Menu

КРИМИНАЛДЫК ХРОНИКА ЖАНА ОКУЯЛАР

Жогорку Кеңештин депутаттарын шантаж кылып $2000 пара алып жаткан жеринен журналист Санрабия Сатыбалдиева кармалды

Кечээ, 3-ноябрда 2000 АКШ долларын өткөрүп берүү учурунда 2016-2017-жылдардагы соцтармактарда жарыяланган аудиожазууларды шантаж кылуу жолу менен Кыргыз Республикасынын Жогорку Кеңешинин депутаттарынан акча каражатын туруктуу негизде талап кылган бир катар адамдар кармалган. Бул тууралу ИИМдин басма сөз кызматы билдирет.
Кылмыштын негизги аткаруучусу болуп «МИР24.kg» маалымат порталынын башкы директору “С.С.К.” жана ошол эле учурда Жогорку Кеңештин депутаты Тазабек Икрамовдун пиар-менеджери болуп саналат.
Ошондой эле бул кылмышка көмөктөшкөндүктөрү үчүн шектелип «МИР24.kg» маалыматтык порталдын оператору – “Б.у.К.” жана “Жорго-Такси” компаниясынын айдоочусу Өзбекстан Республикасынын жараны “М.М.Х.” кармалышты.
Азыркы учурда КР Кылмыш жаза-кодексинин 208 беренесинде (Опузалап талап кылуу) каралган кылмыштын белгилери менен кылмыш иши козголуп, тергөө иштери жүргүзүлүүдө.
Кармалган жарандар бул кылмышты жасагандыгы жөнүндө мойнуна алып, өз көрсөтмөлөрүн беришти.

Сот журналист Семетей Талас уулун үй камагына чыгарды

Бүгүн, 3-ноябрда Бишкектин Биринчи май райондук соту журналист Семетей Талас уулунун бөгөт чарасын карап, аны үй камагына чыгарды.

Журналист тергөө аяктаганга чейин үй камагында болот, Бишкек шаары менен Чүй облусунун аймагынан тергөөчүнүн уруксаты жок чыга албайт.

Сот башталардын алдында Талас уулу журналисттердин суроосуна жооп берип, кармалган себебин айтты. Ал 2021-жылы Фейсбук баракчасынан Ооганстан тууралуу материалды байкабай бөлүшүп койгону үчүн күнөөлөп жатышканын билдирди.

Семетей Талас уулун милиция 1-ноябрда кармап кеткен жана сурактан кийин аны 48 саатка камаган.

Ички иштер министрлиги (ИИМ) журналистке буга чейин Кылмыш-жаза кодексинин 322-беренесинин 1-бөлүгү (экстремисттик материалдарды даярдоо, таратуу) менен кылмыш иши козголгонун жана бул факт Улуттук коопсуздук комитетинде катталганын билдирген. Милиция комплекстүү соттук-лингвистикалык экспертиза “Кыргызстанда тыюу салынган “Хизб ут-Тахрир” экстремисттик уюмуна таандык маалымат камтылган материалды бөлүшкөн” деген корутунду чыгарганын айткан.

Журналист буга чейин социалдык тармактарда Кемпир-Абад маселеси, камалгандар тууралуу пикирин байма-бай билдирип келген.

41 жаштагы Семетей Талас уулу эркин журналист катары белгилүү. Көбүнчө уюшкан кылмыштуу топтор, коррупция темалары боюнча макалаларды жазат. Соңку жылдарда эркин журналист катары социалдык тармактардагы баракчалары аркылуу коомдогу ар кыл окуяларга өз пикирин активдүү жазып келет.

Журналист Семетей Талас уулу 48 саатка камакка алынды

Журналист Семетей Талас уулу Бишкек шаардык ички иштер башкармалыгынын убактылуу камоочу жайына 48 саатка камакка алынды. Бул тууралуу анын адвокаты Аскат Жакупбеков журналисттерге билдирди.

Анын айтымында, Талас уулуна Кылмыш кодексинин 332-беренеси (“Экстремисттик материалдарды даярдоо, таратуу”) менен айыбы угузулуп, камакка алынды. Анын бөгөт чарасы эртең, 2-ноябрда каралат.

Ички иштер министрлиги журналисттин кармалышы тууралуу азырынча комментарий бере элек.

Семетей Талас уулу жыл башында Улуттук коопсуздук комитетинде Кылмыш-жаза кодексинин “Экстремисттик материалдарды таратуу” деген беренесинин негизинде козгогон кылмыш ишинин алкагында сурак берген. Сурактан чыккандан кийин “чоң иликтөө жүрүп жаткан ишке байланыштуу күбө катары чакырылганын” айткан.

Ал буга чейин социалдык тармактарда Кемпир-Абад маселеси тууралуу пикирин байма-бай жазып келген.

41 жаштагы Семетей Талас уулу эркин журналист катары белгилүү. Көбүнчө уюшкан кылмыштуу топтор, коррупция темалары боюнча макалаларды жазат. Соңку жылдарда эркин журналист катары социалдык тармактардагы баракчалары аркылуу коомдогу ар кыл окуяларга өз пикирин активдүү жазып келет.

УКМК: Жогорку Соттун Сот департаментинин жетекчилери 42 млн сомдук санариптик жабдыктарды сатып алууда 5,5 млн сомду уурдашып кармалышты

Кыргыз Республикасынын УКМК козгогон кылмыш ишинин алкагында, Кыргыз Республикасынын сот системасына сатып алынган санариптик жабдыктардын баасын кымбаттатуу фактылары аныкталды.

2020-жылы мамлекеттик органдарды санариптештирүү боюнча мамлекеттик долбоорлордун алкагында республиканын сот системасына жалпы 42 миллион 835 миң 250 сомдон ашык суммага техникалар сатылып алынганы такталган. 

Ошону менен бирге, иликтөөнүн алкагында аталган мамлекеттик органдын жооптуу адамдары жеке баюу максатында компаниялардын өкүлдөрү менен жең учунан сүйлөшүп алышып, алар сатып алынган товарлардын жана кызмат көрсөтүүлөрдүн иш жүзүндөгү баасын ашыкча баалаган фактылар аныкталган.

Мындай мыйзамсыз аракеттердин натыйжасында, мамлекетке 5 миллион 519 миң 170 сом өлчөмдө зыян келтирилген.

Текшерүүнүн жүрүшүндө келтирилген зыяндын орду толук толтурулуп, Кыргыз Республикасынын Жогорку Сотуна караштуу Сот департаментинин мамлекеттик сатып алуулар боюнча жооптуу кызмат адамдарынын аракеттерине юридикалык баа берилүүдө.

Тажикстан иран дрондорун Орусияга жеткирип жатканы тууралуу маалыматты четке какты

Тажикстандын Тышкы иштер министрлиги украиналык журналист жана блогер Дмитрий Гордондун Тажикстан Орусияга Украинанын айыл-шаарларына чабуул жасоо үчүн сокку уруучу дрондорду берип жатканы жөнүндө айтканын четке какты.

Тажикстан ТИМинин 30-октябрда жарыялаган билдирүүсүндө “Украин блогери Дмитрий Гордондун 2022-жылдын 28-октябрдагы “В гостях у Гордона” онлайн-берүүсү учурунда Тажикстан аймагында Ирандын украиналыктарды өлтүргөн дрондору өндүрүлүп жатканы тууралуу сөзүн четке кагабыз. Тажикстан Республикасы аскердик техниканы үчүнчү өлкөгө экспорттобой турганын белгилейбиз”, деп айтылган.

Гордон берүү учурунда Тажикстандын Тышкы иштер министрлигинен бул маалымат жалган болсо четке кагууну сураган.

Быйыл майда ЖМКларда Иран Тажикстанда Ababil-2 учкучсуз учактарын чыгаруу боюнча завод ачканы кабарланган.

Анда Ирандын Башкы штабы объектинин ачылыш аземине штабдын башчысы Мохаммад Бакири менен Тажикстандын коргоо министри Шерали Мирзо катышканын маалымдаган.

Бирок Орусия Ирандан “Шахед” жана “Мохажер” дрондорун сатып алып жатканы айтылууда.

УКМК: “Хизб ут-Тахрир аль-Ислами” ДЭУнун жашыруун ячейкасынын активдүү мүчөлөрү кармалды

Үстүздөгү жылдын 27-октябрында Кыргыз Республикасынын Кылмыш-жаза кодексинин 332-беренесинин 2-бөлүмү (Экстремисттик материалдарды даярдоо, таратуу) боюнча козголгон кылмыш ишинин алкагында, Жалал-Абад облусунун Сузак районунун Кургак-Көл айылынын аймагында, ай сайын өткөрүлүүчү “чогулушта” “Хизб ут-Тахрир аль-Ислами” ДЭУнун лидери А.И.Т., И.З.К., К.М.Т., М.Х.Ч., Б.И.М., А.Т.Ж. жана Ч.Х.Т., Э.Н.Т., Х.Ф.Г., П.С.А., А.Д. аттуу активдүү мүчөлөрү кармалды.

Жүрүзүлгөн тинтүү иштеринин натыйжасында ири өлчөмдөгү экстремисттик мүнөздөгү адабияттар, баракчалар, уюлдук телефондор, электрондук маалымат каражаттарды алып жүрүүчүлөр жана ячейканын каржылык ишмердүүлүгү тууралуу маалыматтар алынган.

Бул адамдар экстремисттик идеологияны жайылтуу максатында системалуу түрдө диний сабактарды өткөрүп, ошондой эле социалдык тармактар аркылуу экстремисттик материалдарды таратып жүрүшкөн.

Кармалган жарандар  УКМКнын Жалал-Абад областтык  башкы башкармалыгынын тергөө камак жайына киргизилди.

Алардын кошумча кылмыштуу байланыштарын аныктоо боюнча ыкчам-тергөө иш-чаралары жүрүп жатат.

Бишкекте журналист кол салууга кабылды

SuperTV телеканалынын кабарчысынын сабалышы боюнча Бишкектин Ленин райондук милициясына арыз жазылып жатканын аталган маалымат каражаты 27-октябрда кабарлады.

Телеканалдын редакциясы кабарчы Бактурсун Жоробековдун сабалышы анын кесиптик ишмердүүлүгүнө байланыштуу болушу мүмкүн деп эсептөөдө.

Маалыматта айтылгандай, окуя 26-октябрда саат 23:30 чамасында Бишкектин Ленин районунда болгон. Жоробековго төрт киши кол салган. Анын айтымында, белгисиз бирөөлөр телефон чалып издешкен жана коркутуп-үркүтүп жүрүшкөн.

Укук тартибин коргоо органдары бул тууралуу азырынча комментарий берише элек.

Журналисттерге кол салган учурлар Кыргызстанда буга чейин да катталган. Буга байланыштуу эл аралык укук коргоо органдары тынчсыздануусун билдиришкен.

ИИМ: Кара-Балта шаарынын мэриясынын бөлүм башчысы $2000 пара алып жаткан жеринен кармалды

Үстүбүздөгү жылдын октябрь айынын ортосунда ИИМдин Тергөө кызматына кызмат адамы пара талап кылып жаткан факты боюнча чара көрүү өтүнүчү менен Чүй облусунун тургуну кайрылган. Кара-Балта шаарынын мэриясынын кызматкери жер маселесин чечип берүү жана коммерциялык объекттин оң чечилишине көмөк көрсөтүү максатында бир нече айдан бери 2000 АКШ доллары өлчөмүндө акча талап кылган. Бул тууралу ИИМдин басма сөз кызматы билдирет.
Бул факты боюнча ИИМдин Тергөө кызматы тарабынан Кылмыш-жаза кодексинин 343-беренесинин 1-бөлүгүнүн (Опузалап пара талап кылуу) негизинде кылмыш иш козголгон. Кылмыш ишинин алкагында ыкчам-иликтөө иш-чаралары ИИМдин Кылмыш иликтөө башкы башкармалыгынын 3-башкармалыгынын кызматкерлери тарабынан жүргүзүлгөн.
Бир күн мурда Кара-Балта шаарында жүргүзүлгөн ыкчам-иликтөө иш-чараларынын жүрүшүндө ИИМдин Кылмыш иликтөө башкы башкармалыгынын 3-башкармалыгынын уюшкан кылмыштуу топторду мыйзамсыз каржылоого бөгөт коюу боюнча бөлүмүнүн кызматкерлери кылмышка шектүү 2000 АКШ доллары өлчөмүндө акча каражатын алып жаткан жеринен кармашты. Кармалган жаран Кара-Балта шаарынын мэриясынын бөлүмдөрүнүн биринин башчысы болуп иштеп келген. Кармалган жаран К.Т. Жазык-процесстик кодексинин 96-беренесине ылайык, Бишкек шаарынын ички иштер башкы башкармалыгынын убактылуу кармоочу жайына киргизилди. Учурда пара талап кылуу фактысы иликтенүүдө.
Соттун чечими менен кармалган жаранга карата 2 айга камакка алуу түрүндөгү бөгөт чарасы тандалды.

ИИМ: Баткендин тургунун физикалык күч менен коркутуп, 3 миллион сом талап кылган рэкетчи $200.000 алып жаткан жеринен кармалды

Үстүбүздөгү жылдын октябрь айынын башында ИИМдин Тергөө кызматына Баткен облусунун тургуну май айынан ушул күнгө чейин шантаж жолу жана физикалык күч менен коркутуп, 3.000.000 сом акча каражатын опузалап талап кылып жаткан бейтаныш жаранга карата мыйзам чегинде чараларды көрүп берүүлөрүн суранган. Бул тууралу ИИМдин басма сөз кызматы билдирет.
Бул факты боюнча ИИМдин Тергөө кызматы Кыргыз Республикасынын Кылмыш-жаза кодексинин 208-беренесинин 2-бөлүгүнүн 3-пунктунда (Опузалап талап кылуу) көрсөтүлгөн кылмыш белгилери боюнча  кылмыш ишин козгогон.
Козголгон кылмыш ишинин алкагында ыкчам-издөө иш-чаралары  ИИМдин Кылмыш иликтөө башкы башкармалыгынын 3-башкармалыгынын уюшкан кылмыштуу топторду мыйзамсыз каржылоого бөгөт коюу боюнча бөлүмүнүн кызматкерлери тарабынан жүргүзүлгөн. Кылмышкердин табити барган сайын күчөп, Бишкектен эки батир, акча талап кылган. Алардан тышкары ал кийинчерээк ири өлчөмдө акча алып келүүнү талап кылган.
2022-жылдын 25-октябрында  ИИМдин Кылмыш иликтөө башкы башкармалыгынын 3-башкармалыгынын кызматкерлери иш-чараларын жүргүзүшүп, анын жүрүшүндө 100 000 миң сом өлчөмүндөгү акча каражатын, ошондой эле жалпы баасы 200 000 АКШ долларын түзгөн эки батирди алып жаткан жеринен шектүүнү кармашкан. Кармалган жаран Баткен облусунун 1974-жылы туулган тургуну Д.Д болуп чыкты. Ал мурдагы каржы полициясынын кызматкери жана мурда бир нече жолу соттолгон. Кармалган жаран  Жазык-процессуалдык кодексинин 96-беренесине ылайык, Бишкек шаарынын ички иштер башкы башкармалыгынын убактылуу кармоочу жайына киргизилди.
Учурда тергөө амалдары жүрүп жатат.

Сокулуктагы мечиттин ичинде кайрымдуулук үчүн чогултулган акчаны кутучасы менен кошо уурдап кеткен ууру кармалды

24-октябрда Сокулук РИИБке Н.Р. аттуу жаран арыз менен кайрылып, арызында саат танкы 05.50 убакытта белгисиз адам Сокулук айылынын Ошская көчөсүндө жайгашкан мечетке кирип, кайрымдуулукка акча чогултуучу кутучаны акчасы менен, видеобайкоо камерасынын мониторун жана кийимдер салынган сумканы уурдап кеткенин билдирип чара көрүүнү суранган. Бул тууралу Чүй ОИИББдин басма сөз кызматы билдирет.
Аталган факт Сокулук РИИБдин КБРне Кыргыз Республикасынын Кылмыш-жаза кодексинин 205-беренеси (уурулук) менен катталып, кылмыш иши козголгон.
Кылмыштын бети ачылбай келген.
25-октябрь күнү Сокулук РИИБнүн кызматкерлеринин жүргүзүлгөн ыкчам иликтөө иш-чараларынын жүрүшүндө кылмыш жасаган адам 1997 жылы туулган С.Е. аттуу жаран экендиги такталып, ал Кыргыз Республикасынын ЖПКнын 96-беренесинин негизинде кармалып, убактылуу кармоочу жайына киргизилген.
Учурда тергөө амалдары  жүргүзүлүүдө.

Меню