Menu

ДҮЙНӨ ЖҮЗҮНДӨ

Москвада 19 жаштагы кыргызстандык жигит бычакталды

Москвада 19 жаштагы кыргызстандык жигит бычакталды. Бул тууралуу россиялык ММКлар жазып чыкты.

Маалыматка ылайык, полицияга жергиликтүү тургундар телефон чалып, сейил бакта жаш жигит бычактан жаракат алышканын билдиришкен. Жерине барган полиция кызматкерлери көкүрөгүнөн жаракат алган баланы табышкан. Ал ооруканага жеткирилген.

Окуя көчөдө орнотулган камерага түшүп калган. Анда бычакталган адам эки досу менен сейил бакта отурганын, алардын жанына белгисиз алты жигит келип, алар менен айтыша кетип, белгисиз жигит 19 жаштагы баланы бычак менен сайып салганы көрүнөт. Андан кийин бардыгы окуя болгон жерден качып кетишкен.

Полиция кызматкерлери 9-апрелде кечинде Өзбекстандын 25 жаштагы жаранын кармашкан. Ден-соолукка атайылап оор залал келтирүү фактысы боюнча кылмыш иши козголгон.

Грекияда коррупция жөнүндө жазып жүргөн тележурналист киши колдуу болду

Грекиянын баш калаасы Афиныда коррупцияга байланыштуу иликтөөлөрү менен таанымал, “Star” телеканалынын журналисти Йоргос Караиваз киши колдуу болду.

Ал 9-апрелде жумуштан чыгып, үйүнө бара жатканда мотоцикл айдаган эки киши 15 жолу ок атышкан. Бул тууралуу Эл аралык француз радиосу кабарлады. Соттук медициналык кызматкерлер журналисттин сөөгүнөн он окту алып чыгышкан.

52 жаштагы Йоргос Караиваз коррупция, кылмыштуулук тууралуу күнүгө атайын берүүлөргө катышчу. “Bloko” деп аталган жемкорлуктун бетин ачкан порталды негиздеген.

Грекиянын премьер-министри Кириакос Мицотакис “Твиттердеги” баракчасына “Караиваздын дуушар болгон мыкаачылык грек коомун нес кылганын, ага кол салгандарды тез арада таап, сот жообуна тартуу зарылдыгын” жазды.

Европа комиссиясынын жетекчиси Урсула фон дер Ляйен “Твиттерге” “Сөз эркиндиги – баарынан ыйык” деп жазды. Ал журналисттин үй-бүлөсүнө көңүл айтып, аны өлтүрүү “ыпылас жана коркоктордун колунан келди” деди.

Йоргоса Караиваз – акыркы отуз жылда Грекияда киши колдуу болгон экинчи журналист. 2010-жылы Афиныда саясатчылар арасындагы ири өлчөмдөгү бир нече коррупциялык ишти иликтеген Сократис Гиолиас өз үйүнүн босогосунда өлтүрүлгөн.

 Булак: “Борбор Азия жаңылыктар кызматы”

Путин: Мигранттардын балдары жергиликтүү мектептердин билим деңгээлине терс таасирин тийгизүүдө

Орусия президенти мектептерде мигранттарын балдарынын саны көбөйүп жатканына тынчсызданып, алардын санын кыскартууга чакырды.

Улуттар аралык мамилелер боюнча кеңештин жыйынында сөз сүйлөгөн Владимир Путин мигранттардын балдары жергиликтүү мектептердеги билим деңгээлине терс таасирин тийгизип, улут аралык ажырымдын жаралышына себеп болуп жатканын айтты.

«Биздин мектептерде мигрант балдар орус тил чөйрөсүнө формалдуу эмес чындап эле көнгөндөй санда болушу керек. Тил эле эмес, маданиятка, деги эле орус баалуулуктарына сүңгүп кирип кеткендей болушу зарыл», —​ деди Орусия президенти.

Путин АКШ жана Европадагы бир катар өлкөлөрдөгү абалды мисал келтирди. Анын айтымында, айрым батыш өлкөлөрүндөгү мектептерде мигрант балдардын саны өтө көп болуп кеткендиктен, жергиликтүү жашоочулар балдарын ал окуу жайлардан алып кетишүүдө.

Владимир Путин мектептердеги мигрант балдарын санын катуу көзөмөлдөө керектигин белгиледи.

«Чоң кишилерге түшүнүктүү деп ойлойм. Ал жакта 100 пайыз мигранттардын балдарынан турган мектептер пайда болууда. Бул чоң көйгөй. Биз Орусияда мындай тажырыйбага эч качан жол бербешибиз керек !» — деди Путин.

Бул арада Орусия Агартуу министрлигинин аткаминерлери ар бир класста мигрант балдардын санын 10-20 пайыздан ашырбоого чакырышты.

«Жарандык жардам» комитети Владимир Путиндин билдирүүсү менен агартуу министрлигинин эрежелерине талдоо жүргүзүп, бул көптөгөн мигранттардын балдарынын билим алуусуна чекит коерун белгилейт.

 Булак: “Борбор Азия жаңылыктар кызматы”

ТИМ: Бишкек убактысы боюнча саат 22.00гө карата бүткүл элдик добуш берүүгө чет өлкөлөрдөгү шайлоо участкаларына келген шайлоочулардын саны 3037ге жетти

Бишкек убактысы боюнча саат 22.00дө РФдагы Южно-Сахалинск, Владивосток, Якутск, Иркутск, Красноярск, Сургут, Тюмень шаарларындагы Кыргыз Республикасынын Элчилигинин Канцеляриясынын аймагында түзүлгөн референдумдун 25 участкалары, ошондой эле Япониядагы, Кореядагы, КЭРдеги, Малайзиядагы, Казакстандагы, Түркмөнстандагы, Тажикстандагы, Өзбекстандагы, Пвкистандагы, Индиядагы, Ирандагы, Азербайжандагы, БАЭдеги Элчиликтерде, Гуанчжоу, Новосибирск, Алмата, Екатеринбург,  Дубай шаарларындагы Башкы консулдуктарда иштеп жаткан участкалар иштерин аякташты.
Азыркы учурда, бүткүл элдик добуш берүүнүн 23 участкаларында добуш берүү өтүп жатат.
Чет өлкөлөрдөгү бардык УШКлардагы референдум мыйзамдардын алкагында жана бардык эпидемиологиялык нормаларды сактоо менен өтүүдө, кандайдыр бир бузууларпо болгон жок.

Кыргызстандын АКШдагы элчилигиндеги шайлоо участкасында жаңы конституциянын долбоору боюнча референдумга добуш берүү башталды

Бүгүн, 2021-жылдын 11-апрелинде жергиликтүү убактысы боюнча саат 08:00дө  Кыргыз Республикасынын «Конституциясы жөнүндө» Мыйзамын кабыл алуу боюнча Референдумду өткөрүүгө Кыргыз Республикасынын АКШ жана Канададагы элчилигинде № 9034 шайлоо участогу ачылды. Бул тууралу ТИМдин  басма сөз кызматы билдирет.
Санитардык-эпидемиологиялык коопсуздуктун нормаларын аткаруу максатында социалдык дистанция жана жеке коргонуу каражаттарын колдонуу боюнча бардык керектүү чаралар көрүлүүдө.
Шайлоочулардын тизмесине кирген Кыргыз Республикасынын жарандары шайлоо участогунда саат 20:00гө чейин добуш бере алышат.

Улуу Британиянын ханышасы Елизавета IIнин күйөөсү принц Филипп 100 жашында дүйнө салды

Бүгүн, 9-апрелде Улуу Британиянын ханышасы Елизавета IIнин күйөөсү, Эдинбург герцогу Филипп 100 жашында дүйнө салды. Бул тууралуу чет өлкөлүк ММКлар Букингем сарайына шилтеме берип жазып чыкты.

 “Улуу даражалуу ханыша сүйүктүү күйөөсү, Эдинбург герцогу, принц Филипптин дүйнө салганын билдирди”, – деп айтылат билдирүүдө.

 

Принц Филипп 1921-жылдын 10-июнунда төрөлгөн.

Белгилей кетсек, герцог менен ханыша 1946-жылы баш кошушкан. Алар бирге 74 жыл өмүр сүрүштү.

Орусия Фергана облусунда өстүрүлгөн жашылча-жемиштерди киргизүүгө уруксат берди

Орусиянын ветеринардык жана фитосанитардык көзөмөл боюнча федералдык кызматы (Россельхознадзор) Фергана облусунан келген помидор менен калемпирден башка бардык өсүмдүктөрдү киргизүүгө уруксат берди.

Орусия Фергана облусунда өстүрүлгөн помидор менен калемпирди 2020-жылдын 26-ноябрынан бери кабыл албай калган. Буга помидордон вирус табылганы себеп болгон.

Кийин Орусияга жеткирилген кургатылган өрүктөн капр коңузу табылып, 2020-жылы 11-декабрда Фергана облусунда өндүрүлгөн бардык өсүмдүктүн түрүн сатып алууга тыюу салынган.

 Булак: “Борбор Азия жаңылыктар кызматы”

Египтте 3000 миң жыл мурун кум алдында калган "алтын шаар" табылды

Египттин Луксор калаасынан алыс эмес жерде археологдор 3000 жыл мурун кум алдында калган “алтын шаарды” табышты. Бул тууралуу экспедициянын жетекчиси, тарыхчысы Захи Хавасс билдирди.

Окумуштуулардын айтымында, бул Египетте табылган эң чон шаарлардын бири. Аны өлкөнү биздин заманга чейин 1391-1353-жылдары башкарган фараон Аменхотеп III негиздеген.

Шаардын көчөлөрүндө дубалдары үч метрге чейин жеткен үйлөр сакталып калган. Археологдор шаардын кайсы учурга таандык экенин шараптын идиштериндеги жазуулардан жана чийки кирпичтердеги Аменхотеп IIIтүн мөөрүнөн улам аныкташкан. Табылгалар арасында тамак-аш сактоочу идиштер жана инструменттер да бар. Шаардын түндүгүнөн көрүстөн табылган.

Казуу иштери 2020-жылы сентябрда башталган. Экспедиция Тутанхамондун сөөгү коюлган храмды табууну пландаган. Бир нече аптадан кийин археологдор чийки кирпичтен тургузулган курулуштарды, андан соң шаарды табышкан.

 Булак: “Борбор Азия жаңылыктар кызматы”

Рубль алсырап жаткан маалда Казакстан менен Беларус валюталарынын куну да түшүп кетти

Москваны саясий жана дипломатиялык чакырыктар тооруп турганда орус валютасы доллара карата кунун жоготууда.

Орусия Борбордук банкы акча-насыя саясатын катаалдаштыруу жөнүндө белги бергенине карабай, 7-апрелде рубль америкалык валютага карата беш айдан берки эң төмөнкү минимумга жетти.

Орусия менен чектеш Казакстан менен Беларустун да валюталары алсыроодо.

8-декабрда Казакстан биржа фондунда доллардын орточо курсу 433 теңгени түздү. Ай башында доллар 426,94 теңгеге сатылып жаткан.

Казакстан Улуттук банкы теңгенин курсунун кескин төмөндөшүнө рублдын алсыроосу жана мунайга болгон баанын туруксуздугу себеп болуп жатканын билдирди. Банктын монетардык операциялар департаментинин директору Нуржан Турсунханов орус валютасынын арзандоосун геосаясий, санкциялык тобокелчиликтер артып, рубль облигациясындагы чет өлкөлүк инвесторлор качып жаткандыгы менен түшүндүрдү.

Бул арада беларус рубли да рекордук деңгээлге түшүп, 2,66 долларга бааланууда.

Credit Suisse каржы тобунун талдоочулары рублдын алсыроосуна Чыгыш Украинадагы аскердик эскалация коркунучу да себеп болуп жатканын белгилейт.

 Булак: “Борбор Азия жаңылыктар кызматы”

CIT: орус аскерлери Украина чек арасынан 250 чакырым аралыкта жайгашты

Conflict Intelligence Team иликтөө тобу соцтармактардагы билдирүүлөргө талдоо жүргүзүп, орусиялык аскерлер Украинадан 250 чакырым аралыктагы Воронеж облусундагы талаа лагеринде топтошконун жазды.

CIT 2014-2015-жылдары орусиялык аскерлер чек арага мындан алда канча жакын келгенин белгилейт.

Иликтөөгө караганда, сүрөт жана видеолорго түшүп калган аскердик техникалардын көбү Борбордук аскердик округга таандык. Воронежге чейин алар жүздөгөн чакырым басып өтүп келишкен.

CIT иликтөө тобунун божомолунда лагерь «Погоново» аскердик полигонунун түндүгүндө, «Березка» бакча чарбасынан түштүккө карай кеткен бөлүгүндө жайгашкан. Бул аймак Украинанын Луганск менен Харьков облустарынын чек арасына 250 чакырымдай жакын. Жергиликтүү тургундар соцтармактарга аскерлер турак үйлөргө катарлаш жайгашканын жазышкан. Бул арада орус аскерлеринин Воронеж облусунун Украина менен 150 чакырым аралыктагы Острогожск районунда да топтолгону боюнча маалыматтар бар.

Conflict Intelligence Team орус аскерлери мындай жайгашуу менен Украинанын чабуулуна каршы даярданууда деп айтууга болбой турганын белгилейт.

«Жикчил куралдуу күчтөргө колдоо көрсөтүү үчүн аскерлерди Донбасска алып кирүү керек болсо, аларды Ростов облусуна жайгаштыруу логикага сыймак. Андыктан орусиялык күчтөрдүн Воронеж облусуна жайгашуусу коргонууга эмес, кол салууга ылайыкташкан», — деп жыйынтыкталган иликтөөдө.

Буга чейин эл аралык басылмалар Орусиянын төрт миңге чукул аскери Украинанын чек арасына жайгаштырылганын жазып чыгышкан. Орус аскер жетекчилери муну кезектеги машыгуу катары сыпаттаган.

 Булак: “Борбор Азия жаңылыктар кызматы”

Меню