КРИМИНАЛДЫК ХРОНИКА ЖАНА ОКУЯЛАР

Токмок шаарындагы көчөдөн жаңы төрөлгөн ымыркай кыз табылды. Укук коргоо органдары маалымдагандай, ымыркай кызды 22-ноябрда Охотничья көчөсүнөн жергиликтүү жашоочулар табышкан. Дароо милиция кызматкерлери менен дарыгерлерге маалымат берилип, ымыркайдын абалы текшерилген. Анын салмагы 3 кг 400 грамм болгон. Учурда кыздын энесин аныктоо жана жүргөн жерин тактоо иштери жүрүп жатканы маалым болду. Акыркы беш-алты айдын ичинде эле Кыргызстанда ушуну менен ымыркайды төрөп таштап кеткен төрт факты катталды. Акылы айбандыкынан да аз мындай күкүк энелерди кармап, жазаны катуу бербесе болбой турат!

Булак: “Фабула”

Талас облусунун Манас районунда адам өлтүрүүгө шектүү жаран кармалды. Ал жаран мыйзам алдында жазаланбастыгына ишенип, кылмыш жасаган жеринде жашап келген. Бул туурасында ИИМдин Басма сөз кызматы билдирет.

2017-жылдын 17-ноябрь күнү Талас облусунун Манас РИИБде адамдын сөгүнүн калдыктары табылган факты катталган. Кечинде айылдардын биринин жанындагы окуя болгон жерге ыкчам-иликтөө тобу келишип, адамдын сөгүнүн калдыктарын табышкан. Айылдын четиндеги сарайдын айланасында курулуш иштери жүрүп жатканына байланыштуу трактордун айдоочусу жерди түстөп жатып, жерге көмүлгөн аялдын сөгүн тапкан. Маркум аялдын кийимдери жана шарфы сакталып калган. Жогорудагы факты боюнча Манас РИИБи белгисиз аялдын өздүгүн тактоого багытталган ыкчам-иликтөө иш-чараларын жүргүзүшкөн.

Маркумдун өздүгүн тактоо мүмкүн эмес болгон. Соттук-медициналык жана башка экспертизалар жүргүзүлүп, бул белгисиз аял киши колдуу болуп өлгөн деген тыянак чыккан. Баш сөөгүнө жана дененин башка бөлүктөрүнө оор жаракат келитирилген издер байкалган. Милиция кызматкерлери тарабынан адамдын өлүгү табылган аймактын ээси, жакын жайгашкан тургундар суралган. Бир нече күндөн кийин Манас РИИБнин кызматкерлери ыкчам-иликтөө мүнөздөгү иш-чаралардын жүрүшүндө шектүү катары мурда ушул аймактагы сарайларда малчы болуп алектенген Ош облусунун Кара-Кулжа районунун 1983-жылы туулган У.Б. аттуу жошоочусунун изине түшүп, оор кылмыш ишине тиешеси бардыгын аныкташкан.
Тергөө учурунда белгисиз аялдын өздүгү такталып, ал Жалал-Абад облусунун Ала-Бука районунун 1971-жылы туулган А.Элмира аттуу тургуну болуп чыккан. Бул кылмыш иши болжол менен 2016-жылдын январь айында жасалган. Маалымат боюнча маркум аял шектүүнүн жарандык жубайы болгон. Шектүүнүн сөзү боюнча ал мас абалында жарандык жубайын катуу сабаган жана аялынын башындагы жаратын моюн орогуч менен ороп коюп, өзүнүн ишине кетип калган. Ал эми жабыркаган аял алган жаракатынан, жарым саат өтпөй каза болгон. Топтолгон материалдардын негизинде Манас РИИБнин тергөө бөлүмү Кыргыз Республикасынын кылмыш-жаза кодексинин 97-беренесинин (адам өлтүрүү) негизинде кылмыш ишин козгошкон.

Шектүү адам жарандык жубайы менен 2015-жылдын күз айларынан баштап ушул сарайда мал багуучу катары иштешкен жана бул жумушту Ош базарындагы радиодон кулактандыруу катары берилип жаткан маалымат боюнча табышкан. Жубайлардын ортосунда чыр чыгып, шектүү жаран мас абалында аялын уруп-сабап, күрөк менен бир нече жолу чаап жиберген. Кылмыштын изин жашыруу максатында жансыз денени катып, жоготууну ойлоп, ошол эле сарайдын жанындагы жерди казып, көмүп салган. Сарайдын ээси аялың кайда деп сууросун узаткан учурда, ал Бишкек шаарына кеткендигин жана ар кандай башка жоопторду алгандыгын билдирген. Ушул учурга чейин маркум аялды туугандары издеп жүрушкөн, Чуй аймагында милиция тарабынан дайынсыз жоголгондордун катарына кирип, изделип жүргөн. Кылмыш жасаганына бир аз убакыт өткөндөн кийин, малчы Бишкек шаарына кетип калган. Жарым ай өтпөстөн, ал башка жаңы жаш жубайы менен келген. Шектүү жаран 1987-жылы туулган бул жарандык аялы менен жашай баштаган. Тегерегиндеги жашоочулар берген суроого ал жубайы Элмира мурдагы жолдошу менен жарашып, башка жакка кетти деп жооп берип койчу. Маалым болгондой, жаңы аялы менен малчы болуп бир аз иштешип, анан чет өлкөгө акча табыш үчүн кетип калышкан. Күзүндө экинчи аялы менен эки айрым жолго түшүшүп, мекенине жалгыз келген. 2016-жылдын декабрь айында кайра Манас районуна үчүнчү жарандык аялын алып келип, бир нече ай мал багышкан. Ушул жылдын жай айында сарайдын ээси малчысын алмаштырууну чечкен. Ал эми өлгөн аялдын туугандары жана тааныштары анын кайда экендигин билүү үчүн дагы эле издеп жүрүшкөн. Аларга шектүү адам Элмира башкага турмушка чыгып, Нарынга кетти деп жооп берип койгон. Соттун чечими менен кармалган жаран эки айга камака алынып, Манас РИИБи тарабынан тергөө амалдары жүрүп жатат.

Баткен облусунда каракчылык менен алектенген бир туугандар кармалды. Бул туурасында Баткен ОИИБнин Басма сөз кызматы билдирет.

2017-жылдын  22-ноябрына караган түнү болжол менен саат 02:00 чамасында Баткен районунун Боз-Адыр айылынын А.И. жана Н.К. аттуу жубайлар үйүндө уктап жаткан учурда бет капчан белгисиз эки адам үйүнө киришип, каракчылык кылуу максатында өзгөчө жыты бар газ балончиктери менен үй ээлеринин беттерине чачышкан. Жубайлар каршылык көрсөткөн учурда белгисиз адамдар күчтөрү  жетпегендигин билген соң, окуя болгон жерден качып чыгышкан.

Милиция кызматкерлери тарабынан окуя болгон жерге кароо жүргүзүү учурунда үйдүн ичинен «Nokia» үлгүсүндөгү уюлдук телефон, белгисиз үлгүдөгү кара түстөгү тапанча, бет кап, 3 даана газ чачуучу балончиктер, узундугу 1,5 метр болгон ак түстөгү аркан жип, кара түстөгү рюкзак, фонарик жана башка заттар далил буюм катарында алынган.

Баткен РИИБнин ыкчам-тергөө тобунун кызматкерлери тарабынан жүргүзүлгөн ыкчам-иликтөө иш-чараларынын негизинде кылмыштын изин суутпай, кылмышка шектүү адам «ВАЗ 2107» үлгүсүндөгү автоунаасы менен кармалган. Ал эми жанындагы шериктеши кийинчерээк кармалган. Шектүүлөрдүн өздүгү такталып, алар бир туугандар 1988-жылы туулган К.И. жана 1990-жылы туулган К.М. аттуу Ош облусунун Кара-Кулжа районунун тургундары экендиги аныкталган.

Бул факты боюнча Кыргыз Республикасынын кылмыш-жаза кодексинин 168-беренесинин (каракчылык) негизинде кылмыш иши козголуп, соттук-медициналык, соттук-баллистикалык, соттук-химиялык  экспертизалар дайындалган. Кармалган жарандар убактылуу кармоочу жайга киргизилген.

Тергөө учурунда кармалган жарандар башка дагы кылмыш иштерине тиешеси бардыгы аныкталган.

2017-жылдын 7-сентябрь күнү  ушул үйгө уурулар кирип, 40 миллион сум (Өзбек валютасы) акчасын уурдап кетишкен.

Жогорудагы факты боюнча Кыргыз Республикасынын кылмыш-жаза кодексинин 164-беренесинин (уурдоо) негизинде кылмыш иши козголгон. Бүгүнкү күндө жогоруда аталган бир туугандар бул кылмыш ишине дагы тиешеси бардыгы аныкталып, күнөөлөрүн толугу менен мойнуна алышкан. Азыркы учурда эки кылмыш иши боюнча тергөө амалдары жүрүп жатат

Милиция кызматкерлери тарабынан «Бандит» аталышындагы ыкчам-иликтөө рейдинин жүрүшүндө мыйзамсыз ок-дарыларды сактоо фактысы менен 46 жаштагы Нарын районунун жана 49 жаштагы Нарын шаарынын тургундары кармалган. Бул туурасында Нарын ОИИБнин Басма сөз кызматы билдирет.

2017-жылдын 21-ноябрь күнү болжол менен саат 14:00 чамасында ыкчам маалыматтын негизинде Нарын ОИИБнин кызматкерлери Нарын районунун Алыш айылынан “Ауди-100” үлгүсүндөгү автоунаасын токтотушуп, автоунаада жүргүнчү катары бара жаткан Нарын районунун Таш-Башат айылынын 46 жаштагы К.Р. аттуу жашоочусун текшерүү учурунда жанынан 1 кутучага салынган 50 даана 5,6-калибирдеги сайлуу ок атуучу куралдын окторун табышкан.

Бул факты боюнча Кыргыз Республикасынын кылмыш-жаза кодексинин 241-беренесинин 1-бөлүмүнүн (Ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү) негизинде кылмыш иши козголгон.

Тергөөнүн жүрүшүндө Нарын районунун Таш-Башат айылынын 46 жаштагы К. Р. аттуу тургуну 50 даана 5,6-калибирдеги сайлуу ок атуучу куралдын окторун 2017-жылдын 21-ноябрь күнү Нарын шаарынын 49 жаштагы Т. С. аттуу жашоочусунан 1000 сомго сатып алгандыгын билдирген.

Жогорудагы кылмышты аныктоо максатында Т.С. жана К.Р. аттуу жарандардын турак-жайлары текшерилип, натыйжасында Т.С. аттуу жарандын үйүнүн уктоочу бөлмөсүнөн 6 кутучага (ар биринде 50 даана) салынган 300 ок, ал эми К. Р. аттуу жарандын кампасынан 27 даана 5,45-калибирдеги окторун табышкан. Алынган октор экспертизага жөнөтүлгөн.

Жогорудагы кылмышка шектүү катары К.Р. аттуу Нарын районунун тургуну абактылуу кармоочу жайга камалган. Нарын ОИИБнин тергөө кызматы тарабынан Нарын шаарынын Т.С. аттуу тургунунун кыймыл-аракетине юридикалык жактан баа берүү үчүн кылмыш ишинен материал бөлүнүп алынып, Кыргыз Республикасынын кылмыш-жаза кодексинин 241-беренесинин 1-бөлүмүнүн (Ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү) негизинде кылмыш иши козголуп, тергөө иштери жүрүүдө.

Кошмо Штаттар биринчи жолу Мьянма армиясын рохинджа-мусулмандарын “этникалык тазалоого” ачык айыптады. Ракхайндагы аскердик репрессия учурунда 600 000ден ашуун киши үйлөрүнөн куулган, деп жазды Le Monde. Басылма БУУ 11-сентябрда Мьянма бийлигин “этникалык тазалоого” айыптаганын, бирок Вашингтон бул терминди колдонуудан баш тартып келгенин баса белгиледи.

«Бул ырайымсыздык үчүн жооптуулар жазаланышы керек», деди АКШнын мамлекеттик катчысы Рекс Тиллерсон. Бул тууралуу ал Мьянма куралдуу күчтөрүнүн башкы кол башчысы, ага генерал Мин Аун Хлайн жана формалдуу эмес жарандык администрациянын башчысы Аун Сан Су Чжи менен жолугушуу учурунда билдирди.

«Фактларды терең иликтеп чыккандан кийин Ракхайндын түндүк процинциясында рохинджаларга карата этникалык тазалоо болгону ачыкталды жана эч нерсе бул үрөйдү учурган жырткычтыкты актай албайт», деген Рекс Тиллерсон

Булак: “Борбор Азия жаңылыктар кызматы”