Menu

РАСМИЙ КАБАРЛАР

Республикалык штаб: COVID-19 үчүнчү толкуну учурунда жеке лабораторияларда жана медборборлордо ПЧР-тестирлөөнүн, КТ жана санариптик R-графия тейлөөсүнүн наркы төмөндөтүлөт

Кыргыз Республикасынын биринчи вице-премьер-министри Артем Новиков Республикалык ыкчам штабдын кезектеги жыйынын өткөрдү. Бул тууралуу өкмөттүн аппаратынын басма сөз кызматы билдирет.

Кеңешменини алкагында өлкө аймактарындагы эпидемиологичялык абал, ооруканаларды дары-дармек каражаттары, медициналык кызматкерлер, жабдуулар менен камсыздоо боюнча актуалдуу маселелер талкууланды. Бүгүнкү күндө жеке лабораториялардагы ПЧР-тестирлөөнүн баасын 30%га, же 2300 сомдон 1600 сомго чейин төмөндөтүү тууралуу макулдашууга жетишилди. Айрым медиаборборлордо калк үчүн компьютердик томографиянын, санариптик R-графия тейлөөсүнүн наркы 20%га чейин төмөндөтүлөт, ошондой эле калкка аталган тейлөөнү көрсөтүү үчүн жеке борборлордогу күнү-түнү күзөт аныкталган. Жакынкы айларга карай COVID-19 дарылоо үчүн дары-дармек каражаттарына баалар турукташтырылат. Башка жашоо үчүн маанилүү дары-дармектерге бааны төмөндөтүү жана тоңдуруу боюнча иштер жүрүүдө.

Артём Новиков ооругандарды көзөөмөлдөө, аларды аныктоо боюнча мониторингдин жана оору жугузуп алган жактардын үй карантинин сактоосун көзөмөлдөө начар жүргүзүлүп жаткандыгын белгиледи.

«Республика боюнча, өзгөчө Бишкек шаарында жана Чүй облустарында коронавирус инфекциясы менен ооругандардын саны жогорулап жатат. Бейтаптарды кабыл алуу үчүн кошумча стационарлар ачылган. Коомдук жайларда санитардык-эпидемиологиялык коопсуздук чаралары күчтөндүрүлгөн. Коңшу өлкөлөрдө COVID-19 вирустун жаңы жугуштуу штаммдары менен ооругандардын саны жогорулап жаткандыгы байкалууда. Биз өлкөгө кирүүдө коопсуздук чараларын күчтөндүрдүк, бирок тармактык түзүмдөр тийиштүү текшерүүлөрдү жүргүзүп, келген жактардын ден-соолугунун абалын андан ары көзөмөлдөөнү үзгүлтүксүз контролдо кармашы кажет. 8-апрелде мен стационардын ачылышына барып, “кызыл зонаны” көрүп, андагы жабдуулар жана дарылоо алгоритмдери менен таанышып чыктым. Коштоп жүрүүчү жактар менен иш алып барууда катуу тартип сакталышы керек. Бардык зоналар кант диабети, жүрөк кан-тамыр ооруларына, бөйрөк оорусуна кабылган өнөкөт оорулуу бейтаптар үчүн дары-дармектердин запасы менн камсыздалышы керек», – деди ал.

Анын айтымында, бүгүнкү күндө саламаттык сактоонун биринчи деңгээли жана «кызыл зона» ортосундагы өз-ара аракетешүүнүн так механизми түзүлгөн эмес. Оорулууларды дартын аныктоого кабыл алышпайт.

Штаб соңунда Саламаттык сактоо жана социалдык өнүктүрүү министрлигине бир катар тапшырмалар берилди. Атап айтканда, 13-апрелге чейин саламаттык сактоонун биринчи деңгээлиндеги медкызматкерлеринин коронавирустук инфекцияга кабылган бейтаптарга медициналык көмөк көрсөтүү боюнча ишинин алгоритмин иштеп чыгуу тапшырылды. Буга катар ведомствого 13-апрелге чейин Бишкек жана Чүй орблустарынын 118 кызматынын базасында психолологиялык көмөккө муктаж болгон бейтаптар үчүн психологдун консультациясын уюштуруу; бир жумалык мөөнөттө бардык саламаттык сактоо уюмдарында коронавирустук инфекция менен ооругандарды эсепке алуу боюнча бирдиктүү электрондук реестр ишке киргизүү; сунушталып жаткан грант жана техникалык көмөк көрсөтүү алкагында меджабдууларды сатып алуу боюнча бардык процедураларды жыйынтыктоо жана алардын өз учурундла алынып келинишин камсыздоо тапшырылды.

Кыска мөөнөттө Ош, Талас жана Нарын шаарларында жаңы жугуштуу ооруканалар ооруканасын куруу иштери жыйынтыкталып, аймактарда 10 вирусологиялык лабораторияларды куруу боюнча иштер башталышы керек.  Үч күндүк мөөнөттө өлкө боюнча саламаттык сактоо уюмдарындагы борбордоштурулган суюк кычкылтек берүү тутумунун ишин жана коопсуздугун текшерүү зарыл.

COVID-19 – бул мифтик оору эмес. Бүгүн баарыбыз бул вируска каршы күрөшүүдөбүз. Ар бирибиздин аракетибизден жарандарыбыздын жашоосу жана ден-соолугу көзкаранды. Бүгүнкү күндө каражат жана күчүбүз жетиштүү. Мында Саламаттык сактоо жана социалдык өнүктүрүү министрлиги абал начарлап кеткен учурда жалпы координацияны камсыздоо үчүн волонтерлор менен иш алып баруусу керек.

Дары-дармек каражаттарын жана медициналык буюмдарды экспорттоого убактылуу тыюу салынды

Дары-дармек каражаттарын жана медициналык буюмдарды Кыргыз Республикасынан экспорттоого алты айлык мөөнөткө убактылуу тыюу салынды. Тийиштүү токтомго Кыргыз Республикасынын Премьер-министри Улукбек Марипов кол койду. Бул тууралуу өкмөттүн аппаратынын басма сөз кызматы билдирет.

Аталган тыюу салуу Кыргыз Республикасынын Өкмөтүнүн биринчи кезектеги бекитилген 100 күндүк чаралар планынын алкагында киргизилген.

Аталган токтомдун максаты – Кыргыз Республикасынын калкынын өмүрүн жана ден-соолугун коргоо, өлкөдөгү эпидемиологиялык кыйын кырдаалдын алдын алуу үчүн дары-дармек каражаттары жана медициналык  буюмдар менен камсыздоодо жетишсиздикке жол бербөө.

Документке ылайык, Кыргыз Республикасынын Экономика жана финансы министрлиги убактылуу тыюу салуу жөнүндө белгиленген тартипте Дүйнөлүк соода уюмунун Коргоо чаралары боюнча комитетине жана Евразия экономикалык комиссиясына кабарлашы зарыл.

Экспорттоого убактылуу тыюу салынган дары-дармек каражаттарынын жана медициналык  буюмдардын тизмеси тиркелген.

тиркеме.docx

БШК: Жергиликтүү кеңештердин депутаттарын шайлоодо добуш берүүнүн алгачкы жыйынтыктары чыгарылды

Жергиликтүү кеңештердин депутаттарын шайлоодо добуш берүүнүн алгачкы жыйынтыктары чыгарылды. Бул тууралуу КР БШК Маалымат бөлүмү билдирет.

Алдын ала маалыматтарга ылайык, саат 00.00гө карата 92,52% шайлоо участкаларынан же 2273 шайлоо участкаларынын 2262 шайлоо участкаларынан добуш берүүнүн жыйынтыктары жөнүндө маалыматтар алынды.

Шаардык жана айылдык кеңештердин депутаттарын шайлоого жалпы 1 024 891 шайлоочу катышты же шайлоочулардын 30,89% түздү.

Шаардык кеңештерге шайлоого 25,89% шайлоочулар катышты (303 176 шайлоочу).

Айылдык кеңештерге шайлоого 31,81% катышты (721 715 шайлоочу).

 

БШК: Референдумга 1 млн 294 076 жаран же шайлоочулардын 35,9% катышты, алардын 79,31% жаңы конституцияга "макул" деп добуш беришти

Кыргыз Республикасынын Шайлоо жана референдум өткөрүү боюнча борбордук комиссиясы Кыргыз Республикасынын референдумундагы добуш берүүнүн алдын ала жыйынтыктары жөнүндө маалымдайт.

Маалыматтар шайлоо участкаларынын 92% нан түштү. Маалыматтардын 74% добуш берүү аяктагандан кийинки алгачкы 17 мүнөттө келген.

Алдын ала алынган маалыматтар боюнча 1 294 076 жаран же 35,9% добуш берүүгө катышкан.

Жарактуу бюллетендердин саны – 1 204 946 же 93%, жараксыз бюллетендер – 89 830 же 6,94%.

Референдумдун 1 026 917 катышуучусу же референдумга катышуучулар 79,31% “макул” деп добуш берди.

176 701 адам же референдумдун жалпы санынын 13,65% “каршы” добуш берди.

Аймактык жактан алганда, добуштар төмөнкүдөй бөлүштүрүлдү:

 Бишкек: “Макул” – 60,8%, “Каршы” – 36%,

Ош шаары: “Макул” – 80,25%, “Каршы” – 12,12%,

Жалал-Абад облусу: “Макул” – 84,23%, “Каршы” – 8%,

Ысык-Көл облусу: “Макул” – 85,18%, “Каршы” – 9,11%,

Нарын облусу: “Макул” – 82,76%, “Каршы” – 11,22%,

Ош облусу: “Макул” – 84,57%, “Каршы” – 7,58%,

Талас облусу: “Макул” – 74,98%, “Каршы” – 16,05%,

Чүй облусу: “Макул” – 70,9%, “Каршы” – 21,31%,

Баткен облусу: “Макул” – 84,2%, “Каршы” – 8,82%.

Чет өлкөлөрдөн алынган маалыматтар тутумга киргизиле элек.

Кыргыз Республикасынын БШКсы добуштарды кол менен эсептөө маалыматтарынын негизинде добуш берүүнүн жыйынтыктарын чыгарат. Жыйынтыктар чыгарылгандан кийин АШКлар тиешелүү аймактарда добуш берүүнүн жыйынтыктарын аныкташы керек. Андан кийин БШК ушул кыскача протоколдордун негизинде өлкөдөгү добуш берүүнүн жыйынтыктарын чыгарат. Жыйынтыктоонун мөөнөтү 35 күндөн ашпайт, бирок практика көрсөткөндөй, колдонулган технологиялардын жардамы менен процесс 10-15 күнгө созулат.

Эгерде “Референдум жөнүндө” Кыргыз Республикасынын конституциялык мыйзамына ылайык, референдумдун катышуучуларынын тизмесине киргизилген референдумдун жалпы катышуучуларынын жалпы санынын 30% дан ашыгы катышса, ал өттү деп эсептелет.

Эгерде добуш берүүгө катышкан адамдардын жалпы санынын 50% дан ашыгы добуш берсе, ал кабыл алынды деп эсептелет.

Премьер-министр Улукбек Марипов жергиликтүү кеңештердин депутаттарын шайлоодо жана референдумда добуш берди

Кыргыз Республикасынын Премьер-министри Улукбек Марипов Бишкек шаардык кеңешине депутаттарды шайлоодо жана референдумда добуш берди. Бул тууралу өкмөттүн басма сөз кызматы билдирет.

Улукбек Марипов Бишкек шаарындагы № 40 жалпы билим берүүчү мектептин имаратында жайгашкан № 1032 шайлоо участогунда добушун берди.

Видео - Президент Садыр Жапаров жергиликтүү кеңештердин депутаттарын шайлоого жана жаңы Конституциянын долбоору боюнча референдумга добуш берди

Кыргыз Республикасынын Президенти Садыр Жапаров бүгүн, 11-апрелде, жергиликтүү кеңештердин депутаттарын шайлоого жана өлкөнүн жаңы Конституциясынын долбоору боюнча референдумга добуш берди.

Мамлекет башчысы Бишкек шаарындагы № 1053 шайлоо тилкесинде добуш берди.

Добуш бергенден кийин Президент жалпыга маалымдоо каражаттарына билдирүү жасап, анда Кыргызстанда 30 жылдан бери бүгүнкү күнгө чейин Конституция көп жолу өзгөргөндүгүнө токтолду.

Садыр Жапаровдун баса белгилешинче, Конституциянын жаңы вариантын даярдоо процессине аксакалдар, академиктер, укук жаатындагы окумуштуулар катышып, Баш мыйзамдын долбоорунун мазмунун коомчулук менен ачык талкуулашты.

Мамлекет башчысы өлкө жарандарын референдумга жана жергиликтүү кеңештерге шайлоого активдүү катышууга чакырды.

«Ким кантип жана эмнеге добуш берет — бул анын жеке тандоосу, биз эч кимди мажбурлай албайбыз. Бизде ачык-айкын шайлоо процесси болушу керек», — деп билдирди Президент Садыр Жапаров.

Министр Руслан Казакбаев ТүркПАнын байкоочулар миссиясы менен жолугушту

Кечээ, 9-апрелде Кыргыз Республикасынын Тышкы иштер министрлигинде Тышкы иштер министри Руслан Казакбаевдин менен Түркиянын Улуу Улуттук Жыйынынын депутаты Режеп Шекер жетектеген Түрк тилдүү өлкөлөрдүн Парламенттик ассамблеясынын (ТүркПА) Эл аралык байкоочулар миссиясы менен жолугушуусу болуп өттү. Бул тууралуу ТИМдин басма сөз кызматы билдирди.

Жолугушуунун жүрүшүндɵ ТИМ Башчысы Р.Казакбаев Кыргыз Республикасындагы референдумду даярдоого жана өткөрүүгө белгиленген кызыкчылык жана байкоого катышуу үчүн боордош түрк тилдүү мамлекеттеринен эл аралык байкоочуларга ыраазычылык билдирип өттү.

Учурдагы жолугушуудан пайдаланып, Министр Р.Казакбаев түрк парламентарийи Р.Шекерге 2021-жылдын 19-мартында Бишкек-Стамбул багыты боюнча учуп бара жаткан каттамда наристенин өмүрүн сактап калуу үчүн убагында көрсөтүлгөн алгачкы медициналык жардам менен ырасталган кесипкөйлүгү, кайраттуулугу жана гуманизми үчүн ыраазычылык билдирди. Кыргызстандагы социалдык тармактардын кыргыз сегментинде кеңири жайылган бул жаңылык жарыялангандан кийин, көптөгөн кыргыз жарандары Р.Шекердин кесипкөйлүгүн жогору баалашкандыгы белгиленди.

Ошол эле учурда, Тышкы иштер министри 2021-жылдын 11-апрелинде боло турган Кыргызстандагы маанилүү саясий окуялар жана өлкө жетекчилиги тарабынан таза жана акыйкат шайлоону камсыз кылуу боюнча көрүлүп жаткан аракеттер жөнүндө маалымдады. Эркиндикти сүйгөн кыргыз эли өнүгүүнүн демократиялык жолунан тайбай тургандыгы баса белгиленди.

Ошондой эле Р.Казакбаев 31 мамлекеттин жана 10 эл аралык уюмдардын өкүлдөрү болгон 183 эл аралык байкоочуну, ошондой эле 25 ММК өкүлдөрүн аккредитацилоо боюнча иш жүргүзүлгөндүгү тууралуу маалымдады.

Ушуну менен бирге, Министр Кыргыз Республикасынын Конституциясынын долбоорун даярдоо боюнча Кыргыз Республикасынын Жогорку Кеңешинде, ММКнда жана коомчулукта ачык жана кеңири талкууга коюлган Конституциялык кеңешменин иши жөнүндө маалымат берди. Бул алкакта, Р.Казакбаев ТүркПАнын Миссиясына 15 “макул” жана “каршы” үгүт топтору жөнүндө маалымат берди.

Мындан тышкары, Р.Казакбаев маектештердин Кыргыз Республикасы Венеция комиссиясына жана башка эл аралык эксперттерге Кыргызстандын Конституциясынын долбоору боюнча ачык конструктивдүү талкууларды өткөрүүнү сунуш кылгандыгына көңүлүн бурду.

Өз кезегинде, Миссиянын башчысы Режеп Шекер Кыргызстан элинин келечеги үчүн маанилүү кадамдарды жасап жаткандыгын белгилеп, шайлоону жана референдумду ийгиликтүү өткөрүүнү каалады. Шайлоо процессинин натыйжалары Кыргызстандын мындан аркы өнүгүүсүнө жана гүлдөп-өнүгүшүнө өбөлгө болот деп үмүттөндү.

ТүркПАнын эл аралык байкоочулары шайлоого жана референдумга даярдыктын жогорку деңгээлин, анын ичинде Кыргыз Республикасынын жарандарынын шайлоо укуктарын ишке ашырууда заманбап технологияларды колдонууда жетишкендиктерди белгилешти.

Маалымат үчүн: Түрк тилдүү өлкөлөрдүн Парламенттик ассамблеясы (ТүркПА) – Азербайжан, Казакстан, Кыргызстан жана Түркия парламентарийлерин бириктирген эл аралык уюм. ТүркПАнын негизги милдети – тарыхый, маданий жана тил биримдигинин негизинде мүчө-өлкөлөрдүн ортосундагы парламенттер аралык диалогду өнүктүрүүгө көмөк көрсөтүү.

Камчыбек Ташиев: "Чек ара маселеси боюнча бардык чечимдер мамлекет кызыкчылыгы үчүн кабыл алынууда жана кабыл алынмакчы"

Кыргыз Республикасынын мамлекеттик чек арасын делимитациялоо жана демаркациялоо боюнча өкмөттүк делегациянын башчысы – Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиев чек ара маселеси боюнча өкмөттүк комиссиянын кеңешмесин өткөрдү. Күн тартибине ылайык, кыргыз-өзбек мамлекеттик чек арасын делимитациялоо жана демаркациялоо боюнча өкмөттүк делегациялардын жыйынтыгы боюнча үстүбүздөгү жылдын 25-мартында Ташкент шаарында кол коюлган Протокол талкууга алынды. Бул тууралуу өкмөттүн аппаратынын басма сөз кызматы билдирет.

Камчыбек Ташиев белгилегендей, Протоколдо көрсөтүлгөн бардык чечимдер эки өлкөнүн мамлекеттик кызыкчылыктарын эске алуу менен чечилген.

«Бардык чечимдер мамлекеттин, чектеш аймактарда жашаган жарандардын кызыкчылыгы үчүн кабыл алынууда жана мындан ары карай да кабыл алынмакчы. Протоколдун ар бир пункту талашка түшүп, көптөгөн күч-аракеттер аркылуу гана мамлекеттик жерибиздин ар бир метрин жактадык. Учурда эл арасында толук маалыматка ээ болбостон, талдоого албастан мени сынга алгандар болууда. Мен, өкмөттүк делегациянын башчысы катары, өзүмө чоң жоопкерчиликти алдым жана убакыт бардыгын өз ордуна коюп, кезинде бул тарыхый чечим болгондугун айтышат», – деди Камчыбек Ташиев.

Ошондой эле ал кошумчалагандай, мамлекеттик жана жергиликтүү бийлик органдары аталган протокол боюнча маалыматтык-түшүндүрүү кампаниясын күчтөндүрүүсү зарыл.

«Жер-жерлердеги жарандарга так маалымат жетпей жатат. Мен бардык региондорду кыдырып чыктым, бирок бул жетишсиз, ар бир адам менен жолугушуп, жеткиликтүү тил менен протоколдун ар бир пунктун түшүндүрүү керек. Маалымат калкка толук жеткирилгенде гана кабыл алынган чечимдердин акыйкаттыгына шек жаралбайт», – деп билдирди өкмөттүк делегациянын башчысы.

Камчыбек Ташиев белгилегендей, кайсы тилкелер такталгандыгын картадан көрсөтүү керек.

Камчыбек Ташиев кол коюлган Протоколду келечекте ишке ашырууга тартылган мамлекеттик органдардын аткаруучулук тартибин баса белгиледи.

«Бардык тапшырмалар сапаттуу жана өз мөөнөтүндө аткарылышы тийиш. Биринчи кадам жасалды, бирок алдыда чоң жоопкерчиликтүү иштер турат. Мамлекеттик жана жергиликтүү бийлик органдары бул маселени өзгөчө көзөмөлүнө алсын. Чек ара маселеси артыкчылыктуу каралышы кажет», – деп жыйынтыктады Камчыбек Ташиев.

Мамлекеттик жана жергиликтүү бийлик органдарына Протоколдун мындан аркы ишке ашырылышы боюнча, мамлекеттик чек аранын өтүүсүнүн долбоордук линиясын белгилөө боюнча талаа иштерин өткөрүүнү тездетүү тапшырмасы берилди.

Президент Садыр Жапаров Эл аралык дзюдо федерациясынын башчысы Мариус Визер менен жолугушту

Кыргыз Республикасынын Президенти Садыр Жапаров бүгүн, 9-апрелде, Эл аралык дзюдо федерациясынын президенти Мариус Визер жана уюмдун Вице-президенти Обейд Аль Анзини менен жолугушту. Бул тууралуу президенттин аппаратынын басма сөз кызматы билдирет.

Кыргызстан менен Эл аралык дзюдо федерациясынын кызматташуусун активдештирүү, ата мекендик спортту өнүктүрүү пландары жана багыттары талкууланды.

Мамлекет башчысы Федерациянын жетекчилиги ишеним көрсөткөндүгү үчүн ыраазычылык билдирди. Анын натыйжасында Кыргызстанда биринчи жолу эркектер жана аялдар арасында дзюдо боюнча Азия жана Океания чемпионаты болуп өттү.

Садыр Жапаров чемпионат бийик деңгээлде уюштурулуп, жогорку деңгээлде өткөрүлгөнүнө баа берип, ага өзү да кунт коюу менен көз салганын баса белгиледи.

Президент бул кадыр-барктуу спорттук иш-чара өлкөдө артыкчылык берилген жана өнүгүп келе жаткан спорт түрү болгон кыргыз дзюдосу үчүн маанилүү окуя деп атады.

Эл аралык дзюдо федерациясынын президенти Мариус Визер Кыргызстанды дзюдо боюнча Азия жана Океания чемпионатында алган биринчи алтын медалы менен куттуктап, бул жаш муундардын спортко кызыгуусуна түрткү болот деген тилегин билдирди.

Ал өлкөдө дзюдону жайылтуу жана өнүктүрүү боюнча кыргыз тараптын пландарын канааттануу менен белгилеп, Федерация Кыргызстанды бул багытта мындан ары да колдой берерин кошумчалады. Ал республикада дзюдо менен машыгуу шарттарын жакшыртуу үчүн материалдык-техникалык базаны өркүндөтүү боюнча биргелешкен кызматташуу мүмкүнчүлүктөрүн карап чыгууну сунуштады.

Мариус Визердин Эл аралык дзюдо федерациясы планетанын 5 континентинде 204 федерацияны ичине камтыйт жана жыл сайын 30га чейин ири спорттук мелдештерди өткөрүп турат.

Ал мындан ары да жигердүү кызматташууга даярдыгын билдирип, Садыр Жапаровду үстүбүздөгү жылдын июнь айына Будапешт шаарында пландалган дзюдо боюнча Дүйнө чемпионатына келип кетүүгө чакырды.

Президент Садыр Жапаров Эл аралык дзюдо федерациясы менен кызматташуу ийгиликтүү болуп жатканын белгилеп, келечекте өз ара аракеттенүү мындан дагы кеңейе тургандыгына ишенимин билдирди.

Белгилей кетсек, 2021-жылдын 6-апрелинен 9-апрелине чейин Бишкекте дзюдо боюнча аялдар жана эркектер арасында Азия жана Океания чемпионаты болуп, ага 29 мамлекеттин өкүлдөрү катышкан.

Элчи Оруджев президент Садыр Жапаровду Азербайжанга келип кетүүгө чакырды

Кыргыз Республикасынын Президенти Садыр Жапаров бүгүн, 9-апрелде, Азербайжан Республикасынын Кыргызстандагы атайын жана толук ыйгарым укуктуу элчиси Гидаят Оруджевди кабыл алды. Бул тууралуу президенттин аппаратынын басма сөз кызматы билдирет.

Эки өлкө ортосундагы саясий-дипломатиялык, соода-экономикалык, социалдык-гуманитардык  жана башка чөйрөлөрдө кызматташуу маселелери боюнча пикир алмашуу болду.

Мамлекет башчысы Кыргызстан Азербайжан менен салттуу достук байланыштарды мындан ары өнүктүрүүгө чоң маани берерин белгиледи.

Садыр Жапаров саясий диалогду жогорку деңгээлде колдоонун маанилүүлүгүнө токтолуп, кыргыз тарап Азербайжан Президенти Ильхам Алиевдин расмий сапар менен келерин күтүп жаткандыгын айтты.

Ал Кыргызстан менен Азербайжандын ортосундагы мамилелерди мындан ары өнүктүрүүнүн негизги багыттарынын бири катары олуттуу, бирок ишке аша элек потенциалга ээ экономикалык кызматташтыкты диверсификациялоону атады.

Кырдаалды оңдоп кетүү үчүн Мамлекет башчысы 2021-жылы Өкмөттөр аралык комиссиянын жыйынын өткөрүү, бизнес коомчулуктун өкүлдөрүнүн иш сапарларын уюштуруу, ошондой эле өз ара пайдалуу экономикалык долбоорлорду ишке ашыруу жолу менен эки өлкө ортосундагы соода- экономикалык кызматташтыкты активдештирүүнү сунуш кылды.

Ошону менен бирге Садыр Жапаров азербайжан тарапка эки долбоорду — Бишкек шаарындагы Кыргызстан-Азербайжан достук паркынын жана Гейдар Алиев атындагы жалпы билим берүүчү мектептин курулушун ишке ашырууга каржылык жардам көрсөткөндүгү үчүн ыраазычылык билдирди. Азербайжан башчысынын Кыргызстанга боло турган алдыдагы иш сапарына карата аталган курулуштар аяктаарын кошумчалады.

Ошондой эле Садыр Жапаров «Баку-Бишкек» түз аба каттамын калыбына келтирүү маселесине токтолуп, бул маселенин оң жагына чечүүнү караштырып, тездетүүнү сунуш кылды.

Элчи Гидаят Оруджев Азербайжандын Президенти Ильхам Алиевдин Садыр Жапаровго жолдогон саламын айтып, анын жетекчилиги астында өлкөлөр ортосундагы достук жана өнөктөштүк мамилелер мындан ары тереңдейт деген бекем ишенимин билдирди.

Ошондой эле ал Азербайжан тараптын Кыргызстанга жаңы инвестицияларды тартууга даяр экендигин маалымдап, экономикалык кызматташтыкты өнүктүрүү үчүн колдонула элек чоң мүмкүнчүлүктөрдү белгиледи.

Гидаят Оруджев Азербайжандын Президент Садыр Жапаров жүргүзүп жаткан реформалар саясатын колдой тургандыгын баса белгилеп, өз мамлекетинин жетекчилигинин атынан Мамлекет башчысын Азербайжанга сапар менен келип кетүүгө чакырды.

Президент Садыр Жапаров дагы Азербайжандын Президенти Ильхам Алиевге саламын жолдоп, Гидаят Оруджевдин дипломатиялык ишмердигине ийгиликтерди каалады.

Меню