РАСМИЙ КАБАРЛАР

Кыргыз Республикасынын Президентинин Аппаратынын Жетекчиси Сапар Исаков бүгүн, 30-мартта Улуттук онкология борборуна барды. Бул тууралуу КР Президентинин Аппаратынын басма сөз кызматы маалымдады.

Борбор менен таанышуу учурунда Сапар Исаков онкология борборунун бир катар бөлүмдөрүн көрдү жана ооруканадагы медициналык жабдуулардын абалы менен таанышты. Борбордун директорунун милдетин аткаруучу Эрнис Тилеков А. Атамбаевдин тапшырмалары боюнча ведомство тарабынан көрүлүп жаткан чаралар жөнүндө маалымат берди.

Президенттин Аппаратынын Жетекчиси онкология борборундагы көйгөйлүү маселелерди приоритеттүү тартипте чечүүнүн маанисин баса белгиледи.

«Тилекке каршы, дүйнө жүзүндө, а түгүл кошуна өлкөлөрдө бул оору менен ийгиликтүү күрөшүп жатышса, бизде онкологиялык оорулардан каза болгондор көп. Президент Алмазбек Атамбаевдин тапшырмасы боюнча биз ооруканадагы көйгөйлүү маселелерди тезирээк чечүү боюнча кадамдарды аныктадык. Жакынкы жарым жыл ичинде онкологиялык ооруларды дарылоо үчүн зарыл жабдуулардын комплексин алып келип, бөлүмдөрдү капиталдык оңдоодон өткөрүп, Улуттук онкология борборунун аймагын жашылдандыруу ишин бүткөрүү милдети турат», – деп белгиледи Сапар Исаков.

Ушуга байланыштуу Саламаттык сактоо министрлигине жана Өкмөт алдындагы Архитектура, курулуш жана турак-жай-коммуналдык чарбасы мамлекеттик агенттигине бир жуманын ичинде ушул милдеттерди аткаруу боюнча иш-аракеттердин планын иштеп чыгуу тапшырылды.

Алдын-ала эсептөөлөр боюнча Улуттук онкология борборундагы эң көйгөйлүү маселелерди чечүү үчүн 12-14 миллион доллар керек. Бул үчүн гранттык каражаттарды тартуу, ал эми жетишпеген бөлүгүн бюджеттен бөлүү каралууда.

А. Атамбаев кол койгон Жарлыкка ылайык, бүгүн, 30-мартта Кыргыз Республикасынын Швейцария Конфедерациясындагы, Лихтенштейн Княздыгындагы Атайын жана Ыйгарым укуктуу Элчиси, Бириккен Улуттар Уюмундагы жана Женева шаарындагы эл аралык башка уюмдардагы Кыргыз Республикасынын туруктуу өкүлү Мукашев Данияр Муратбекович Женева шаарындагы резиденциясы менен эки ишти айкалыштыруу боюнча Кыргыз Республикасынын Италия Республикасындагы Атайын жана Ыйгарым укуктуу Элчиси болуп дайындалды. Бул тууралуу КР Президентинин аппаратынын басма сөз кызматы маалымдады.

А. Атамбаев бүгүн, 29-мартта өлкөнүн ички иштер министри Улан Исраиловду кабыл алды. Бул тууралуу КР Президентинин Аппаратынын басма сөз кызматы маалымдады.

Жолугушууда Мамлекет башчысы өлкөнүн укук коргоо органдарын реформалоонун алкагында ички иштер органдарынын ишинин натыйжалуулугун жогорулатуу боюнча көрүлүп жаткан чаралар тууралуу маалымат алды. Улан Исраилов ошондой эле Президентке өлкөдө жакында өтө турган эл аралык иш-чаралардын учурунда коопсуздукту камсыз кылууга милиция бөлүктөрүн даярдоо боюнча көрүлүп жаткан чаралар жөнүндө да баяндады.

Республикада, айрыкча борбор шаарда өткөрүлүп жаткан ар кандай саясий акцияларга байланыштуу Президент Алмазбек Атамбаев милиция адамдардын өз жарандык позициясын билдирүүгө укугун сыйлоо зарылдыгын, бирок, мыйзам бузулган учурларда коомдук тартипти сактоо жана коомдук коопсуздукту камсыз кылуу боюнча өз милдеттерин так аткарышы керек экенин баса белгиледи.

Бүгүн, 29-мартта Кыргыз Республикасынын Аппарат жетекчиси Сапар Исаков Россия Федерациясынын Кыргыз Республикасындагы мурдагы соода өкүлү, Россия-Кыргыз өнүктүрүү фондунун башкармасынын мурдагы орун басары В.А. Некрасовду анын Кыргызстандагы ишмердигинин аякташына байланыштуу кабыл алды. Бул туурасында Президенрттик Аппараттын басма сөз кызматы маалымдады.

Жолугушууда Сапар Исаков Кыргыз Республикасы менен Россия Федерациясынын ортосундагы соода-экономикалык кызматташтыкты чыӊдоо боюнча жемиштүү иши үчүн В.А. Некрасовго ыраазылык билдирди. Атап айтканда,  КР Президентинин Аппарат жетекчиси анын тикелей катышуусу менен эки өлкөнүн бизнес-чөйрөлөрүнүн ортосунда байланыштар калыптанганын, россиялык кыйла инвестициялар Кыргызстандын экономикасына тартылганын, андан тышкары Россия-Кыргыз өнүктүрүү фонду өз ишин баштаганын белгиледи.

Жолугушуу аягында Сапар Исаков В.А. Некрасовго жаңы кызматында үзүрлүү иштешин каалады.

Алмазбек Атамбаев жана Финляндия  Республикасынын Президенти Саули  Нийнистё эки өлкө ортосундагы дипломатиялык мамилелердин түзүлгөндүгүнүн 25 жылдыгына байланыштуу бири-бирине куттуктоо телеграммасын жиберишти. Бул тууралуу КР Президентинин Аппаратынын басма сөз кызматы маалымдады.

«Кыргыз Республикасы менен Финляндия Республикасынын ортосундагы дипломатиялык мамилелердин түзүлгөндүгүнүн 25 жылдыгына байланыштуу чын дилимден куттуктоомду кабыл алыӊыз.

Кыргызстан менен Финляндия ортосундагы достук мамилелер андан ары да өз ара пайдалуу кызматташтыктын жана эки элдин жакшылыгы үчүн конструктивдүү диалогдун нугунда өнүгөт деп ишенем», – деп айтылат Президент Алмазбек Атамбаевдин катында.

Кыргызстан Президенти Алмазбек Атамбаев Финляндия Президенти Саули  Нийнистёго  бекем ден соолук жана мамлекеттик ишине ийгиликтерди, ал эми дос Финляндия элине тынчтык менен бакыбаттыкты каалады.

Финляндия  Республикасынын Президенти Саули  Нийнистё Президент Алмазбек Атамбаевди өлкөлөр ортосундагы дипломатиялык мамилелердин түзүлгөндүгүнүн 25 жылдыгы менен куттуктады.

«Мен биздин достук мамилелердин мындан ары да бекемделе беришине кубанам. Менин өтө жогорку сый-урматымды кабыл алыңыз», – деп айтылат катта.

Конституциялык мыйзамдар, мамлекеттик түзүлүш, сот-укук маселелери жана Жогорку Кеӊештин Регламенти боюнча комитети “Кыргыз Республикасынын Жогорку Кеңешинин Регламенти жөнүндө” Кыргыз Республикасынын Мыйзамынын 115-беренесинин 1-бөлүгүнүн негизинде Жогорку Кеңештин депутаты К.Бокоев демилгелеген жана 2017-жылдын 16-февралында Жогорку Кеңеш тарабынан биринчи окууда кабыл алынган “Кыргыз Республикасынын жергиликтүү өз алдынча башкаруу органдарына шайлоолор жөнүндө” жана “Кыргыз Республикасынын айрым мыйзам актыларына өзгөртүүлөрдү киргизүү жөнүндө” (“Жергиликтүү өз алдынча башкаруу жөнүндө”, “Борбордун статусу жөнүндө”, “Ош шаарынын статусу жөнүндө”, “Жергиликтүү кеңештердин депутаттарынын статусу жөнүндө” Кыргыз Республикасынын мыйзамдарына) Кыргыз Республикасынын мыйзам долбоорлору боюнча кеңири талкууну камсыз кылуу максатында:

2017-жылдын 23-мартында Баткен шаарында саат 9:00-дөн 13:00-чейин (дареги, Садыков көчөсү, 1);

27-мартында Талас шаарында саат 10:00-дөн 14:00-чейин (дареги Бердике Баатыр көчөсү, 284);

28-мартында Бишкек шаарында Жогорку Кеӊештин чоӊ жыйындар залында саат 10.00-дөн 14.00-чейин (дареги Чуй пр. 205);

31-мартында Жалал-Абад шаарында саат 10.30-дан 14.00-чейин (дареги Эркиндик көчөсү,11) парламенттик угууларды өткөрөрүн маалымдайт.

Мындан сырткары, жогорудагы парламенттик угуулардын өткөрүүнүн алкагында “Мамлекеттик жана муниципалдык кызмат көрсөтүүлөр жөнүндө” Кыргыз Республикасынын Мыйзамын турмушка ашырылышына контролду жүзөгө ашыруу боюнча маселе дагы каралат.

Ошол себептен, массалык маалымат каражаттарынын өкүлдөрүн,  жарандарды жана алардын бирикмелерин, ошондой эле жергиликтүү жамааттардын мүчөлөрүн аталган иш чарага катышуу үчүн чакырабыз.

Уюштуруучулук жана парламенттик угууга катышуу маселелери боюнча (0 312) 63-92-57 телефону аркылуу же болбосо электрондук почта [email protected] боюнча кайрылсаңыздар болот.

Алмазбек Атамбаев бүгүн, 28-мартта өлкөнүн Коомдук телерадиоберүү корпорациясынын башкы директору Илим Карыпбековду кабыл алды. Бул тууралуу КР Президентинин Аппаратынынын басма сөз кызматы маалымдады.

КТРК башчысы Президентке өлкөнүн башкы телеканалынын коомдук берүү принциптерине ылайык андан ары өнүктүрүү пландары тууралу айтып берди. Анда санариптик берүүгө өтүү мезгилинде контенттин сапатын жакшыртуу жана техникалык модернизация өткөрүү белгиленген. КТРКны өнүктүрүү иши, Илим Карыпбековдун сөзү боюнча, телеканалдын менеджменти аркылуу жарандык коомдун өкүлдөрүнүн катышуусу менен жүзөгө ашырылууда.

А. Атамбаев жана Австрия Республикасынын Президенти Александр Ван дер Беллен эки өлкө ортосундагы дипломаттык мамилелердин түзүлгөндүгүнүн 25 жылдыгына байланыштуу бири-бирине куттуктоо телеграммасын жиберишти. Бул тууралуу КР Президентинин Аппаратынын басма сөз кызматы маалымдады.

«Кыргыз Республикасы менен Австрия Республикасынын ортосундагы дипломаттык мамилелердин түзүлгөндүгүнүн 25 жылдыгына байланыштуу чын дилимден куттуктоомду кабыл алыӊыз.

Кыргызстан менен Австрия ортосундагы достук мамилелер андан ары да өз ара пайдалуу кызматташтыктын жана эки элдин жакшылыгы үчүн конструктивдүү диалогдун нугунда өнүгөт деп ишенем», – деп айтылат Алмазбек Атамбаевдин катында.

Мамлекет башчысы саясый диалогдун бийик деӊгээли бардык чөйлөрдө эки өлкө арасындагы өз ара аракеттерди кеӊейтүүгө өбөлгө болот деп ишенет.

Алмазбек Атамбаев Президент Александр Ван дер Белленге бекем ден соолук жана мамлекеттик ишине ийгиликтерди, ал эми дос Австрия элине тынчтык менен бакыбаттыкты каалады.

Федералдык Президент Александр Ван дер Беллен өз катында соӊку 25 жылда эки мамлекет арасында абдан жакшы байланыштар түзүлгөнүн белгилеген.

«Бири-бирибизге урмат-сый мамиле өлкөлөрүбүзгө данакер болуп келатат. Көз карандысыздыкты алгандан тарта Сиздин өлкө плюралисттик, демократиялуу коом куруу милдетин алганы Австрияга абдан жаккан. Бул урмат сезим эки тараптуу визиттер аркылуу  бекемделүүдө. Менден мурдагы Президент 2013-жылы Сиздин өлкөгө батыштагы алгачкы  Мамлекет башчысы катары визит жасаган, ал эми 2015-жылы мартта Сиздин Венага визитиӊиз чоӊ баага татыды. Ошондуктан, саясаттагы да, экономикадагы да, маданий жааттагы да биздин достук байланыштар эки өлкө ортосундагы азыркы жакшы мамилелерди дагы тереӊдетет деп ишенем», – деп айтылган Австрия Президентинин телеграммасында.

Анын сөзү боюнча, Европа Биримдигине мүчө мамлекет катары Австрия үчүн эки өлкө ортосундагы мамилелердин европалык өӊүтү маанилүү роль ойнойт. Буга байланыштуу 2018-жылдын экинчи жарымынан тарта Европа Биримдигинин кеӊешинде төрагалыкты алып жаткан Австрия Кыргызстан менен Европа Биримдигинин арасында күчтүү өнөктүктү жактайт.

«Ошондой эле быйыл Австрия ЕККУда төрагалык кылган мезгилде Кыргызстан тараптан ишенимдүү колдоого үмүт артат. Учурдан пайдаланып, Сизге Президенттик кызматыӊызга андан аркы ийгиликтерди, кыргыз элине бакыбаттыкты каалайм», – деди Австриянын Федералдык Президенти.

Төрага Ч. Турсунбеков баштаган Жогорку Кеӊеш делегациясынын Санкт-Петербург шаарындагы иш сапарынын алкагында И.Е.Репин атындагы Россия Федерациясынын сүрөт академиясында СССРдин эл сүрөтчүсү, белгилүү кыргыз актеру Сүймөнкул Чокморовдун бюстун тапшыруу аземи болуп өттү. Бул тууралуу КР Жогорку Кеӊешинин Басма сөз кызматы маалымдады.

Дүйнөлүк маданияттын жана цивилизациянын  борбору болгон Санкт-Петербург шаарына улуу сүрөтчүнүн бюстун тапшыруу жалпы кыргызстандыктар үчүн кубанычтуу жаӊылык деген Төрага Чыныбай Турсунбеков алгач Россия элин 25-март маданият кызматкерлеринин күнү менен куттуктап: “Иш чаранын ушул даталуу күнгө туш келип жатышы да жакшы жышаан. Анткени биз бүгүн кыргыз маданият тарыхында аты алтын тамгалар менен жазылып калган кайталангыс талант Сүймөнкул Чокморовду дагы бир жолу сыймыктануу менен эскерип жатабыз. Ал алгачкы билимди Фрунзеден алып, кийин ушул И.Репин атындагы сүрөт иститутунда талантын такшалткан. Андыктан, Сүймөнкул Чокморовдун бюстун өзү окуган мекемеге коюу баарыбыздын тарыхый милдетибиз эле” – деди.

Ошондой эле, мыкты талантты таптаган СССРдин эл сүрөтчүсү Е.Е.Моисеенко, С.А.Чуйков сындуу академиянын залкар окутуучуларынан билим алгандыгын Чыныбай Турсунбеков эске салды.

Андан тышкары, Төрага улуу инсандын “кыргыз киносунун кереметтерин” жаратууга да чоӊ салым кошкондугун эскерип: “27 жашында башталган актерлук карьерасы өзүн чебер талант катары гана таанытпастан, кыргыз элинин жүзүн, жалпы көп улутту Совет элинин кино өнөрүн дүйнөгө тааныткан” – деп кошумчалады.

Иш-чарага улуу таланттын бир тууган агасы Сүйөркул Чокморов, Сүймөнкул Чокморов атындагы фонддун жетекчиси Сагынбек Амбдрахманов, Мамлекеттик Думанын бир катар депутаттары жана кыргыз диаспор катышты.

Аземдин алкагында КМШ Парламенттик Ассамблеясынын маданият, маалымат, туризм жана спорт боюнча комиссиясына таандык маалыматтык-аналитикалык журналы Жогорку Кеңеш Төрагасы Чыныбай Турсунбековго редакциялык коллегиянын ардактуу мүчөсү наамын ыйгарышты.

Эске салсак, Төрага Чыныбай Турсунбеков баштаган парламенттик делегациясынын курамында депутаттар А.Баатырбеков, А.Кодуранова, А.Шадиев, И.Матраимов, К.Иманалиев, М.Сабиров, А.Токторов, И.Сарсейитов, Н.Алимбеков, Е.Строкова, А.Нурбаев, А.Жамангулов, Б.Сулейманов, Д.Исаева, И.Карамушкина, А.Артыков жана К.Орозовалар бар.

Кыргыз Республикасынын Премьер-министри Сооронбай Жээнбеков кол койгон буйрукка ылайык, Абдырахманов Сайитбек Кутбаевич башка ишке өткөндүгүнө байланыштуу Кыргыз Республикасынын Өкмөтүнүн Баткен облусундагы ыйгарым укуктуу өкүлүнүн орун басары кызматынан бошотулду. Бул тууралуу Кыргыз Республикасынын Өкмөтүнүн Аппаратынын маалыматтык камсыздоо бөлүмү маалымдады.