз кызматташтыкта ишке ашырылууда. 

Россия таратып жаткан жалганга карабастан ЕБ санкциялардын глобалдык азык-түлүк коопсуздугуна эч кандай таасирин тийгизбөөсүнө жетишти. Санкциялар Россиянын үчүнчү өлкөлөргө азык-түлүк жана жер семирткичтерди экспорттоосуна карата колдонулбайт жана ЕБ экономикалык операторлорго үчүнчү өлкөлөргө мындай берүүлөр уруксат экендигин түшүндүргөн кеңири сунуштарды берди.  Биз тийиштүү төлөмдөргө уруксат бериш үчүн БУУ менен да кызматташып жатабыз. 

Мына ушундай баарына белгилүү жана ынанымдуу фактыларга карабастан Россия КДЭДден чыгууну чечип, азык-түлүктү курал катары пайдаланып жатат жана дүйнөдөгү азык-түлүк менен жабдууну коркунучка дуушарлантууда. Россия КДЭДден чыккандан бир нече сааттан кийин Кара деңизде эле эмес, Дунайда да Украинанын эгин кампаларына жана порттук инфраструктураларына атайылап күн сайын чабуул коюп аларды жок кыла баштады. Буга жооп катары дароо эле буудайдын жана жүгөрүнүн дүң баалары Россиянын баскынчы согушу башталган учурдан бери эң жогорку даражада кымбаттап кетти. Россиянын дүйнөлүк азык-түлүк менен камсыз кылууну атайылап стресске дуушарлантышы азык-түлүк бааларынын олку-солкулугу, жашоо-турмуш баасындагы глобалдык кризисинин тереңдеши жана импортко көз каранды өлкөлөрдө элдин тамак-аш менен камсыздалышын кыйындатышы ыктымал. Мындай жосунсуз жорук чечкиндүү түрдө айыпталууга тийиш.

Бүткүл дүйнө камсыздоо-жабдуулардагы үзгүлтүктөргө жана баалардын кымбатташына каршы күрөшүп жаткан мезгилде Россия аярлуу өлкөлөргө, атап айтканда Африкада эгин менен камсыз кылуудагы чектөөлөр жөнүндө эки тараптуу сунуштар менен кайрылып, өзү жараткан проблеманы чечип жаткандай түр көрсөтүүдө. Бул азык-түлүктү курал катары атайылап пайдаланган циникалык саясат.

Россиянын жоопкерчиликсиз иш-аракетине каршы ЕБ негизги үч багыт боюнча чара көрөт. Биринчиден, биз БУУнун жана Түркиянын Кара деңиздеги эгин демилгесин жандандыруу боюнча тынымсыз аракеттерин колдоону улантабыз. Экинчиден, Украинанын айыл чарба экспортунун ЕБ аркылуу дүйнөлүк рынокторго чыгуусунун альтернативдик маршруту катары өзүбүздүн “тилектештик жолдорубузду” чыңдоону улантабыз. Бүгүнкү күндө бул маршруттар боюнча Украинанын 41 млн тонна айыл чарба продукциясы экспорттолду, жана биз Россиянын КДЭДди колдонууну токтотушунун кесепеттерин жеңилдетиш үчүн бул көрсөткүчтү болушунча көбөйтүүгө аракеттенебиз. Үчүнчүдөн, азык-түлүк коопсуздугу проблемасын чечүүгө 2024-жылга чейин 18 млрд евро бөлүп, муктаж өлкөлөргө жана адамдарга колдоо көрсөтүүнү көбөйттүк. 

Биз эл аралык шериктештикти жана бардык өлкөлөрдү глобалдуу азык-түлүк коопсуздугун колдоо үчүн өздөрүнүн жардамын арттырууга чакырабыз. Биз бардык өнөктөштөрүбүздөн Африка биримдиги сыяктуу Россияны сүйлөшүүгө келүүгө, ошондой эле Украинанын айыл чарбалык инфраструктурасына сокку урбоого чакырууну суранабыз. Так жана бирдиктүү добуш менен биз Россиянын КДЭДге кайрадан катышуусуна жетише алабыз. Бүткүл дүйнө глобалдык азык-түлүк коопсуздугун камсыздоодо жоопкерчиликтүү болууга кызыкдар. Бул биздин азык-түлүккө айрыкча муктаж болуп жаткан адамдардын алдындагы парзыбыз.

Америкалык сенатор Борбор Азиянын үч өлкөсүнө киргизилген соода чектөөлөрүн жоюуга чакырды

Америкалык сенатор АКШ Конгрессин Борбор Азиянын үч өлкөсүнө карата киргизилген чектөөнү алып салууга чакырды. Бул түзөтүү 1974-жылы “кансыз согуш” учурунда бир нече мамлекеттерге карата кабыл алынган. Алардын арасында Казакстан, Өзбекстан жана Тажикстан да бар.

Эл аралык байланыштар комитетинин мүчөсү, сенатор-демократ Крис Мерфи (Chris Murphy) 26-июлда Diplomat журналына макала жарыялап, Жексон-Вэниктин түзөтүүсүн жокко чыгаруу – Борбор Азия мамлекеттери менен туруктуу соода алакасын түзүүгө мүмкүндүк берет деп жазган. Сенатордун айтымында, бул АКШ менен катар Казакстандын, Өзбекстандын жана Тажикстандын да кызыкчылыгына жооп берет.

Крис Мерфи АКШ дүйнөдөгү геосаясий кырдаалды эске алып, Борбор Азия өлкөлөрү менен кызматташууну кайра карап чыгышы керек деп эсептейт. Сенатордун пикиринде, АКШ четте турган маалда Орусия менен Кытай Казакстан, Өзбекстан жана Тажикстан сыяктуу өлкөлөргө таасирин күчөтүүдө.

АКШнын Соода жөнүндө мыйзамына түзөтүүлөрдү сенатор-демократтар Генри Жексон менен Чарльз Ваник киргизген. Ага ылайык, эмиграцияны чектегени үчүн советтик айрым өлкөлөргө соода санкциялары салынган. Кансыз согуштун калдыгы деп эсептелген жана ДСУнун эрежелерине карама-каршы келген түзөтүү Тажикстан, Казакстан, Өзбекстан жана башка бир катар мурдагы советтик мамлекеттерде дагы деле күчүн жогото элек. Кыргызстан 1998-жылы Дүйнөлүк соода уюмуна мүчө болуп киргенден кийин бул чектөөнүн алкагынан чыгарылган.

Москвада кыргыз диаспоралары үчүн укуктук сабаттуулук боюнча окуу өткөрүлдү

Москва шаарында кыргыз диаспоралары үчүн укуктук сабаттуулук жана социалдык адаптация боюнча тренинг өткөрүлдү.

Бул жолугушууда Орусия Акыйкатчысынын Москва облусу боюнча өкүлү Ирина Фаевская, ошондой эле Орусиянын Жарандардын конституциялык укуктарын коргоо департаментинин кызматкерлери кыргыз диаспора өкүлдөрү менен баарлашты. Маалыматта белгиленгендей, катышуучуларга миграциялык мыйзамдарды сактоо жана аны бузган учурдагы жоопкерчилик тууралуу маалымат берилди.

Мындан тышкары эмгек мигранттарын жана алардын үй-бүлө мүчөлөрүн камсыздандыруу, билим берүү, миграциялык каттоонун жол-жоболору, анын ичинде манжа изин каттоо жана медициналык текшерүүдөн өтүү маселелери каралды.

Орусиядагы «Нелегал» операциясынан кийин Москва шаары жана Москва облусунан 130 кыргызстандык депортацияланган.

Орусиянын Ички иштер министрлиги «Нелегал» рейдинен кийин жети миңдей мигрант депортацияланып, бир нече миң адамга каршы кылмыш иши козголгонун билдирген.

Кылмыш иштери негизинен маңзат жана психотроптук заттарды жүгүртүү, чек арадан мыйзамсыз өтүүгө байланыштуу.

Орус бийлиги «Нелегал» операциясынын биринчи баскычы 19-25 июнь күндөрү жүргүзүлгөнүн билдирген. Мигранттар рейддер токтобой жатканын кабарлап жатышат.

Казак президенти Касым-Жомарт Токаев Түндүк Европада Куранды өрттөгөн акцияларды айыптады

Казакстандын президенти Касым-Жомарт Токаев Түндүк Европада Куранды өрттөгөн акцияларды “дүйнөдө чыңалууну күчөтүүгө, элдердин жана мамлекеттердин ортосундагы ишенимге доо кетирүүгө багытталган жол берилгис чагымдар” деп атады.

Токаевдин пикиринде, “айрым мамлекеттердин жарандарынын диний вандализм жана жоопкерчиликсиз жүрүм-туруму” мамлекеттердин жана диндердин жалпы таанылган нормаларына каршы келген аракеттер катары бир добуштан айыпталышы керек.

“БУУнун Башкы ассамблеясы да бул боюнча өзүнүн салмактуу сөзүн айтышы керек”, – делет Акорда тараткан Токаевдин билдирүүсүндө.

Данияда эки демонстрант 24-июлда Ирактын элчилигинин алдында мусулмандардын ыйык китеби Куранды өрттөшкөн. Андан мурдараак да ушундай акция уюштурулган. Бул көрүнүш Иракта жапырт нааразылык жараткан. Бир катар мусулман өлкөлөрү муну айыптады.

Буга чейин Швецияда Куранды өрттөгөн акция болуп, мусулман өлкөлөрүндө нааразылык жараткан. Бириккен Улуттар Уюмунун Адам укуктары боюнча кеңеши 12-июлда диний жек көрүүчүлүк тууралуу талаштуу резолюцияны жактырган.

Меню