КЫЗМАТ-МАНСАП

30-май 2017ж., “Өнүгүү-Прогресс” саясий партиясынын Жалал-Абад шаардык өкүлчүлүгү төмөндөгүдөй билдирүү жасады: “Өнүгүү-Прогресс” саясий партиясы 2017-жылдын 28-майы күнү болуп өткөн Жалал-Абад шаардык кеңешинин депутаттарын шайлоого катышып, жеңишке жетишкен саясий партияларды куттуктайт жана 2016-жылдын 11-декабрында өткөн шайлоодо партиялар бир пикирге келе албастан, шаардык кеңеш тарап кеткендигин эске алып, бардык саясий партияларды (КСДП, Кыргызстан, Ата-Журт, Мекеним Кыргызстан жана Республика) шаардын келечегин талкулоо максатында тегерек столго чакырабыз!”

Булак: Kyrgyztoday.kg

Жусуп Баласагын атындагы кыргыз улуттук университетинин ректорун шайлоо 27-майда өттү. Каттоого алынган 1344 шайлоочунун 1216сы катышты. Жети талапкер ат салышып, добуш берүүнүн жыйынтыгында ректордун милдетин аткаруучу, мурдагы билим берүү жана илим министри Канат Садыков 776, проректор Таалайбек Каракеев 264 добуш, Туратбек Суранаев 66 добуш топтоп, алдыңкы үч орунду ээлешти. Баарына каршы 27 адам добуш берген. Эми алдыңкы үч орунду алган бул талапкерлердин ысымдары өкмөткө жиберилет. Эреже боюнча, Улуттук университеттин ректорун окуу жайдын кызматкерлери шайлап, өкмөт бекитет.

Булак: “Фабула”

Өлкөдөгү фаворит окуу жайы болгон Ж. Баласагын атындагы улуттук университетке үч күндөн кийин ректор болчулар таймашка түшөт. Негедир күндөн-күнгө талапкерлердин саны азайып баратат. Мурда ректор болгусу келип оолуккандардын кээ бири талапкерлигин кайра алып салды. Бул эмнеден кабар берет? Албетте, күчтүү атаандаштан тайсалдоо экени талашсыз.

Негизи азыркы талапкерлердин ичинен бараандуусу Канат Садыков экенин танууга мүмкүн эмес. Мурда министрлик кызматты аркалап жүргөн киши кантип эле ректорлукка жарабасын деген суроо сөзсүз берилет. Акыркы күндөрдөгү жолугушууларга да көбү келбей калууда. Демек, эмитен эле упайдын көбүн Канат мырза бөктөрүп кетээри ачык байкалууда. Канчалык тескериленсе деле баары бир оомат Садыковго оогону турганы калетсиз.

Булак: “Жаңы Ордо”

Кыргыз Республикасынын Премьер-министри Сооронбай Жээнбеков кечээ, 25-майда кол койгон буйрукка ылайык, Омокеев Айбек Талгатбекович Кыргыз Республикасынын Тышкы иштер министрлигинин статс-катчысы болуп дайындалды.

Кыргыз Республикасынын Премьер-министри  Сооронбай Жээнбеков  буйрукка кол койду. Ага ылайык,  Усенова Эльмира Валентиновна Кыргыз Республикасынын Өкмөтүнүн Ысык-Көл облусундагы ыйгарым укуктуу өкүлүнүн орун басары болуп дайындалды. Бул туурасында Кыргыз Республикасынын Өкмөтүнүн Аппаратынын маалыматтык камсыздоо бөлүмү билдирет.

Атамбаев кол койгон Жарлыкка ылайык Новиков Артем Эдуардович Кыргыз Республикасынын Президентинин Аппаратынын финансы-экономикалык талдоо жана өнүгүүгө мониторинг жүргүзүү бөлүмүнүн башчысы болуп дайындалды.

Кыргыз Республикасынын Премьер-министри Сооронбай Жээнбеков «Мамлекеттик жарандык кызмат жана муниципалдык кызмат жөнүндө» Кыргыз Республикасынын Мыйзамынын 46-беренесинин 1-бөлүгүнө ылайык буйрукка кол койду.  Бул туурасында Кыргыз Республикасынын Өкмөтүнүн Аппаратынын маалыматтык камсыздоо бөлүмү маалымдайт.

Ага ылайык Бекманбетов Фархад Шаршенович Кыргыз Республикасынын Маданият, маалымат жана туризм министринин орун басары ээлеген кызматынан бошотулду.

Кыргызстандын тарыхый жана маданий мурастарын тереңдеп үйрөнүү, көп улуттуу калктын биримдигин чыңдоо үчүн шарттарды түзүү, кыргыз мамлекеттүүлүгүн бекемдөөгө көмөктөшүү, атуулдук, мада­ний жана гуманитардык тармактарда эл аралык байланыштарды өнүктүрүү үчүн 2012-жылы түзүлгөн “Мурас” фондунун жетекчиси болуп Кыяз Молдокасымов дайындалды. Фондду буга чейин тарыхчы, окумуштуу Тынчтыкбек Чоротегин башкарып келген. Молдокасымов анын орун басары болуп иштеген. Сыягы, президенттин ата-бабасын бекер изилдебеген экен. Акыбети кайтты көрүнөт…

Булак: “Фабула”