СПОРТ

Индиянын Бхубанешвар шаарында жеңил атлетика боюнча Азия чемпионаты аяктады. Кыргыз жергесинен бу чоң мелдешке Дарья Маслова, Адилет Кыштакбеков, Гүлшанай Сатарова, Мусулман Жоломанов, Арина Клещукова жана Кирил Сарасовдор барышкан. Бизди кубандырганы бу болду, Дарья Маслова желтаманыбыз 5000 метр аралыкка чуркоодо марага 15 мүнөт 57.95 секунд убакта биринчи келген. Кийинки 10 000 метр аралыкта болсо 32 мүнөт 21.21 секундда марага биринчи жетип, Азиянын эки жолку чемпиону деген наамды жеңип алган. Дарьянын жылдызы жанып турган кез. Эгер ушу темпти колдон чыгарбаса, жакынкы олимпиада оюндарында байгелүү орундарды багынтып коюшу да мүмкүн деген маанай жаралып отурат. Дагы бир желтаманабыз Адилет Кыштакбеков 10 000 метр аралыкга 30 мүнөт 05.65 секундада мараны кезип өтүп, Азиянын татыктуу коло медалын багынтты. Эки желтамандарыбызга мындан аркы мелдештерине ийгилик каалап турабыз.

Булак: “Азия Ньюс”

Польшанын Варшава шаарында Poland Open 2017 аттуу кыз-келиндер арасында эркин күрөш боюнча Гран-при мелдеши өттү. Айсулуу Тыныбекова (58 кг) финалдык мелдеште Рио олимпиада чемпиону америкалык Хэлэн Марулис менен чыгып, беттешүү акырына чыкпай калган. Айсулуу оң ийнинен катуу жаракат алып, мелдеш уланбай, күмүш медалга арзыган. Бул боюнча машыктыруучусу Нурбек Изабеков «Айсулуу азыр физиодарылануу алып жатат. Польшада булчуңу бир аз чоюлуп калды. Балбандар күрөшкөн учурда мындайлар бат-бат болуп турат. Эч бир коркунуч деле жок. Мурун да ушундай болгон, эски травма десем болот. Айсулуу күрөштү уланта берсе болмок. Бирок, мен уруксат бергеним жок. Бул мелдеш дүйнөлүк мелдешке болгон кезектеги даярдыктын бири болчу. Азыр алдыда эң негизги мелдешибиз Франция өлкөсүндө өтө турган дүйнөлүк чемпионат. Биз ушуга кам көрүшүбүз керек» деди.

Булак: “Азия Ньюс”

Тийиштүү чечим 11-июль, шешембиде, Кыргыз Республикасынын вице-премьер-министри Чолпон Султанбекованын катышуусу менен өткөн 2017-2020-жылдар  аралыгындагы  Кыргыз Республикасынын эл аралык спорттук мелдештерге катышуучу спортчуларынын курама командаларын камсыз кылуу жана даярдыктар боюнча өткөн жыйындын жүрүшүндө кабыл алынды. Бул туурасында  Өкмөттүн Аппаратынын маалыматтык камсыздоо бөлүмү билдирет.

«Кыргыз Республикасынын Өкмөтү атамекендик спортту өнүктүрүүгө анын ичинде жаш өспүрүмдөрдүн спортун ар тараптуу өнүктүрүүгө колдоо көрсөтөт. Негизги көңүл турмуштук оорчулукка карабастан, спорт менен активдүү алектенген, республиканын намысын эл аралык мелдештерде коргогон  ден соолугунан мүмкүнчүлүгү чектелген жарандарды колдоого бурулат», – деп билдирди Кыргыз Республикасынын вице-премьер-министри Чолпон Султанбекова.

Жыйындын жүрүшүндө уюштуруу комитети 2017-2020-жылдар аралыгында өтүүчү эл аралык спорттук мелдештердин комплектүү түзүмүн карады. Вице-премьер-министр Чолпон Султанбекова уюштуруу комитетинин мүчөлөрүнүн  көңүлүн спорттук кийимдерди даярдоодо анын сапатына көңүл буруу зарылдыгын баса белгиледи.

Эске салсак, Кыргыз Республикасынын Өкмөтүнүн буйругу менен 2017-жылдын 8-июлунда алдыда өтүүчү  эл аралык спорттук мелдештерге Кыргыз Республикасынын курама командаларын катышуусун камсыз кылуу жана  даярдоо боюнча уюштуруу комитети түзүлгөн.

Жыйындын соңунда 2017-2020-жылдар аралыгында өтүүчү эл аралык спорттук мелдештердин комплектүү түзүмү бекитилди.

-2017-жылдын 18-30-июлунда Түркия Республикасынын Самсун шаарында XXIII жайкы  Сурдолимпиядалык оюндар,

– 2017 -жылдын  17-20 сентябрында Түркмөнстан Республикасынын Ашхабат шаарында жабык жайдагы  алышуу искусствосу боюнча  V Азия оюндары;

– 2018-жылдын 9-25-февралында Корея Республикасынын Пхёнчан шаарында XXIII кышкы олимпияда оюндары;

– 2018-жылдын 9-18-мартында Корея Республикасынын Пхёнчан шаарында өтүүчү XII Паралимпиядалык оюндар;

– 2018-жылдын 11-23-сентябрында Аргентинын Буенос-Айресосе шаарында өтүүчү балдардын жайкы олимпияда оюндары;

– 2018-жылдын 5-20-сентябрында Индонезиянын  Джакарта жана  Палембанг шаарларында өтүүч жайкы  Азия оюндары;

– 2019-жылдын, 2-12-мартында Россия  Федерациясынын Красноярск шаарында XXIX кышкы универсиада;

– 2019-жылдын 19-30-июлунда Италиянын Неаполь шаарында өтүүчү XXX  жайкы универсиада;

– 2020-жылдын 10-19-январында  Швейцариянын Лозанна шаарында өтүүчү  III  өспүрүмдөрдүн кышкы олимпиядалык оюндары;

– 2020-жылдын 24 июлунан  9 августуна чейин Япониянын  Токио шаарында өтүүчү XXXII жайкы  Олимпияда оюндары.

Кыргыз Республикасынын Премьер-министри Сооронбай Жээнбеков бүгүн, 12-июлда, жеңил атлетика боюнча Азия чемпионатынын жеңүүчүлөрү Дарья  Маслова жана  Адилет Кыштабеков, ошондой эле алардын машыктыруучулары менен жолугушту. Бул туурасында Өкмөттүн Аппаратынын басма сөз кызматы маалымдады.

Эске салсак эл аралык турнир Индия Республикасынын  Бхубанешвар шаарында болуп өттү.

Дарья Маслова 5 жана 10 миң метр аралыкка чуркоодо жеңип чыгып, Кыргызстанга эки алтын медалды алып келди. Дагы бир коло медалды 10 000 метр аралыкка чуркоодо байгелүү орунга  Кыргыз Республикасынын курамасынан Адилет Кыштабеков ээ болду.

Премьер-министр Сооронбай Жээнбеков жеңил атлетиктерди татыктуу жеңиши менен куттуктап, спортчуларды Кыргыз Республикасынын  Премьер-министринин атынан ысымы жазылган саат менен сыйлады.

«Эгемендүүлүк жылдардагы кыргыз спортунун тарыхында Дарьянын жеңиши уникалдуу болуп саналат. Сиздин жеңишиңизди сыймык менен кабыл алам. Сиз Кыргызстанды эл аралык спорттук аренада татыктуу тааныта алдыңыз. Мен биздин спортчулардын жеңил атлетика боюнча Азия чемпионатындагы чыгуусун көрдүм жана спортчуларыбызды чын дилимден колдодум. Спорт мага чоочун эмес. Мен өз убагында волейбол боюнча райондун курама командасында ойногом. Мектепте болсо аталган спорттун түрү боюнча команданын капитаны болгом », – деп ой  бөлүштү Сооронбай Жээнбеков.

Өкмөт башчы Дарья Масловага жана Адилет Кыштабековго алдыда жаңы жеңиштерге жана жетишкендиктерди багынтарына  ишенимин билдирди.

Өз кезегинде Адилета Кыштабековдун машыктыруучусу Виктор Борисов баса белгилегендей, Кыргыз Республикасынын Өкмөтү тарабынан акыркы жылдары спортко сезилээрлик колдоо көрсөтүлүп жатат.

«Биздин спортчулар жакшы жыйынтыктарды көрсөтүштү, бирок биз мунун менен эле токтоп калбайбыз, биз дагы алдыга карай өсүшүбүз керек. Адилет Кыштабековдун спорттогу келечеги кең, экинчи жаш Сатымкул Жуманазаров өсүүдө деп айтсам болот. Кыргыз Республикасынын Өкмөтүнө колдоо көрсөткөндөүгү үчүн ыраазычылык билдиребиз. Биз – машыктыруучулар жана спортчулар Өкмөт тарабынан анын ичинде Сиздин көңүл буруп жатканыңызды сезип турабыз. Түрдүү тармактарда кыйынчылыктар болууда, бирок спорт камкордуксуз  калган жок. Ушул жылдар аралыгында каржылык же дагы башка көйгөйлөргө туш болгон жокпуз», – деди Виктор Борисов.

Дарья Маслованын машыктыруучусу  Татьяна Борисова  дагы Өкмөткө жана Премьер-министрге ыраазычылыгын билдирди. Ал Дарья Маслованын Азия чемпионатындагы алтын медалын өзгөчө баса белгиледи. Бул- Кыргызстандын  жалпы жеңиши.  «Татыктуу чыгуу менен биз үч медалды алдык жана жана байгелүү орунга ээ болдук. Дарьянын татыктуу жеңишин башка өлкөлөрдүн спортчулары дагы өздөрүнүн таасирлерин жашырбастан билдиришип, куттукташты», – деп баса белгиледи  Татьяна Борисова.

Премьер-министр Сооронбай Жээнбеков белгилегендей, ар бир жеңиш бул – спортчулар менен машыктыруучулардын  чоң эмгеги жана өлкө өз ишине берилген мындай адамдары менен сыймыктанат.

Сооронбай Жээнбеков Өкмөттүн Аппаратына жана Жаштар иштери, дене тарбия жана спорт боюнча  мамлекеттик агенттигине спортчуларды жана алардын машыктыруучуларын Өкмөттүк жана мамлекеттик сыйлыктарга көрсөтүүнү тапшырды.

«Сиздер эл аралык мелдештерде Кыргызстандын намысын коргодуңуздар. Өкмөт тарабынан спортту өнүктүрүүгө, спорчулардын даярдыгы үчүн зарыл шарттарды түзүүгө  болгон аракеттер күчөтүлөт», – деп билдирди  Премьер-министр Сооронбай Жээнбеков.

-Дастан, жеңишиң куш болсун! Россияда өткөн таймашта бир эмес, эки орусту тоголото койдуң. Өлкө намысын коргодуң, рингге канча жашыңда чыктың эле?

-Спортко Кыргызстанда жүргөндө эле кызыгуум башталган. Мени алгач машыктырган машыктыруучуларым Кыргызстанда жашашат. Ал эми Москвага мени спорт алып келген. Москвадан профессионалдуу машыга баштадым. Биздин жашообуз спорт менен байланыштуу. Спорт аркылуу биз Кыргызстандын өсүп-өнүгүшүнө салымыбызды кошкубуз келет. Биз Кыргызстандын жараныбыз да. Ар бир турнирге калпак кийип, желек көтөрүп чыгабыз.

-Анткениң жакшы, сенин рингде чабышып жатканыңды көрүп өжөр экениңди баамдадык. Спортто өжөрлүк алга сүрөйбү?

-Албетте, спортко аралашкандан кийин беттегенин бербей, өжөр болушуң керек. Мага өжөрлүгүм сиз айткандай бир топ эле ийгиликке жетүүмө түрткү берет. Эгер өжөр болбой, алга умтулбаса, көк беттенбесе спортто жеңишке жетүү оор.

-Жогорку билим алдың беле?

-Ооба, юридикалык билимге ээ болгом. Бирок азырынча өз кесибим менен иштей элекмин. Буюрса маалы келгенде иштейм деген тилегим бар.

-Москвада спорттон тышкары эмне менен алектенесиң?

-Спорт тармагында эле жүрөм. Машыктыруучу болуп да эмгектенем.

-Буга чейинки ийгиликтериң тууралуу айтсаң?

-Азия жана Евразиянын чемпионумун. Бардыгы болуп, 32 профессионалдык таймашка чыгып беттешкем. Андан сырткары, чоң титулдук таймаштарга да катышып келем.

-Спортту таштабайсыңбы?

-Андай оюм жок. Күчүм барда спортту уланта берем. Алдыда дагы көп ийгиликтер күтүп турат деген оптимистгик маанай менен алдыга карай умтулуудамын.

-Москванын Казань шаарында болгон беттеште атаандашыңа жеңишти берип койгондо нааразы экениңди ачык билдирбедиңби, ошол тууралуу айтсаң, жеңиш чын эле адилетсиз болгонбу?

-Ал беттеште калыстар туура эмес чечим кабыл алып коюшкан. Негизи үч раунд таймаш болмок. Үчүнчүсүндө, мен атаандашымды нокдаунд кылгам. Бирок анда аны машыктыруучусу “эреже бузуу” катары эсептеп, атаандашымды тургузуп кетти. Төртүнчү раунд кошумча берилди, аны дагы биз жеңдик. Бул өзү масштабдуу өткөн маанилүү мелдеш. Чемпионатка мыкты спортчуларды алат, чемпиондук курга таймаш болот. Жыйынтыгында, атаандашымдын колун көтөргөндө, өзүмдү жоготуп койдум. Спортко көп убактымды, жаштыгымды арнап жаткандан кийин калыстардын туура эмес чечимдери мага катуу тийди, ошол себептен, мен аны “акыйкатсыздык” деп атап, рингден кетүүдөн баш тарттым.

-Жеңилген атаандашың деле бир кызыктай абалда калганы байкалды…

-Негизи андай адилетсиздик кыргыз спортчуларына буга чейин деле болуп келген. Көбүнчөсү айтылбай эле кала берчү. Бул жолу мен өзүмдү кармай албай калдым. Мен рингде сүйлөп жатканда кыргыздар мени колдоп жатканын уктум да, мени колдогондор бар экенин, мен жалгыз эмес экенимди түшүндүм. Мени колдогон кыргызстандыктарга терең ыраазымын.

Булак: “Фабула”

Чолпон-Ата шаарында улуттук оюндардын төрөсү болгон ордо боюнча эл аралык чоң мелдеш аяктады. Ыйман, адеп жана маданият жылына арналган бул мелдешке Кыргызстан, Казакстан, Тажикстан жана АКШ мамлекеттеринен келген томпойчулар күч сынашты. Мелдеш айлампа түрүндө ар бир команда атаандаштарына эки жолудан бөгүп бермей ыкмасында жүрүп, жыйынтыгында Кыргызстандын томпойчулары «Алтын томпой» мелдешинин жеңүүчүлөрү болуп калды. Экинчи орунду Тажикстандагы этникалык кыргыздар багынтышты. Байгелүү үчүнчү орунду коңшу Казакстандын курамы жеңди.

Булак: “Азия Ньюс”

Ош шаарында Алыш күрөшү боюнча Курманжан датканын жаркын элесине арналган кыз-келиндер арасында эл аралык «Гран-при» мелдеши аяктады. Мелдешке Кыргызстан, Голландия, Өзбекстан, Беларусь, Иран, Казакстан, Грузия, Болгария жана Сербия мамлекеттеринин балбан кыздары катышты. Күрөш классикалык жана эркин түрүнөн жүргүзүлүп, 55,60,70,75 жана 75 килограммдан жогору салмак чени боюнча жеңүүчүлөр аныкталды. Алсак, классика түрүнөн Шахзода Ергашева- 55 кг (Өзбекстан), Мээрим Момунова – 60 кг (Кыргызстан), Дилафруз Мамаджонова – 65 кг (Өзбекстан), Гулмира Исматова – 70 кг (Өзбекстан), Нино Одзелашвили – 75 кг (Грузия), Туба Уна Светлана – 75тен жогору (Сербия). Эркин түрүнөн Захра Яазданичерати – 55 кг (Иран), Мээрим Момунова – 60 кг (Кыргызстан), Бактияр кызы Нурзат – 65 кг (Кыргызстан), Гулмира Исматова – 70 кг (Өзбексган), Нино Одзелашвили – 75 кг (Грузия), Туба Уна Светлана – 75тен жогору (Сербия).

Булак: “Азия Ньюс”

Россиянын Москва шаарында WEF 35 Selection 11 аттуу кулатуу эр таймашы боюнча эл аралык мелдеш аяктады. Турнирге Кыргызстан, Россия, Тажикстан, Өзбекстан жана Франция мамлекетинин балбандары катышты. Бизден барган 22 эрендин ичинен бирөө гана жеңишти атаандашына ыйгарган болсо, калган 21 балбан жеңишти колдон чыгарбай атаандаштарын утуп алышкан.

Алсак, Нурбек Мааткабылов, Мырзамидин Пазылов, Улук Аманбаев (57 кг.), Жумабай уулу Эльдияр, Осмонали уулу Манас, Муса Жолдошев, Камбарали Раимбаев, Умарали Акматов, Алманбет Узаков, Тынчтыкбек Иминжанов (61 кг.), Кашамат уулу Нурбек, Абиюсуп Канибек, Саламбек уулу Амантур, Актилек Супатаев, Баяман Маматалиев (66 кг.), Маданбек Касымбеков, Талгат Шатманов, Азимжан уулу Бектемир (71 кг.), Талгат Ормушев (77 кг), Алманбет Жаныбеков (84 кг) жана Зарылбек уулу Данияр (93 кг).

Булак: “Азия Ньюс”