Menu

САЯСАТ

Президент Садыр Жапаров «Эркин Европа/Азаттык» медиакорпорациясынын президенти Джейми Флайды кабыл алды

Кыргыз Республикасынын Президенти Садыр Жапаров бүгүн, 14-сентябрда,
«Эркин Европа/Азаттык» радиосунун президенти жана башкы аткаруучу директору Джейми Флайды кабыл алды.

Баарлашуу жүрүшүндө Мамлекет башчысы Кыргызстан сөз эркиндигин туу туткан, демократиялык принциптерди сыйлаган эркин өлкө экенин белгиледи.

Президент Садыр Жапаров өлкө жетекчилиги жалпыга маалымдоо каражаттары менен активдүү иштөөгө даярдыгын баса белгиледи. Ошону менен бирге ал, жалпыга маалымдоо каражаттары объективдүү, ар тараптуу, кайсыл бир тарапка көбүрөөк артыкчылык бербей, дүйнөдө таанылган чыныгы журналисттик принциптерди бекем карманып иштеши зарылдыгын белгиледи.

Өз кезегинде Джейми Флай Кыргызстанда ММКга, анын ичинде Эркин Европа / Азаттык радиосунун кесиптик ишмердүүлүгү үчүн бардык зарыл шарттар бар экенин белгиледи.

Буга байланыштуу медиакорпорациянын президенти өлкө жетекчилигине түзүлгөн шарттар үчүн ыраазычылык билдирип, Кыргызстанда – сөз эркиндиги коомчулуктун күнүмдүк жашоосунун ажырагыс бөлүгү болгон ачык өлкө экенин кошумчалады.

Президент Садыр Жапаров ЖККУнун жамааттык коопсуздук Кеңешинин сессиясына жана ШКУга мүчө-мамлекет башчыларынын Кеңешинин отурумуна катышат

Үстүбүздөгү жылдын 15-17-сентябрында Кыргыз Республикасынын Президенти Садыр Жапаров Тажикстан Республикасынын Душанбе шаарына иш сапары менен барып, анын алкагында Жамааттык коопсуздук келишими уюмунун жамааттык (ЖККУ) коопсуздук Кеңешинин сессиясына жана Шанхай кызматташтык уюмуна (ШКУ) мүчө-ммалекет башчыларынын Кеңешинин отурумуна катышат.

Бул туурасында Кыргыз Республикасынын Президентинин Администрациясынын тышкы саясат бөлүмүнүн башчысы Жээнбек Кулубаев билдирди.

Үстүбүздөгү жылдын 16-сентябрында, Тажикстан Республикасынын төрагалыгында өтүүчү Жамааттык коопсуздук келишими уюмунун Жамааттык коопсуздук кеңешинин кезектеги сессиясынын жүрүшүндө мамлекет башчылары эл аралык жана регионалдык коопсуздуктун актуалдуу көйгөйлөрү жана уюмдун сессия аралык мезгилдеги ишмердүүлүгүнүн негизги жыйынтыктары жөнүндө пикир алмашышат. Ошондой эле алдыда Армениянын ЖККУдагы төрагалыгы мезгилиндеги уюм ишмердүүлүгүнүн алгылыктуу багыттары жөнүндө маалыматты угушат.

Жыйыныктоочу декларацияга, ошондой эле уюмдун ишмердүүлүгүнүн маселелерин жөнгө салган 13 документке кол коюлары күтүлөт.

Андан соң 17-сентябрда Тажикстан Республикасынын төрагалыгында ШКУга мүчө-мамлекет башчыларынын кеңешинин кезектеги отуруму өтөт.

ШКУ отурумунун күн тартиби ШКУнун ишмердүүлүгүнүн 20 жылдагы негизги жыйынтыгы, уюм алкагында көп тараптуу өз ара аракеттенүүнүн абалы жана келечеги, пандемиянын кесепеттерин жоюу боюнча биргелешкен кадамдар, ошондой эле регионалдык жана эл аралык кызматташтыктын актуалдуу маселелерин камтыйт.

Бул отурумдун жыйынтыгы боюнча ШКУнун 20 жылдыгына арналган мааракелик декларацияны кабыл алуу пландалууда, ошондой эле уюмдун ишмердүүлүгүнө тиешелүү 30дан ашуун документке, анын ичинде ШКУнун жаңы башкы катчысын дайындоо тууралуу чечимге кол коюлары күтүлүүдө.

Афганстанда болуп жаткан окуяларга, ошондой эле чөлкөмдөгү туруктуулукту жана коопсуздукту сактоо боюнча чараларды кабыл алуунун зарылдыгына байланыштуу Президент Садыр Жапаров ШКУ жана ЖККУ мүчө-мамлекеттеринин делегация башчыларынын Афганстандагы кырдаал боюнча жолугушуусуна катышат. Ошондой эле саммит талааларында эки тараптуу жолугушуулар өтөт.

«Аны менен бирге, Кыргыз Республикасы көрсөтүлгөн көп тараптуу аянтчалар алкагындагы кызматташууга чоң маани берээрин белгилейбиз.
Кыргызстандын ЖККУ жана ШКУга катышуусу өлкөнүн тышкы саясатындагы приоритеттүү багыттардын бири», — деп белгиледи Жээнбек Кулубаев.

УКМК: KOICA Кыргызстандагы киберкоопсуздук боюнча долбоорду каржылайт

КР УКМК  Корея Эл аралык Кызматташтык Агенттиги (KOICA) менен “Кыргыз Республикасында компьютердик инциденттерге ыкчам чара көрүү борборун (SOC) түзүү” гранттык долбоорун ишке ашыруу боюнча талкуулоо протоколуна кол койду.

Салтанатка КР УКМК төрагасы генерал-лейтенант Ташиев Камчыбек, Корея Республикасынын Кыргыз Республикасындагы атайын ыйгарым укуктуу элчиси Ли Вонджэ мырза жана KOICA өкүлчүлүгүнүн Кыргызстандагы директору мырза Ли Жонгсу катышты.

“Кыргыз Республикасында компьютердик инциденттерге ыкчам чара көрүү борборун (SOC) түзүү” долбоору, өлкөдөгү киберкоопсуздуктун абалын бекемдөөгө багытталган.

KOICA долбоорунун алкагында, SOC борборунун өзүн түзүү, жабдуулар жана программалар менен камсыздоо, мамлекеттик органдардын киберкоопсуздугун коргоо жана адамдык потенциалды өнүктүрүү боюнча чечимдерди жайылтуу пландаштырылууда.

Долбоордун узактыгы 5 жыл (2021-2025) болот. Бул долбоорду ишке ашыруу каражаты 5 миллион АКШ долларын түзөт

БШК: Шайлоо округдарынын схемалары жана чек аралары (карта)

Кыргыз Республикасынын Шайлоо жана референдум өткөрүү боюнча борбордук комиссиясы «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамына ылайык мажоритардык шайлоо тутуму боюнча шайлоо округдарынын расмий схемасын жана чек араларын жарыялоодо.

Мыйзамдарга ылайык шайлоо округдарын түзүүдө төмөнкү талаптар сакталды:

  • шайлоо округдарынын шайлоочулардын саны боюнча болжолдуу теңдиги, мында шайлоочулардын өкүлчүлүгүнүн орточо ченеминен 20 пайыздан ашпаган четтөөгө жол берилет;
  • шайлоо округу бирдиктүү аймакты түзөт, шайлоо округун өз ара чектешпеген аймактардан түзүүгө жол берилбейт.
  • ушул көрсөтүлгөн талаптарды сактоодо, эреже катары, республиканын администрациялык-аймактык бөлүнүшү эске алынат.

Бир мандаттуу шайлоо округдарын түзүү үчүн БШК калкты каттоо, жер ресурстарын башкаруу чөйрөсүндөгү ыйгарым укуктуу мамлекеттик органдар, жергиликтүү өз алдынча башкаруу органдары тарабынан мыйзамдарга ылайык берилген маалыматтарга негизденди.

Ар бир округ 100 миң 476 +/- 20% шайлоочу болжолдуу саны менен түзүлөт.

Жогоруда баяндалганга байланыштуу округдардын санын облустар боюнча бөлүштүрүү схемасы төмөнкүдөй:

карта.png

 

Облус Шайлоочулардын саны Округдардын саны
Бишкек шаары 428 599 4
Ош шаары, Ош облусу 898 569 9
Баткен 305 053 3
Жалал-Абад 686 364 7
Талас 163 109 2
Чүй 609 774 6
Нарын 209 101 2
Ысык-Көл 316 572 3
Баардыгы: 3617141 36

Шайлоо округдарынын схемалары жана чек аралары ушул шилтеме боюнча көрсө болот

 

БШКнын мүчөсү Акылбек Эшимов $550 000 өлчөмүндө алдамчылык иши боюнча кармалды

КР УКМК мамлекеттик органдардын системасындагы мыйзамсыз көрүнүштөрдү, ошондой эле саясий коррупцияны аныктоо жана бөгөт коюу боюнча туруктуу негизде ишин улантууда.

КР жараны “А.Д.” БШКнын азыркы мүчөсү “А.Э.”ге карата чараларды көрүү боюнча КР УКМК арыз менен кайрылган. БШКнын азыркы мүчөсү “А.Э.”   “Кыргызстан” саясий партиясынын лидерлеринин бири менен сүйлөшүүлөргө барып, 2020-жылдын июнь айында арыз менен кайрылган жарандан 2020-жылдын күз мезгилине пландаштырылган шайлоодо аталган партиянын депутаттыгына аны биринчи беш талапкердин бири катары тизмеге киргизүү үчүн 550 000 АКШ доллар өлчөмүндө акча алган.

Бирок, жогоруда көрсөтүлгөн адамдар өз милдеттенмелерин аткарбай, берилген акчанын 300 000 АКШ долларын жаран “А.Д.”га кайтарып беришип, калган 250 000 АКШ долларын өздөрүнө ыйгарып алуу менен  арыздануучуга өзгөчө ири өлчөмдө зыян келтиришкен.

2021-жылдын 11-сентябрында “А.Э.”нын Кыргыз Республикасынын БШКнын мүчөсү катары өзгөчө статусун эске алуу менен, ал Башкы прокурор тарабынан Кыргыз Республикасынын Кылмыш-жаза кодексинин 204-беренесинин 3-бөлүгү (алдамчылык) өзгөчө ири өлчөмдө жасалган жосундар) боюнча шектүү катары кабарланып, баш коргоо чарасын тандоо чечимин кабыл алуу үчүн Бишкек шаарынын Биринчи Май райондук сотуна жеткирилди.

Ошол эле күнү кылмыштын оордугун жана келтирилген зыянды эске алуу менен Бишкек шаарынын Биринчи Май райондук соту тергөө иши бүткүчө  “А.Э.”ны УКМК тергөө камак жайына камакка алуу түрүндөгү баш коргоо чарасын кабыл алды.

УКМК алдыдагы парламенттик шайлоого катышууну көздөгөн саясий күчтөрдү шайлоо мыйзамдарын бузууга жол берилбестиги жана саясий коррупцияны жоюу зарылдыгына көңүлүн  буруулары керек деп эсептейт.

Министрлер Кабинетинин Төрагасынын биринчи орун басары Азиз Аалиев Европа Биримдигинин Борбор Азия боюнча Атайын өкүлү Терхи Хакала менен жолугушту

Кыргыз Республикасынын Министрлер Кабинетинин Төрагасынын биринчи орун басары Азиз Аалиев Европа Биримдигинин Борбор Азия боюнча Атайын өкүлү Терхи Хакала менен жолугушту.

Азиз Аалиев Терхи Хакаланы Европа Биримдигинин Борбор Азия боюнча Атайын өкүлү кызматына дайындалышы менен куттуктады жана биргелешкен аракеттер аркылуу кыргыз-европа мамилелери саясий-дипломатиялык, соода-экономикалык, инвестициялык, маданий-гуманитардык тармактарда мындан ары карай өнүгөөрүн белгиледи.

Жолугушуунун жүрүшүндө Европа Биримдигинин Борбор Азия боюнча Атайын өкүлү Терхи Хакала маалымдагандай, Европа Биримдигинин өлкөлөрү өз ара кызыкчылык туудурган ар кыл багыттарда Борбор Азия өлкөлөрү, анын ичинде Кыргыз Республикасы менен кызматташууну кеңейтүүгө кызыкдар.

Өз кезегинде Азиз Аалиев белгилегендей, кыргыз тарап жакын арада кол коюлчу Европа Биримдиги менен кеңейтилген өнөктөштүк жана кызматташтык тууралуу келишимге өзгөчө маани берет.

Мындан тышкары, Терхи Хакала билдиргендей, европа тарап Бишкек шаарында 2021-жылдын 5-ноябрына пландаштырылган «Европа Биримдиги – Борбор Азия» Биринчи экономикалык форумунун өткөрүлүшүн колдойт.

«Иш-чаранын денгээлин, ошондой эле Борбор Азия менен Европа Биримдиги өлкөлөрүнүн өз ара пайдалуу мамилелеринин ырааттуу өнүгүшү үчүн анын маанилүүлүгүн эске алуу менен дардык иштери жогорку денгээлде жүрүүдө. Кыргыз Республикасы аталган форумга чоң маани берет», – деп белгиледи Министрлер Кабинетинин Төрагасынын биринчи орун басары.

Тараптар ошондой эле биздин өлкөдөгү жашыл экономиканы алга жылдыруу маселесин талкуулады. Европа тарап Кыргыз Республикасынын аймактарын туруктуу өнүктүрүү максатында аталган демилгени колдоого алууга даярдыгын билдирди.

Жолугушуунун жыйынтыгы боюнча өз ара аракеттешүүнүн бардык тармактарында эки тараптуу кызматташтыкты улантуу зарылдыгы тууралуу макулдашуу орун алды.

Кыргызстан үчүн УКМК Эл аралык «Касперский лабораториясы» менен «кибер калкан» түзүшөт

КР УКМК ЕККУнун Бишкектеги Программалык офисинин жардамы менен, маалымат коопсуздугу жана санариптик купуялык жаатында иштеген эл аралык «Касперский лабораториясы» компания менен киберкоопсуздук боюнча кызматташуу меморандумуна кол коюшту. Салтанатка «Касперский лабораториясынын» башкы директору Евгений Касперский жана КР УКМКнын төрагасынын орун басары, Кибер коопсуздукту координациялоо борборунун директору Жаныбек Жоробаев катышты.

Бул келишимдин артыкчылыктарынын бири – Кыргыз Республикасынын киберкоопсуздугунун комплекстүү системасын иштеп чыгуу жана ишке киргизүү. Кыргызстан кибер коркунучтардын ар кандай рейтингдеринде көп учурда алдыңкы катарларда турат. «Касперский лабораториясынын» маалыматы боюнча, 2021-жылдын башынан бери, Кыргызстанда болжол менен ар бир төртүнчү интернет колдонуучу ар кандай кибер коркунучтарга, ал эми ар бир экинчи интернет колдонуучу-колдонуучунун аппаратына алынуучу маалымат каражаттары аркылуу жергиликтүү (локалдык) коркунуч деп аталган чабуулдарга туш болгон.

Үстүбүздөгү жылдын алты айында «Касперский лабораториясы» Кыргызстандагы “фишинг” баракчаларына кирүүнүн 60 миңден ашыгына бөгөт койгон. Адистер киберкылмышкерлер барган сайын уюмдарды бутага алып жатканын белгилешет. Мисалы, 2021-жылдын январь-июнь айларында Кыргызстанда корпоративдик интернет колдонуучулардын 19% ы веб коркунучтарга, 42% ы жергиликтүү зыяндуу программаларга туш болушкан.

«Касперский лабораториясы» бул долбоорго улуттук масштабда киберкоопсуздук системаларын иштеп чыгуу жана киргизүү боюнча тажрыйбасы бар адистерди тартууну пландап, ошондой эле мамлекеттик маалымат системаларына каршы коркунучтар боюнча аналитикалык отчетторду берүүнү пландап жатат. Компания Кыргыз Республикасынын санариптик трансформациялоо программасынын маалымат системаларын жана ресурстарын коргоону көз карандысыз башкаруу боюнча өзүнүн техникалык компетенциясын калыптандырууга жардам берет. Бул үчүн семинарларды өткөрүү жана маалымат тутумдарын колдогон тутумдун администраторлору жана адистери менен дайыма консультация өткөрүү пландаштырылууда. Келишимдин алкагында талкууланган дагы бир кадам – тутумдук администраторлор үчүн үзгүлтүксүз билим берүү программасын ишке киргизүү жана университеттердин биринде окуу борборун жана «Маалыматтык коопсуздук» классын ачуу.

«Бул келишим бизге пайда алып келет. Биз «Касперский лабораториясы» менен компьютердик инциденттерге жооп берүү боюнча кызматташтыкты бекемдеп жатабыз, анткени кызматташуу кибер коркунучтарга каршы күрөшүүнүн эң эффективдүү жолу. Дүйнөдөгү киберкоопсуздуктун алдыңкы оюнчуларынын тажрыйбасы жана билими бизге мамлекеттик секторго, бизнеске жана жеке колдонуучуларга карата жасалган чабуулдарга каршы турууга жардам берет»-деди УКМКнын төрагасынын орун басары, Кибер коопсуздукту координациялоо борборунун директору Жаныбек Жоробаев. 

“Биздин портфолио салттуу антивирустук чечимдер менен чектелбейт. Биз ошондой эле татаал жана дайыма өнүгүп жаткан кибер коркунучтарга каршы күрөшүү үчүн кибер иммундук технологиялардын жана кызматтардын кеңири спектрин иштеп чыгабыз жана жайылтабыз, анын ичинде инфраструктуранын маанилүү объектилеринде дагы.

Биздин эксперттер мамлекеттик деңгээлде маалымат коопсуздугун жогорулатууну жана республикага кибер коркунучтардан эффективдүү, ыңгайлуу жана жеткиликтүү коргонууну ишке ашыруу үчүн КР УКМК менен иштөөгө кубанычта»,- деп кошумчалады «Касперский лабораториясынын» башкы директору Евгений Касперский.

ИИМ: Орозайым Нарматова ИИМдин Тергөө кызматына тергөө амалдарын жүргүзүү үчүн жеткирилди

Укук коргоо органдары тарабынан интернет тармагында укукка каршы аракеттерди аныктоо, эскертүү жана бөгөт коюу  боюнча мониторинг жүргүзүүнүн жана талдоонун натыйжасында Кыргыз Республикасындагы коомдук-саясий кырдаалды туруксуздаштырууга, өлкөнүн калкынын кеңири катмарынын арасында терс эмоцияларды жаратууга, жарандарды мыйзамсыз жана зомбулук көрсөткөн аракеттерге чакырууга багытталган фактылар аныкталган.

Ал эми О.Нарматованын билдирүүлөрү өлкөдөгү кырдаалды туруксуздаштырууга үгүттөгөн чакырыктар, эмгек мигранттарынын, Кыргыз Республикасынын аймагында жашаган жарандардын дагы арасында нааразылыктарды  козгогон белгилер бар болгон.    Топтолгон материалдар КЖБРге Кыргыз Республикасынын Жазык кодексинин 313-беренесинин 1-бөлүгүндө (Расалык, этностук, улуттук, диний же региондор ортосундагы кастыкты (араздашууну) козутуу) көрсөтүлгөн кылмыш белгилеринин негизинде катталып,   сотко чейинки өндүрүш башталды.

Кыргыз Республикасынын ИИМдин Тергөө кызматынын тапшырмасы менен   2021-жылдын 10-сентябрында О.Нарматова Ош шаарынын аэропортунда кармалган.  Учурда ал  ИИМдин Тергөө кызматына жеткирилип, тергөө амалдары жүрүүдө.

Казакстан Кабулдан 41 кишини эвакуациялады, арасында бир кыргызстандык бар

9-сентябрь күнү кечинде Казакстандын Коргоо министрлигинин учагы Ооганстандан 41 адамды Алматыга алып келди. Бул тууралуу казак Тышкы иштер министрлиги (ТИМ) кабарлады.

Мекеменин маалыматына караганда, Кабулдан 35 ооганстандык казак, төрт казак жараны, Кыргызстандын бир жараны жана Казакстанда туруктуу жашаган бир ооганстандык алып келинди.

Бүгүнкү күндө талибдер басып алган Ооганстанда дагы жүздөгөн казак бар. Алар өздөрүн тарыхый мекенине алып кетүү өтүнүчү менен Нур-Султанга кайрылууда.

Августта Кыргызстан ТИМи Казакстан Кабулдан 15 кыргызстандыкты алып келүүгө жардам бергенин билдирген. Ага чейин мекеме Ооганстандагы кырдаалга байланыштуу бул өлкөдөн тогуз кыргыз жараны мекенине жеткирилгенин кабарлаган. Азырынча Ооганстанда Кыргызстандын канча жараны бар экени жана алардын канчасы эвакуацияланганы боюнча так маалымат жок.

Буга чейин Казакстандын Тышкы иштер министрлиги Ооганстандагы казактарды тарыхый журтуна кайтарууга байланыштуу иш-аракеттер башталганын, бирок ооган жергесиндеги саясий-аскердик кырдаалдан улам аларды алып келүүнүн так мөөнөтү белгисиз экенин билдирген эле.

“Талибан” радикал кыймылы 15-августта Кабулду басып алгандан кийин казак бийлиги Ооганстанда 15 этникалык казак үй-бүлөсү бар экенин, алардын жалпы саны 200гө жакындай турганын маалымдаган. Бирок Ооганстандагы этникалык казактар бул сан алда канча көп экенин айтып келишет.

Адвокат: Орозайым Нарматова "бийликти басып алууга чакырык" жасаган деп шектелип жатат

“Бүтүн Кыргызстан” партиясынын мүчөсү, активист Орозайым Нарматова бийликти күч менен басып алууга чакырык жасаган деп күнөөлөнүп жатат. Бул тууралуу анын адвокаты Сейитбек Довлотов билдирди.

“Нарматова менен телефондон сүйлөшкөнгө үлгүрүп калдым. Ал “Бийликти күч менен басып алууга ачык чакырык таштаган” деген күнөөнү коюп жатат” деди. Ош облустук ички иштер башкармалыгынын тергөөчүлөрүнөн сурасам тапшырма Бишкектен келген экен. Кечээ Бишкектин Биринчи май райондук соту Орозайымдын жанындагы буюмдарды алып текшерүү тууралуу токтом кабыл алыптыр”, – деди Довлотов.

Активист Орозайым Нарматованы 10-сентябрда таңга маал Ош аэропортунан укук коргоо органдарынын кызматкерлери кармап кеткенин “Бүтүн Кыргызстан” партиясынын Ош облусундагы өкүлү Замир Шамшидин уулу “Азаттыкка” кабарлаган. Ал Нарматованы соттун чечими менен Бишкекке автоунаа менен алып кетишкенин айткан.

Ички иштер министрлиги (ИИМ) анын кармалышы боюнча маалымат такталып жатканын билдирди.

Орозайым Нарматова Орусияда иштеген эмгек мигранты. 2020-жылы өткөн парламенттик шайлоодо “Бүтүн Кыргызстан” партиясынын алдыңкы ондук тизмесине кирип, шайлоого катышкан.

Бир кезде президент Садыр Жапаровдун активдүү колдоочусу болгон. Жапаров октябрь окуяларында бийликке келгенден кийин анын саясатын кескин сындай баштаган. Ал бир канча күн мурун Кыргызстанга жакын тууганын жерге берүү үчүн келип, кайра Орусияга кетүү үчүн Ош аэропортуна барган.

Меню