Menu

САЯСАТ

ЖККУ Казакстанга аскерлерин жөнөттү

Жамааттык коопсуздук келишими уюму (ЖККУ) Казакстанга аскерлерин жөнөткөнүн расмий жарыялады. Бул тууралуу уюмдун Жамааттык коопсуздук кеңешинин төрагасы, Армениянын премьер-министри Никол Пашинян билдирди.

6-январь күнү эртең менен ЖККУдан “Интерфакс” орус агенттигине “уюм Казакстанга аскерлерин жөнөткөнүн” билдиришкен.

Орусиянын Мамлекеттик Думасынын КМШ боюнча комитетинин башчысы Леонид Калашников ЖККУнун күчтөрү аскердик инфраструктураны, Байкоңур космодромун жана башка объектилерди коргой турганын айткан.

Буга чейин Казакстандын президенти Касым-Жомарт Токаев Алматыдагы башаламандыктарга байланыштуу ЖККУга жардам сурап кайрылган. Ал Алматыдагы кырдаалды “террордук топтордун иши” деп атаган.

Социалдык түйүн колдонуучулары Токаевдин бул чечимин сындап, чет өлкөлүк аскерлердин кирише каршы пикирлерин жазып жатышат.

ЖККУга Армения, Беларус, Кыргызстан, Казакстан, Орусия жана Тажикстан кирет.

6-январда Алматы шаардык полиция департаменти калаада ондогон киши каза болгонун билдирди. Өлкөдө интернет байланыш жок болгондуктан, акыркы окуялар тууралуу маалымат алуу оор болууда.

5-январь күнү Алматыда башамандык болуп, белгисиз топ акимчиликти жана аэропортту басып алган. Өлкөдө 17:00дөн түнкү 12ге чейин интернет өчүрүлгөн. Шаардагы ондогон дүкөн жана банктар тонолгону кабарланган. Ага чейин Токаев баш калаадан кетпей турганын жана Коопсуздук кеңешин жетектээрин айтып, жалпы өлкө боюнча өзгөчө абал жарыялаган.

Садыр Жапаров ЖККУга мүчө өлкөлөрдүн лидерлери менен Казакстандагы кырдаал боюнча бир катар телефондук сүйлөшүүлөрдү өткөрдү

Кыргыз Республикасынын Президенти Садыр Жапаров кечээ кечинде ЖККУга мүчө өлкөлөрдүн лидерлери менен бир катар телефондук сүйлөшүүлөрдү өткөрдү.

Мамлекет башчысы Казакстан Республикасынын Президенти Касым-Жомарт Токаев, ЖККУнун Жамааттык коопсуздук кеңешинин төрагасы, Армениянын Премьер-министри Никол Пашинян, ошондой эле Россия Федерациясынын Президенти Владимир Путин менен сүйлөштү.

Лидерлер Казакстан Республикасындагы учурдагы кырдаалды талкуулашты.

Президент Садыр Жапаров коңшу өлкөдөгү болгон адам курмандыктары, көптөгөн талап-тоноочулук жана башка фактылар тууралуу маалыматтарга тынчсыздануусун билдирди.

Тараптар ЖККУнун Уставына ылайык, кризистик кырдаалды жөнгө салуу боюнча коопсуздукту камсыздоонун бирдиктүү позициясын талкуулашты.

Президент Садыр Жапаров Кумтөр кенине барды

Кыргыз Республикасынын Президенти Садыр Жапаров бүгүн, 2-январда, “Кумтөр” алтын кенине барып, “Кумтөр Голд Компани” ЖАКтын (“КГК”) ишмердүүлүгү менен таанышты.

Мамлекет башчысы ишкананын, оор тоо-кен техникаларын чыгаруучу цехтин учурдагы ишмердүүлүгү менен таанышып, Петров көлүн жана калдык сактоочу жайды да көрдү.

Мындан тышкары, Садыр Жапаров борбордук карьерди карап чыкты, анын түбүндө, мурда айтылгандай, болуп көрбөгөндөй көлөмдө суу топтолгон делген. Президент жеке өзү карьердин түбү кургак экенине ынанды.

Кенге болгон сапардын жүрүшүндө канадалык Centerra Gold компаниясы менен сүйлөшүү процессинде жакшы жылыштар бар экендиги, учурда тараптар башка нерселер менен катар “КГК” компаниясын толугу менен Кыргыз Республикасына өткөрүп берүүнү камтыган тынчтык келишимин талкуулоону жыйынтыктап жатканы белгиленди.

Мамлекет башчысы эң жакынкы убакта тараптар ортосундагы көп жылдык пикир келишпестиктерге чекит коюларына ишеним артты.

“Кумтөр” өлкөнүн тарыхынын жаңы барагы жана жаңы муун үчүн өнүгүүнүн үлгүсү болот! Өткөн жыл биздин адистер мындай ири жана татаал ишкананы натыйжалуу башкарып, жогорку өндүрүштүк көрсөткүчтөргө жетише аларын көрсөттү”, – деп белгиледи Президент Садыр Жапаров.

Ченем жаратуу жана мыйзамдын үстөмдүгү институту түзүлдү

Кыргыз Республикасынын Юстиция министрлигине караштуу Ченем жаратуу жана мыйзамдын үстөмдүгү институту түзүлдү. Тийиштүү чечимге Кыргыз Республикасынын Министрлер Кабинетинин Төрагасы Акылбек Жапаров кол койгон.

Аталган чечим Кыргыз Республикасынын Министрлер Кабинетинин ченем жаратуу ишинин сапатын жана натыйжалуулугун жогорулатуу, ченем жаратуу процесстерине илимий ыкмаларды киргизүү максатында кабыл алынган.

Мындан улам жана «Кыргыз Республикасынын Министрлер Кабинети жөнүндө» Кыргыз Республикасынын конституциялык Мыйзамынын 17, 22-беренелерине ылайык Кыргыз Республикасынын Юстиция министрлигине караштуу Ченем жаратуу жана мыйзамдын үстөмдүгү институтун түзүү чечими кабыл алынды.

Буга катар Кыргыз Республикасынын Юстиция министрлигине караштуу Ченем жаратуу жана мыйзамдын үстөмдүгү институту жөнүндө жобо бекитилди

КР Жогорку Кеңешинин VII чакырылышынын биринчи сессиясынын ачылышы өттү

Бүгүн, 29-декабрда Кыргыз Республикасынын Жогорку Кеңешинин VII чакырылышынын депутаттарынын биринчи сессиясынын ачылышы болду.

«Кыргыз Республикасынын Жогорку Кеңешинин Регламенти жөнүндө» мыйзамга ылайык Жогорку Кеңештин биринчи жыйналышын, Төрага шайланганга чейин төрагалык кылуучунун функцияларын аткаруучу, жашы боюнча улуу шайланган депутат ачат. Кыргыз Республикасынын Жогорку Кеңешинин VII чакырылышында биринчи жыйынды депутат Шарапаткан Мажитова алып барууда.

Алгач депутаттардын ант берүү аземи жана Кыргыз Республикасынын Шайлоо жана референдум өткөрүү боюнча борбордук комиссиясынын төрайымы Нуржан Шайылдабекованын белгиленген үлгүдөгү күбөлүктөрдү жана төш белгилерди тапшыруу аземи болуп өттү.

Ант берүү жана күбөлүктөрдү жана төш белгилерди тапшыруу аземинин соңунда төрагалык кылуучу депутат Шарапаткан Мажитова шайланган депутаттарга элдин, өлкөнүн жыргалчылыгы үчүн ийгиликтүү жана жемиштүү иштөөнү каалады.

Министрлер Кабинетинде кыргыз-кытай кызматташтыгы маселеси талкууланды

Кыргыз Республикасынын Министрлер Кабинетинин Төрагасы Акылбек Жапаров Кытай Эл Республикасынын Өкмөтүнүн Евразия маселеси боюнча атайын өкүлү Ли Хуэй менен жолугушту.

Акылбек Жапаров белгилегендей, биздин өлкө Кытай Эл Республикасы менен мамлекеттер аралык мамилелерди жана көп кырдуу кызматташтыкты ар тараптуу өнүктүрүүгө өзгөчө маани берет жана келерки жылы өлкөлөр дипломатиялык мамилелердин түзүлгөндүгүнүн 30 жылдыгын белгилешет.

«Бул жылдар аралыгында өз ара аракеттешүү аркасында өлкөлөр коңшулук, достук, ишенимдүү мамилелерди куруп жана сактап келүүдө. Биздин кызматташтыгыбыз эки өлкө элинин түпкү таламдарына жооп берген бардык маселелер боюнча өз ара колдоо көрсөтүү жана туруктуу өнөктөштүк менен мүнөздөлөт», – деди ал.

Ал Кытай Эл Республикасынын Өкмөтү тарабынан коронавирус инфекциясы пандемиясы учурунда берилген гумантирдык жардамга, ошондой эле азык-түлүк коопсуздугун камсыздоого көрсөткөн колдоосу үчүн ыраазычылык билдирди.

Акылбек Жапаров кыргыз тараптын биргелешкен инвестициялык жана инфраструктуралык долбоорлорду ишке ашырууга, өз ара сооданы өнүктүрүүгө кызыкдарлыгын баса белгиледи.

Министрлер Кабинетинин Төрагасы «Кытай-Кыргызстан-Өзбекстан» темир жолун куруу долбоорун ишке ашыруунун маанилүүлүгүн белгиледи, бул биз үчүн стратегиялык мааниге ээ жана республиканын транзиттик өлкөгө айланышына мүмкүндүк берет.

Акылбек Жапаров ошондой эле «Бир алкак – бир жол» доктринасы алкагында кызматташууну мындан ары активдештирүү зарылдыгын белгиледи.

Кытай Эл Республикасынын Өкмөтүнүн Евразия маселеси боюнча атайын өкүлү Ли Хуэй өз кезегинде эки өлкө ортосунда эки тараптуу мамилелердин жана ар тараптуу кызматташтыктын жогорку деңэгээли орун алгандыгын белгиледи.

«Кытай Эл Республикасы келечекте Кыргыз Республикасы үчүн ишенимдүү кошуна жана өнөктөш бойдон кала берет. Биз мындан ары да эки тараптуу кызматташтыкты кеңейтүүгө кызыкдарбыз», – деди ал.

Ли Хуэй белгилегендей, кыргыз-кытай мамилелеринин жогорку деңгээли жалпы региондун коопсуздугун камсыз кылууга маанилүү салым кошууда.

Жолугушуунун жүрүшүндө тараптар соода-экономикалык кызматташуунун актуалдуу маселелерин, анын ичинде кыргыз-кытай көзөмөл-өткөрүү пункттарында жүк ташуу көлөмүн жогорулатууну талкуулашты.

Баткен: кыргызстандык чек арачылар күчөтүлгөн тартипке өттү

26-декабрда кыргыз-тажик мамлекеттик чек ара аймагындагы чек ара кызматкерлери күчөтүлгөн тартипте кызмат өтөөгө өтүштү. Бул тууралуу УКМКга караштуу Чек ара кызматынын басма сөз бөлүмү билдирди.

Чек арачылар кыргыз-тажик чек ара аймагындагы кырдаалды көзөмөлдөп турат. 25-декабрда саат 14.30дарда Лейлек районунун Сай аймагынын тушунда Тажикстандын чек арачылары өз бекетинин аймагына миномет жайгаштырган. Ошондой эле Кыргызстандын Дамба жана Максат айылдарынын тушунда тажик аскерлеринин топтолгону байкалган. Телефон аркылуу сүйлөшүүлөрдөн кийин тажик тарап минемотун алып кеткени маалым болду.

Андан тышкары саат 19.30дарда Ош-Баткен-Исфана автожолунун Көк-Таш айылынын Эки-Таш аймагында Тажикстандын 3-4 жараны кыргызстандыктардын төрт машинесине таш ыргыткан. Андан автоунаалар жабыркап, эч ким жаракат алган эмес. Окуя болгон жерге барган “Көк-Таш” чек ара бекетинин башчысы эскертүү иретинде үч жолу асманга ок чыгаргандан кийин тажик жарандары качып кеткен.

Кыргыз тараптын маалыматына таянсак, окуядан кийин Эки-Таш аймагында Кыргызстандын жана Тажикстандын чек ара бекеттеринин башчылары жолугушкан. Тажик тарап окуяга катышы бар адамдарды издеп жатканын билдирген. Эскалацияга жол бербөө максатында Баткен чек ара кызматынын башчысы жана УКМКнын Баткен облусундагы башкармалыгынын жетекчиси окуя болгон аймакка барган.

Тажикстан расмий комментарий бере элек.

Кыргыз-тажик чек арасынын узундугу 970 чакырымдай болсо анын 519 чакырымы такталган, калганы тактала элек. Быйыл жазында эки өлкөнүн чек арасында куралдуу жаңжал болуп, андан ондогон адамдын өмүрү кыйылган.

Президент Садыра Жапаровдун демилгеси менен Исфана шаары Раззаков шаары деп аталат

«Быйыл Раззаковдун 110 жылдыгынын урматына Исфана шаарын Раззаков шаары деп атоо боюнча чечимимди кабыл алдым», — деп билдирди Кыргыз Республикасынын Президенти Садыр Жапаров бүгүн, 25-декабрда, Министрлер Кабинетинин жыйналышында.

Мамлекет башчысы жыйында сүйлөп жатып, 2021-жылы Баткен окуялары боюнча теманы козгоду. Ал чектеш өлкөлөр менен мамлекеттик чек аранын юридикалык тариздөөнүн аяктабагандыгы, айрым участкалар боюнча сүйлөшүү процессиндеги татаалдыктар, Кыргызстанга стратегиялык транспорттук инфраструктуранын коңшу өлкөлөрдүн аймактары аркылуу өтүшү — республиканын аймактык бүтүндүгүнө тикелей коркунуч болуп жатканын белгиледи.

«Быйыл биз кыргыз-тажик чек арасында болгон окуялардын кесепетинен жабыркаган Баткен облусун:

  • 3 айдын ичинде калыбына келтирдик.
  • Баткенге биринчи жолу стратегиялык чек катары мамлекеттик деңгээлде көңүл бурулду.
  • Облуска өзгөчө статус берилди.
  • Өнүктүрүү программасы кабыл алынды. 500 млн сомду жыл сайын бөлүп туруу чечимин кабыл алдык.

Баткен боюнча көп иштерди аткардык», — деди ал.

Мамлекет башчысы өткөн жылы Президенттик шайлоого аттанганда биринчи үгүт иши Раззаковдун жери — Баткенден баштаганын эске салды.

«Быйыл Раззаковдун 110 жылдыгынын урматына Исфана шаарын Раззаков шаары деп атоо боюнча чечимимди кабыл алдым», — деп сөзүн жыйынтыктады Президент Садыр Жапаров

Садыр Жапаров Министрлер Кабинетинин жыйналышында 2020-жылдын 5-октябрынан тартып аткарылган иштер жөнүндө отчет берди

«Бүгүнкү жыйынды – мен жалпы кыргызстандыктардын алдында аткаруу бийлигинин отчётун берүү деп эсептеймин», – деп билдирди Кыргыз Республикасынын Президенти Садыр Жапаров бүгүн, 25-декабрда, Кыргыз Республикасынын Министрлер Кабинетинин жыйналышында.

Президент Садыр Жапаров Азербайжандагы элчи Кайрат Осмоналиевге катуу сөгүш жарыялады

Sputnik Азербайжандын пресс-борборундагы маалымат жыйынына шилтеме кылуу менен Кыргыз Республикасынын Азербайжандагы Элчиси Кайрат Осмоналиевдин “Кыргызстан Орто Азия жана Кавказ өлкөлөрүнө Россиядан өзүнчө жолугушууну сунуштады”, – деп бир катар ЖМКларга жарыяланган маалымат чындыкка дал келбейт жана чагымчыл мүнөзгө ээ. Бул тууралу президенттин басма сөз кызматы билдирет.

Жогоруда белгиленген маекте бул тууралуу сөз да болгон эмес.

Аны менен бирге, ЖМКда бул сыяктуу бурмаланган чечмелөөгө жана ЖМКларда айың-кептерге жол берген, борбор менен макулдашылбаган билдирүүсү үчүн Президент Садыр Жапаров Кыргыз Республикасынын Азербайжандагы элчиси Кайрат Осмоналиевге катуу сөгүш жарыялады.

Меню