Menu

РАСМИЙ КАБАРЛАР

Кытай Эл Республикасынын Төрагасы Си Цзиньпин Кыргызстан элин Нооруз майрамы менен куттуктады

Кытай Эл Республикасынын Төрагасы Си Цзиньпин Алмазбек Атамбаевди жана Кыргызстан элин Нооруз майрамы менен куттуктады.

«Кыргызстандын салттуу Нооруз майрамына  байланыштуу Кытай Өкмөтүнүн, элинин жана жеке өз атыман Сизге жана сиз аркылуу бүт Кыргызстан элине чын дилимден бул даңазалуу майрам менен куттуктоого уруксат этиңиз.

Быйыл жыл башында Сиздин Кытайга сапарыңыздын маалында биздин иштиктүү жана үзүрлүү сүйлөшүүлөрдү зор канааттануу менен эстейм. Кыргыз-кытай мамилелеринин өнүгүшүнө мен зор көңүл бурам жана эки өлкө менен элдеринин жакшылыгы үчүн биздин стратегиялык өнөктөштүктү жана көп тараптуу кызматташтыкты жаңы тепкичтерге жылдыруу үчүн биргелешип күч-аракет жумшоого даярмын», – деп айтылат куттуктоо телеграммасында.

Кытай Эл Республикасынын Төрагасы Си Цзиньпин Президент Алмазбек Атамбаевге бекем ден соолук, ишине ийгиликтерди, кыргыз элине бакыбаттык каалады.

Алмазбек Атамбаев Россия Президенти Владимир Путин менен телефон аркылуу сүйлөштү

Бүгүн, 20-мартта, Кыргыз Республикасы менен Россия Федерациясынын ортосундагы дипломатиялык мамилелердин орнотулушунун 25 жылдыгына байланыштуу  Алмазбек Атамбаев Россия Федерациясынын Президенти Владимир Путин менен телефон аркылуу сүйлөштү. Бул тууралуу КР Президентинин Аппаратынын басма сөз кызматы маалымдады.

Эки мамлекеттин башчылары тарыхый калыптанган достук байланыштарга, өз ара пайдалуу кызматташтыкка жана стратегиялык өнөктөштүккө негизденген кыргыз-россия мамилелери эки өлкөнүн элдеринин түпкү кызыкчылыктарына жооп берерин белгилешти.

Өткөн чейрек кылым аралыгында тараптар биргелешкен аракеттер менен саясий, соода-экономикалык жана маданий-гуманитардык чөйрөлөрдө, ошондой эле коопсуздук багытында өз ара аракеттешүүнүн натыйжалуу механизмдерин калыптандырышканы баса белгиленди. Тараптар регионалдык жана эл аралык уюмдардын алкагында активдүү кызматташууда.

Мындан ары карай саясий диалогду бекемдөөнүн жана бардык конкреттүү макулдашууларды ишке ашыруунун маанилүү экени айтылды.

Андан тышкары, жакынкы келечекте эки тараптуу кызматташтыктын пландары, ошондой эле ЕАЭБ, ЖККУ, КМШ жана башка уюмдардын алкагындагы эки өлкөнүн ортосундагы өз ара аракеттешүүнү өркүндөтүүнүн маселелери да талкууланды.

Азербайжан Президенти Ильхам Алиев Кыргызстан элин Нооруз майрамы менен куттуктады

Азербайжан Республикасынын Президенти Ильхам Алиев Алмазбек Атамбаевди жана өлкө элин Нооруз майрамы менен куттуктады.

«Жаратылыштын жаңыргандыгы тууралу жакшы кабарды тартуулаган бул жазгы майрам жогорку ыйман жана чын ыклас достук сапаттарын ширелтүүгө өбөлгө болот, адамдар арасында тилектештикти бекемдейт.

Азербайжан менен Кыргызстан ортосундагы Нооруздун байыркы салттарына таянуу менен достук мамилелерди жана кызматташтыкты бекемдөө жана өнүктүрүү жолундагы биздин биргелешкен күч-аракеттер мындан ары да кыйшаюусуз уланат деп ишенем», – деп белгиленет куттуктоо телеграммасында.

Азербайжан Президенти Ильхам Алиев Президент Алмазбек Атамбаевге бекем ден соолук жана бакты-таалай, ал эми Кыргызстан элине тынчтык менен гүлдөп өсүүнү каалады.

Түркмөнстан Президенти Гурбангулы Бердымухамедов Кыргызстан элин Нооруз майрамы менен куттуктады

Түркмөнстан Президенти Гурбангулы Бердымухамедов Алмазбек Атамбаевди жана Кыргызстан элин Нооруз майрамы менен куттуктады. Бул тууралуу КР Президентинин Аппаратынын басма сөз кызматы маалымдады.

«Биздин элдер көп кылымдар бою аздектеп келаткан Нооруздун жаркын салттары бүгүн эл аралык таанууга ээ болду. Нооруздун ЮНЕСКОнун материалдык эмес мурасынын тизмесине киргизилиши анын кайталангыстыгын жана жалпы адамзаттык маанисин ырастайт. Ошондой эле биздин өлкөлөрдүн элдеринин достукка, адамгерчиликке жана тынч жанаша жашоого чакырган гуманизм жана эмгекчилдик принциптерине бекем берилгендигин күбөлөйт.

Бул жаз жана жаңылануу майрамы Сиз үчүн жана сиздин өлкөнүн эли үчүн кубаныч, бакыбаттык жана өсүп өнүү менен коштолсун», – деп айтылат Түркмөнстан Президенти Гурбангулы Бердымухамедовдун телеграммасында.

Алмазбек Атамбаевдин Аксы окуясынын 15 жылдыгына байланыштуу кайрылуусу

Кыргыз Республикасынын Президентинин Аппарат жетекчиси Сапар Исаков Аксынын Боспиек айылындагы каргаша окуяда курман болгондорду эскерүү иш чарасында Алмазбек Атамбаевдин кайрылуусун окуп берди. Эскерүү аземинде 2002-жылы Аксы окуясында курман болгондордун урматына куран окулуп, алардын Эстелигине гүлчамбарлар коюлду. Бул тууралуу Президенттин Аппаратынын басма сөз кызматы маалымдады.

Президент Алмазбек Атамбаевдин Аксы окуясынын 15 жылдыгына байланыштуу кайрылуусунун тексти:

 “Урматтуу мекендештер!

Мындан 15 жыл мурда “Аксы” деген ат Кыргызстанды бүт дүйнөгө дүӊгүрөткөн. Эркиндик, адилеттик үчүн керек болсо жан аябай күрөшүү керек экенин  аксылык баатырлар өз өмүрүн берип көрсөтүшкөн.

Аксылыктар кыргыздардын байыркы замандан берки  “түгөнгөн сайын түтөп, кырылган сайын күчөгөн” эр көкүрөк эл экенин эске салган! Эркиндик, адилеттик, намыс деген дөөлөттөр каныбыздан эч качан кетпей турганын эске салган!

Аксы окуясы болбосо Март-2005 жана Апрель-2010 революциялары болмок эмес. Бул үч окуя эгемен Кыргызстандын демократия жолундагы, жаңы коом, жаңы мамлекет куруу жолундагы эң оор, бирок эң маанилүү үч ашуусу болгон.

Бүгүн баарыбыз адилеттик, чындык үчүн өмүрүн берген эр-азаматтар Эркиналы Четинбаевди, Кадыркул Сапаралиевди, Медетбек Бекмуратовду, Сатынбай Үркүнбаевди, Советбек Тагаевди, Элдияр Үмөталиевди эскерип, эстелигине таазим этебиз. Аксылыктарды колдоп, ачкачылык жарыялап, каза тапкан бишкектик Шералы Назаркуловду эскеребиз. Жаткан жерлери жаннат болсун!

Мындан 15 жыл мурда канкор бийликтин огунанжарадар болгон, таягынан запкы жегенэр-азаматтарга таазим этебиз.

Урматтуу мекендештерим!

Аксы окуясы кыргыз элинин намысын ойготту. Кыргызстандын тарыхын башка нукка бурду. Бийлик элди өзү билгендей бийлөөгө, каалагандай калчап, кордоого кыргыздар жол бербей тургандыгын көргөздү.

Тилекке каршы, Аксы окуясы кийинки бийликтерге сабак болбоду. Ошондуктан, 2005-жылы 24-мартта, 2010-жылы 7-апрелде элибиз эки жолу үй-бүлөлүк-кландык бийликти күч менен кулатууга аргасыз болду.

Урматтуу мекендештер!

Азыр кыргыз эли, Кыргызстан башка.

Биз соӊку тарыхыбыздын эң оор үч ашуусун аштык, сыноолорун жеӊдик. Мындан ары биз баарылап жергебизде жаратман, билимдүү, акылдуу коомду курабыз деп ишенем. Анткени, кыргыз эли тереӊде жаткан бай маданий дараметин, бекем руханий күчүн тапты. Кандай гана оорчулуктар болбосун жеӊе аларыбызга, өз күчүбүзгө ишендик. Намыскөй, ийгиликтүү, патриот жарандар катмары жаралды. Бир сөз менен айтканда, өсүп-өнгөн, бакыбат өлкө курууга негиз түзүлдү. Көптөгөн көрсөткүчтөр боюнча өлкөбүздүн башкаларга караганда алдыга озгону – буга далил.

Буга чейин элибиз каарман, намыскөй сапаттары менен көптү таӊдандырса, эми жоктон барды жасаган, ийкемдүү, технологиялык жетишкендиктерди бат өздөштүргөн касиеттери менен таӊдандырат деп ишенем.

Эгер 15 жыл мурда сырттан изилдөөчүлөр, журналисттер Кыргызстанга, Аксыга тополоӊдорду көргөнү, жазганы келишсе, эми Аксыга мээнеткеч жана меймандос элин, Сары-Челек, Падыша-Ата сыяктуу керемет жерлерин, адам буту баса элек чытырман токойлорун,айтылуу кара өрүк бактарын  көргөнү келип жатышат. Аксы жергеси жыл өткөн сайын таанылгыс болуп өзгөрүүдө.

Аксы эле эмес, бүт өлкөбүз өзгөрүп,өнүгүп жатат. Ажайып жаратылышыбыз, көчмөндөр маданияты менен салттарынын жанданышы дүйнөнүн көӊүлүн бурду. Эл аралык рейтингдер боюнча Кыргызстан туристтер сөзсүз келип көрүүгө сунушталган дүйнөдөгү он өлкөнүн катарына кирди. Эми биз кыргыз керемети менен баарын таӊдандырабыз!

Бардыгыӊыздарга аманчылык, жакшылыктарды каалайм!

Жараткан элибизге ынтымак, жерибизге тынчтык, берекет берсин!

Кыргыз Республикасынын

 Президенти                             Алмазбек Атамбаев”.

 

Төрага Чыныбай Турсунбеков баштаган Жогорку Кеӊеш депутаттары Аксы окуясында каза болгондорду эскеришти

Бүгүн, 17-мартта Кыргыз Республикасынын Жогорку Кеӊешинин Төрагасы Чыныбай Турсунбеков баштаган депутаттар Аксы окуясында каза болгондорду эскеришти.Бул тууралуу Жогорку Кеңештин Басма сөз кызматы маалымдады. Жалал-Абад облусунун Аксы районундагы Боспиек айылындагы кайгылуу окуянын 15 жылдыгына карата Жогорку Кеңештин депутаттары “Ала-Тоо” аянтындагы 2002-жылы Аксы окуясында жана 2010-жылы апрель окуясында каза болгондорго арналган эскерүү монументине гүлчамбар коюшту. Бул тууралуу КР ЖК басма сөз кызматы билдирди.

 

 

 

 

Кыргыз Республикасынын аскер сотторунун судьяларынын кызмат орундарында ыйгарым укуктарды жүргүзүүнүн токтотулушу жөнүндө Жарлыкка кол коюлду

КР Президентинин Аппаратынын басма сөз кызматынын билдирүүсүнө таянсак, Алмазбек Атамбаев кол койгон Жарлык боюнча Кыргыз Республикасынын Конституциясынын 95-беренесинин З-бөлүгүнө, аскер сотторунун судьяларынын штаттык бирдиктерин Кыргыз Республикасынын тиешелүү жергиликтүү сотторуна өткөрүп берүүнү караган 2016-жылдын 23-декабрындагы № 216 «Кыргыз Республикасынын судьяларынын статусу жөнүндө» Кыргыз Республикасынын конституциялык Мыйзамына өзгөртүү киргизүү тууралуу» Кыргыз Республикасынын конституциялык Мыйзамына жана 2016- жылдын 23-декабрындагы № 217 «Кыргыз Республикасынын айрым мыйзам актыларына өзгөртүүлөрдү киргизүү жөнүндө» Кыргыз Республикасынын Мыйзамына ылайык, ошондой эле Кыргыз Республикасынын Судьялар кеңешинин сунушу боюнча токтом кылынды:

1. Жергиликтүү соттордун төмөнкү судьялары үчүн аскер сотторунун судьяларынын ыйгарым укуктарын жүргүзүү 2017- жылдын 1-мартынан баштап токтотулду:

Кыргыз Республикасынын Аскер сотунун судьялары:

– Джунусов Эркин Маткаримович;

– Сулайманов Жолдошбек Атакеевич;

Бишкек гарнизонунун Аскер сотунун судьялары:

– Карабеков Алмаз Маматбекович;

– Тентимишов Марлэн Бактыгулович;

Ош гарнизонунун Аскер сотунун судьялары:

– Кабылбеков Таалайбек Мейманжанович;

– Суеркулов Эрлан Оморалиевич.

2. Бул Жарлык кол коюлган күндөн баштап күчүнө кирет.

Президент Алмазбек Атамбаев 2002-жылы Аксы окуясында курман болгондорду эскерди

Алмазбек Атамбаев бүгүн, 17-мартта 2002-жылы Аксы окуясында курман болгондорду эскерди. Бул тууралуу КР Президентинин Аппаратынын басма сөз кызматы маалымдады.

Мамлекет башчысы 2002-жылы Аксы окуясында жана 2010-жылы Апрель окуясында эркиндик жана адилеттик үчүн курман болгондордун Бишкек шаарынын Ала-Тоо борбор аянтында жайгашкан Эстелигине гүлчамбар койду. Бул азем 2002-жылы 17-мартта Жалал-Абад облусунун Аксы районундагы Боспиек айылында болгон каргаша окуялардын 15 жылдыгына арналды.

Алмаз Атамбаев: "Айрым сасык саясатчылар, журналист сөрөйлөр – Замира Сыдыкова, Бегалы Наргозуев, Нарынбек Идинов – сөз эркиндигин коргойбуз, кыргыз журналисттерин коргойбуз деп, чуу салып жатышат"

Алмазбек Атамбаев бүгүн,  15-мартта Афганстан Ислам Республикасынын, Индиянын, Кот-д’Ивуар Республикасынын, Латвия Республикасынын, Эфиопиянын Атайын жана Ыйгарым укуктуу элчилеринен  Ишеним баракчаларын кабыл алды. Бул туурасында КР Президентинин Аппаратынын басма-сөз кызматы билдирди.

Алмазбек Атамбаев кыргыз жеринде дипломаттык миссиялардын жетекчилерин жылуу кабыл алып, аларды ардактуу жана жооптуу миссиясынын расмий башталышы менен куттуктады.

Мамлекет башчысынын сөзүнүн тексти:

 “Саламатсыздарбы, урматтуу бүгүнкү салтанаттын катышуучулары!

Урматтуу мекендештер!

Урматтуу кыргыз журналисттери!

“Жамандын үйүн коногу бийлейт” деген сөз бар кыргызда. Ою жаман конокторго, эл бузарларга өзүбүздүн үйүбүздү, Мекенибизди тебелетпесек. Элдин намысын, өлкөнүн намысын ойлосок, коргосок!

Радио “Свободага” иштесек да, Мекенди ойлоп, кыргыздын намысын коргоп, Шайлообек Дүйшеевдей иштесек! Акча үчүн Ата-Журтту сатпасак.

Бабакулов, Карабеков, Маслова, Идиновдордун ою башка! Карабеков өзү бир жолу телевизордон айтты эле: “Я что, – баткенский, что-ли?” – деп.

Булар “баткенский” да эмес, “киргизский” да эмес. Булардын чөнтөгүнөн экинчи паспорт же “вид на жительство” чыкса да таӊ калбайм.

Булар Кыргызстанда айла жок жашап жатышат, анткени башка жерде булардын кереги жок. Өз жерин жамандап жан багышат! Булар үчүн биздин каректей болгон Ата-Мекенибиз “тьма киргизская”.

Кыргыз элим дегендер “баткенский” Исхак Раззаков, “баткенский” Апсамат Масалиев, “баткенский” Эгемберди Эрматов менен сыймыктанат!

Биз үчүн ошол “тьма киргизская” жаркыраган Москва менен Нью-Йорк, Прагадан артык!

Кисловдор, Широковдор Кыргызстандагы демократияга күйөт имиш. Эй, анча эле демократияга күйсөңөр, өзүңөрдүн мекениңерден, Россиядан баштабайсыӊарбы?

Кыргыз Президенти радио “Свободаны” басмырдап жатат, сот аркылуу пул доолап жатат деп бакылдабай, андай эле радио “Свободага” ичиңер күйсө, анда биринчи орус мамлекет башчыларына кайрылбайсыңарбы, талап койбойсуңарбы: “Радио Свобода” орус каналдарында орун алсын, “Радио Свобода” орус радиосунан бакылдасын”  деп! Кыргызстанда ошондой экен деп!

Эй, өзүңөр күзгүдөн өзүңөрдү көрүп, анан бизге акыл үйрөтпөйсүңөрбү? Ал жерде балык болуп тымпыйып, бул жерде тайраңдабай.

Биз өз үйүбүздү өзүбүз иретке келтиребиз, Кудайга шүгүр!

Урматтуу мекендештер!

Айрым сасык саясатчылар, журналист сөрөйлөр – Замира Сыдыкова, Бегалы Наргозуев, Нарынбек Идинов – сөз эркиндигин коргойбуз, кыргыз журналисттерин коргойбуз деп, чуу салып, атайын уюм түзүп, өлкөбүздү бүт дүйнөгө мазактап жатышат. Булар өздөрү ким?

Журналист Геннадий Павлюкту өлтүрүп жатканда, журналист Сыргак Абдылдаевдин колу-бутун сындырып, бычак менен кескилеп жатканда, Медет Садыркуловду тирүүлөй өрттөп жатканда кайда эле булар?

Жумшак креслого отуруп, казы-карта чайнап, Максим менен Жанышты мактап отурушпады беле?

Жаңыдан эгемендүү болуп, алсырап жаткан өлкөбүздү Акаич менен кошо тоногон Равшан Жээнбеков коргойт экен да кыргыздарды?

Ушул сасык саятсатчыларга кантип ишенесиңер, урматтуу журналисттер?

Албетте, булар да эртең мени бир сасыган партиянын өкүлдөрүнө окшоп сотко берет, бизди “вонючий” деп айтты деп.

Эне тилин билбеген маңкураттарга түшүндүрүп коёюн: саясатчы “Шанель” менен “Диорду” себинип, француз духи жыттанса да, эгер ыплас иштерге булганса, андайды кыргыздар “сасык саясатчы” деп коёт. Албетте, сасык саясатчы башкарган партияны да сасыган партия дебей эмне деп айтабыз?

Эми булар “круглый стол” өткөрөт имиш. Мындайлар менен абийирдүү адам бир столго отурмак түгүл, алысырак басып кетет, теңелбейин деп, ичинен башын чайкап тим болот. Бул маңкурттар “ичинен башын чайкап” дегенди да “покачал головой в животе” деп бизди айтты деп сотко берет эми мени.

Эне тилин билбеген – элин сүйүп жарытпайт!

Урматтуу мекендештер!

Урматтуу кыргыз журналисттери!

Азыркы күндөрдө элибиздин, жерибиздин тагдыры, келечеги чечилип жатат. Алдыда президенттик шайлоо турат. Болгону 8 ай калды.

Тырмактай Кыргызстан эмес, дүйнөнү башкарган Америка кантип президент шайлаганын дагы эле түшүнбөй, териштирип жатат! Биз да анан декабрда алаканыбызды чаап “аттиӊ ай!..” деп олтуруп калбайлы!

Азыр бүт дүйнөдө согуш жүрүп жатат. Информациялык согуш. Маалымат согушу.

Бул шылуундарга алданып, маңкурт, эл бузарларды ээрчип, булар тараткан ушактарга ишенип, кайрадан карегибиздей Мекенибизди уурулардын, мародерлордун колуна салып бербейлик! Кайрадан куркулдаган кузгундарга жем болбосун Кыргызстан! Ата-Мекенибиз, Ата-Журтубуз – Кыргызстан!

Көздү ача турган мезгил келди. Ойлоно турган мезгил келди.

Жараткан элибизди сасык саясатчылардан, ушакчылардан сактасын! Жараткан элибизге ынтымак, жерибизге берекет берсин!

Маалымат иретинде:

Кыргыз Республикасынын Президенти Алмазбек Атамбаевге Ишеним грамоталарын төмөнкү чет өлкөлүк дипломатиялык өкүлчүлүктөрдүн башчылары тапшырышты:

Кот-д’Ивуар Республикасынын Кыргыз Республикасындагы Атайын жана Ыйгарым укуктуу Элчиси Тано-Бучуе;

Латвия Республикасынын Кыргыз Республикасындагы Атайын жана Ыйгарым укуктуу Элчиси Юрийс Погребнякс;

Эфиопиянын Кыргыз Республикасындагы Атайын жана Ыйгарым укуктуу Элчиси Ауалеу Гобезие Воркенех;

Индия Республикасынын Кыргыз Республикасындагы Атайын жана Ыйгарым укуктуу Элчиси Лакшманан Сависри;

Афганистан Ислам Республикасынын Кыргыз Республикасындагы Атайын жана Ыйгарым укуктуу Элчиси Мохаммад Исса Месбах.

Алмазбек Атамбаев «Ыйман» руханий маданиятты өнүктүрүү фондунун төрагасы Нуржигит Кадырбековду кабыл алды

Алмазбек Атамбаев 11-мартта  «Ыйман» руханий маданиятты өнүктүрүү фондунун төрагасы Нуржигит Кадырбековду кабыл алды. Бул тууралуу КР Президентинин Аппаратынын басма сөз кызматы билдирди.

Жолугушууда Мамлекет башчысына диниятчыларды кайра даярдоо жана адистигин арттыруу, өлкөдөгү чыгармачыл адамдардын жакшы идеяларын кеӊири жайылтуу боюнча «Ыйман» фонду аткарып жаткан иштер тууралу маалымат берилди. Нуржигит Кадырбековдун айтымында, 2015-жылы долбоор башталгандан бери 2 миӊден ашуун имам зарыл табият-илимий билимдерди алып, диний жана светтик сабатын көтөрүштү.

«Ыйман» фондунун башчысы ошондой эле Президентке Ыйман, тарбия жана маданият жылынын алкагында кыргыз элинин улуттук маданияты менен билимди жана динди шайкеш айкаштырууга, жер-жерлерде жаштардын руханий жана интеллектуалдык дараметин ачуу максатында ар кандай аянтчаларды түзүүгө багытталган иш чаралар планы тууралу айтып берди.

Президент Алмазбек Атамбаев жарандардын руханий маданиятын өстүрүүдө жана өлкөдө саламаты чыӊ, сабырдуу жана билимдүү коомду калыптандырууда «Ыйман» фондунун ишинин маанисин баса белгиледи. Президенттин айтымында, өлкөдөгү азыркы диний кырдаалды жана дүйнөдөгү диний өнүгүү багыттарын эске алуу менен Кыргызстанда конфессиялар аралык ынтымакты жана диний сабырдуулукту бекемдөөдө «Ыйман» фондунун көмөгүнө баа жетпейт.

Меню