КЫЗМАТ-МАНСАП

Кыргыз Республикасынын Президенти Садыр Жапаров кол койгон тескемеге ылайык, Кыргыз Республикасынын Конституциясынын 71-беренесин жетекчиликке алып, “Кыргыз Республикасынын Куралдуу Күчтөрүнүн Тартип уставы жөнүндө” Кыргыз Республикасынын 1998-жылдын 7-августундагы № 116 Мыйзамы менен кабыл алынган Кыргыз Республикасынын Куралдуу Күчтөрүнүн Тартип уставынын
75-пунктунун б пунктчасына ылайык жүктөлгөн милдеттерин тийиштүү түрдө аткарбагандыгы үчүн Кыргыз Республикасынын коргоо министри Бекболотов Бактыбек Асанкалиевичке катуу сөгүш берилди.

Кыргыз Республикасынын Президенти Садыр Жапаров бир катар жергиликтүү соттордун ыйгарым укуктарын мөөнөтүнөн мурда токтотуу жөнүндө Жарлыкка кол койду.

Кыргыз Республикасынын Конституциясынын 70-беренесинин 4-бөлүгүнүн 4-пунктуна жана 96-беренесинин 2-бөлүгүнө, “Кыргыз Республикасынын судьяларынын статусу жөнүндө” Кыргыз Республикасынын конституциялык Мыйзамынын 29-беренесинин 2-бөлүгүнүн 14-пунктуна жана 31-беренесинин 4-бөлүгүнүн 4-пунктуна ылайык жана Кыргыз Республикасынын Судьялар кеңешинин тартип жазасын колдонуу жөнүндө сунушу боюнча

• Бишкек шаарынын Ленин райондук сотунун судьясы Туражанова Жамиля Асадуллаевнанын жана
• Ысык-Көл облусунун Тоң райондук сотунун судьясы  Каримбеков Ниматилла Исмаиловичтин ыйгарым укуктары мөөнөтүнөн мурда токтотулду.

Алар Кыргыз Республикасынын жергиликтүү сотунун судьясы кызматынан судьянын жүрүм-турумунун кынтыксыздыгынын талаптарын бузгандыгына байланыштуу бошотулду.

Кыргыз Республикасынын Президенти Садыр Жапаровдун дарегине Кыргыз Республикасынын Сот адилеттиги боюнча кеңеши Ысык-Көл жана Жалал-Абад облустарынын айрым жергиликтүү сотторунун судьялык кызматына беш талапкерди дайындоо боюнча сунуштарды киргизди.

Ал эми бир талапкер боюнча анын талапкерлигин кайтарып алуу боюнча  Кыргыз Республикасынын Сот адилеттиги боюнча кеңешине берген арызына байланыштуу, аны жергиликтүү соттун судьясынын бош кызмат ордуна дайындоо сунушу четке кагылды.

Тийиштүү мамлекеттик органдар тарабынан талапкерлерге карата берилген кошумча материалдарды эске алуу менен Мамлекет башчысы судьялык кызматка дайындоо үчүн бардык төрт талапкер боюнча Кеңештин сунуштары менен макул болду.

Президент Садыр Жапаров төрт талапкер боюнча жергиликтүү соттордун судьялык кызматтарына дайындоо жөнүндө жарлыктарды чыгарды, алар төмөнкү сотторго судьянын ыйгарым укуктарын жүргүзүү үчүн жиберилди:

• Жалал-Абад облусу:
  Мусурманкулов Бекмухаммет Лутуббилаханович;
• Ысык-Көл облусу:

Каракол шаардык соту:
Каипова Нурила Кочкоровна;
Эралиев Талайбек Каскаевич;

Жети-Өгүз райондук соту:
Асаналиев Нуркалый Жумабекович.

Бул жарлыктар кол коюлган күндөн тартып күчүнө кирет.

Бүгүн, 3-августта Кыргыз Республикасынын Президенти Садыр Жапаров кол койгон тескемеге ылайык, “Кыргыз Республикасынын Министрлер Кабинети жөнүндө” Кыргыз Республикасынын конституциялык Мыйзамынын 18-беренесинин негизинде Муканов Азамат Кенешевич Кыргыз Республикасынын Саламаттык сактоо министрлигине караштуу Милдеттүү медициналык камсыздандыруу фондунун төрагасы болуп дайындалды.

Бүгүн, 2-августта Кыргыз Республикасынын Президенти Садыр Жапаров кол койгон Жарлыкка ылайык, Султанов Талант Кушчубаевич Кыргыз Республикасынын Түркмөнстандагы Атайын жана Ыйгарым укуктуу Элчиси кызматынан бошотулду.