30-июнда Ноокат шаарына жаңы мэр шайланды. Бул орунга КСДП партиясынан Жоомарт Нурдинов, ал эми “Республика – Ата Журт” партиясынан Бактыбек Мадмаров ат салышты.
Добуш берүүгө Ноокат шаардык Кеңешинин 21 депутатынын ичинен 20сы катышып, баары тең Жоомарт Нурдиновду бир добуштан кубатташты.
Айтмакчы, Жоомарт Нурдинов буга дейре Ноокат шаардык мэриясынын алдындагы муниципалдык менчик департаментин жетектеген.
Булак: “Майдан.kg”
Партиялык система менен министр тандоо кадр тармагынын тамтыгын чыгарып бүтө турган болду. Иш билеби, кыла алабы дебей эле ар кайсы партия өз «кочкорубузду» министр кылып алдык. Койкоюп олтурган «кочкор» министрлердин мурда кийин ким болгонуна деле кызыккан жан жок. Маселен Айыл-чарба, тамак-аш жана мелиорация министри Нурбек Мурашев бул тармакка анык эле адашып келгендей. Бул тармакта кызуу күрөш жүрүп, иш кайнап атса Мурашев мурдунан дем алып олтурат. Көчүгүн креслосунан көтөрсө эле ким бирөө ээлеп кетчүдөй болуп… Арийне, иштин көзүн билбегенден кийин келбей койсо деле чоң пайда келтирмек экен. Мурашев министрлик дегенге муштум эмес акыл керектигин айырмалабай туруп эле, аттап алган өңдүү. Ансыз да арабөк айыл чарбаны муштум жаатында тажрыйбасынан башка берекеси жок Мурашев тамамдайт өңдөнөт. Демократия деп делөөрүгөнүбүз менен биз анын кыйкырып-өкурмөй, ээн ооздонмой, анан кызмат бөлүштүрмөй жаатын гана ылгап алган өңдөнөбүз.
Булак: “Де Факто”
Казакстан «Маймак» станциясынын ижара акысын төлөбөй жатканын Жогорку Кеңештин жыйынында депутат Рыскелди Момбеков айтып чыкты. Бул туурасында Рыскелди мырза: «Кыргызстан «Луговой» станциясынын ижара акысын үзгүлтүксүз төлөп жатат. Казакстан Таластагы «Маймак» станциясын колдонгондугу үчүн ижара акысын, жер салыгына акча төлөбөй келе жатат», – деп билдирди. Буга байланыштуу маселени оңдуу чече албаган «Кыргыз темир жолунун» жетекчиси Алмазбек Ногойбаевди кызматтан алууну сунуштады.
Булак: “Фабула”
“Өнүгүү-Прогресс” партиясынын жана парламенттеги фракциянын лидери, депутат Бакыт Төрөбаев президенттикке талапкер катары расмий көрсөтүлдү. Тиешелүү чечим аталган партиянын кечээ, 27-июнда Бишкекте өткөн курултайында кабыл алынып, делегаттар өз лидерин бир добуштан колдоп беришти.
“Өнүгүү-Прогресс” партиясынын курултайына өлкөнүн бардык аймактарынан өкүлдөр, партия мүчөлөрү келген. Анда чыгып сүйлөгөн Бакыт Төрөбаев, талапкер катары айыл чарбасын өнүктүрүүгө артыкчылык берээрин, Евразия экономикалык биримдиктин алкагындагы кызматташтыкты колдой тургандыгын билдирди. Бакыт Төрөбаев андан тышкары ар кандай тоскоолдуктарга карабай, президенттик жарышта аягына чейин күрөшөрүн билдирди.
Курултайда сөз сүйлөгөн саясатчы Камчыбек Ташиев партиянын лидери Бакыт Төрөбаевге: “Кудай буюруп, сиз мамлекет башына келип калсаңыз кыргыз эли өкүнбөйт. Жараткандын назары түшкөн адам гана президент болот дейт, бул нерсе сизден кыйгап өтпөсүн. Мен башкалардай болуп сизге кеӊеш бере албайм. Анткени биз, экөөбүз замандашпыз, чогуу жасай турган иштер көп. Сиз бүгүн мекенчилдик боюнча айткан сөздөрүӊүзгө абдан ыраазы болдум. Сиздин партия жаш болсо да өлкөдө олуттуу саясий күчкө айланганын эч ким тана албайт”, – деди Ташиев.
Жогорку Кеӊештин депутаты Жанар Акаев өлкөдө кадр саясаты талкаланганын, бул көйгөй шайлоодон кийин жоюлат деп үмүттөнөрүн айтты. “Шайлоодо административдик ресурстарды колдонгон адамдарды баарыбыз биргеликте уяткаралы. Баарыңыздардын колуңуздарда смартфон бар. Эгерде студенттерди, жаштарды бийлик кимдир бирөөнү колдоого чакырса, видеого тартып алып жайылткыла. Биргеликте алардын бетин ачабыз”, – деди Акаев.
Булак: Кyrgyztoday.kg
Арстанбек Абдылдаев президенттикке талапкер катары катталуу үчүн Борбордук шайлоо комиссиясына арыз берди. Бул тууралуу Боршайкомдон кабарлашты.
Өзүн өзү талапкерликке көрсөтүп жаткан 49 жаштагы Арстанбек Абдылдаев “Аурдин” ишканасын жетектейт.
Ал Арстан Алай деген ат менен да белгилүү. 2011-жылкы президенттик шайлоого катышкан. Ошол эле жылы кеңири коомчулукка “Зима не будет” (“Кыш болбойт”) деген сөздөрү менен таанылып, интернетте кызуу талкуу жараткан.
Быйыл 15-октябрда Кыргызстанда президенттик шайлоо өтөт.
Булак: “Борбор Азия жаңылыктар кызматы”
Дүйшөмбүдө Монголияда өткөн президенттик шайлоо учурунда жеңүүчү аныкталган жок. Бул тууралуу өлкөнүн Борбордук шайлоо комиссиясы билдирди.
Маалыматка караганда, оппозициялык демократиялык партиядан талапкер, чыгыш жеке күрөшү боюнча мурдагы чебер Халтмаа Баттулг көпчүлүк добушка ээ болуп, бирок жеңишти камсыздай турган 50 пайызды топтой алган жок. Буга байланыштуу эки жума аралыгында экинчи тур өтөт.
Учурда добуштарды эсептөө жүрүүдө. БШК парламент спикери Миеэгомбын Энхболд менен Элдик-революциялык партиядан Сайнхуугийн Ганбаатардын кимиси экинчи орунду алганын жана кийинки шайлоого чыгарын айта элек.
Булак: “Борбор Азия жаңылыктар кызматы”
Казакстанда парламенттин жогорку палатасынын депутаттарын шайлоонун алдында «жымжырттык күнү» жарыяланды — добуш берүү күнү жана андан мурунку күнү үгүт иштерине тыюу салынган. Учурда шайлоо комиссиялары 28-июнда өтчү шайлоого даярдыктарды көрүүдө.
Борбордук шайлоо комиссиясынын маалыматына караганда, каттоодон өткөн талапкерлердин акыркы тизмесинде 38 киши бар, алардын 16сы сенат депутаты болуп тандалат.
Сенаттын курамында — 47 депутат болот, алардын 32си ар бир облустагы, республикалык маанидеги шаалардагы жана борбор шаардагы шайлоочулар коллегияларынын жыйындарында тандалат, 15 сенатор президент тарабынан дайындалат.
Маалыматка караганда, бул шайлоодо алгачкы жолу шайлоо коллегиясынын электрондук каттоосун колдонуу пландалууда. Жергиликтүү маалымат каражаттарынын билдирүүлөрү боюнча, добуш берүүгө катыша турган шайлоо коллегияларынын саны 3 293 кишиге жакын. Баарынан да Алматы (333), Чыгыш Казакстан (318) жана Түштүк Казакстан (312) облустарында шайлоочулар коллегиясынын саны көп.
Булак: “Борбор Азия жаңылыктар кызматы”
Президент Алмазбек Атамбаев премьер-министр Сооронбай Жээнбековду алдыдагы президенттик шайлоо үчүн мыкты талапкер деп атады. Бул тууралуу Татарстанга жасаган сапарынын алкагында, 24-июнда журналисттердин суроолоруна жооп берип жатып айтты.
«Мен ишенем, КСДП курултайында ал кишини толук колдойт. Бул мамлекет үчүн жакшы тандоо . Ал тартиптүү, чынчыл адам»,- деген Атамбаев Сооронбай Жээнбековду 1995-жылдан бери тааный турганын белгиледи:
– Ал кезде парламентте чогуу депутат болгонбуз. Ошол жылы “Реформа” деген фракция түзгөнбүз. Ага 70 депутаттын 29у кирген. Бул ошол кездеги президентке жаккан эмес. Сооронбай Жээнбеков менин орунбасарым болгон. 20 жылдан ашуун убакыттан бери аны акыйкатчыл адам катары тааныйм.
КСДПнын саясий кеңеши президенттикке Сооронбай Жээнбековду сунуштаган. Бул маселе эми 15-июлда партиянын курултайында каралып, чечим кабыл алынат.
22-июнда Социал-демократиялык партиянын саясий кеңешинин төрага орун басары алмашып, парламент спикери Чыныбай Турсунбековдун ордуна президенттин эң жакын үзөңгүлөштөрүнүн бири Фарид Ниязов шайланган.
Бышыктала элек маалыматтарда Турсунбеков да президенттикке ат салышары айтылып жүрөт. Талапкерлерди каттоо 15-июнда башталган. Тактыга ат салышчулардын катарында бир нече белгилүү саясатчылардын аты аталууда.
Булак: “Борбор Азия жаңылыктар кызматы”
Туӊгуч окуу жайыбыз болгон Кыргыз Улуттук Университетинде акыркы жылдары ректорлук жаатындагы чыр-чатактар, кайра шайлоо, окутуучулук курамдын жаатташуусу өӊдүү “сериалдардын” аягы тыйылбай келген. Мындай башкаруучулук интриганын “ити чөп жей” баштагандыгынан улам аталган окуу жайдын да рейтинги өз салмагын жоготуп, билим берүү сапаты да аксаган эле. Айтор бул окуу жайды ар ким өз билгениндей башкаргысы келишкен. Айрымдары ар кандай жомок айтышса, айрымдары алкымдарын араандай ачып, коррупцияга да аралашып жиберишкен. Кыскасы атына жакшы эле көө жабышкан эле. Эми бул “күжү-күжүгө” чекит коюлат өӊдүү. Дегеним, туӊгуч билим борборубузга татыктуу жетекчи тандалды. Тааныйсыздар, мурунку билим берүү министри Канат Садыков улуттук университетке ректор болуп келди. Ишенич арткандар арбын, ийгилик каалайлы…
Булак: “Де-Факто”
Кыргыз Республикасынын Премьер-министри Сооронбай Жээнбеков бүгүн, 22-июнда, буйрукка кол койду. Ага ылайык, Дооталиев Улан Тимурович берген арызынан улам, Кыргыз Республикасынын юстиция министринин орун басары кызматынан бошотулду. Бул туурасында Кыргыз Республикасынын Өкмөтүнүн Аппаратынын маалыматтык камсыздоо бөлүмү билдирди.
