КРИМИНАЛДЫК ХРОНИКА ЖАНА ОКУЯЛАР

Ушул жылдын 16-22-ноябрь күндөрү өткөн “Арсенал” аталышындагы ыкчам-алдын алуу жана ыкчам-издөө рейди жыйынтыкталып, жарандардан 9 бирдик ок атуучу курал алынды. Бул туурасында Баткен ОИИБнин Басма сөз кызматы билдирет.

Курал-жарактарды сактоо боюнча милдетти талаптагыдай аткарбагандыгы жана кайра каттоодон өткөрбөгөндүгү үчүн жарандардан 7 курал алынып, ок атуучу куралдарды мыйсамсыз сактоо фактысы боюнча 2 кылмыш иши козголду.

Милиция кызматкерлери тарабынан ок атуучу куралдарды сактоо жайлары менен колдонууга уруксат алган жарандар текшерүүдөн өтүлдү.

Бул иш-чаранын жүрүшүндө 56 мергенчи, 623 автомототранспорт каражаттары жана 11 соода-түйүндөрү менен базарлар, 11 мейманкана текшерилди.

Эгерде жарандар ок атуучу куралды таап алган болсо же мыйзамсыз сактап жүрсө тезинен милиция кызматкерлерине тапшыруу керек.

Ал эми катталбаган курал-жарактарды, окторду, жарылуучу заттарды өз ыктыяры менен тапшыргандар кылмыш ишине тиешеси жок болсо, анда кылмыш жоопкерчилигинен бошотулаарын эскертип кетебиз.

15-ноябрь күнү милиция кызматкерлери тарабынан Чаткал районунда мыйзамсыз ок атуучу куралдарды аныктоого багытталган рейд жүргүзүлгөн. Бул туурасында Жалал-Абад ОИИБнин Басма сөз кызматы билдирет.

Натыйжада Чаткал районунун 37 жаштагы К.Ш. аттуу тургуну “ИЖ-16” үлгүсүндөгү 16-калибрдеги ок атуучу куралын тиешелүү документи жок алып жургөн жеринен кармалган. Териштирүү учурунда Чаткал районунун К.Ш. аттуу тургуну чоң атасынан калган ок атуучу курал экендиги жана документи жоктугун билбегендигин билдирген. Тиешелүү органдар тарабынан К.Ш. аттуу тургунга административдик айып пул салынган. Алынган ок атуучу курал экспертизага жөнөтүлүп, иликтөө иштери жүрүп жатат.

“Кол салуу болгон күнү инимдин капчыгында 400 эле сому бар экен, эгер ал байлыгы үчүн кооптонсо эч болбогондо үйүнө дарбаза тургузуп алмак”, – деди бүгүн Жогорку Кеңештин депутаты Аида Салянова инисинин өлүмүнө байланыштуу маселе парламентте каралып жатканда.

Кечээ бул маселе “Ата Мекен” фракциясында талкууланып, бүгүн жалпы жыйында милициянын маалыматы угулду.

Ички иштер министринин орун басары Данияр Абдыкаров кол салгандар Улан Саляновдон акча талап кылганын, ошондуктан тергөөдө “каракчылык” деген версия каралып жатканын айтты.

Аида Салянова өз сөзүндө кол салуу атайын даярдалган деген оюн билдирди:

– Кылмыштан бир нече саат өтө электе “саясий себеп жок” деп ИИМ билдирди. Бирок бул учурда ИИМдин колунда эч кандай далил жок болчу. Райондук тергөөчү ушундай бидирүү жасамак беле? Демек, тергөөнү кимдир бирөө башкарып, кантип сүйлөш керек экенин көзөмөлдөп жатат. Мага карата соңку жылдардагы маниакалдык саясий куугунтукту эске албаганда да жеке мен козгогон ондогон кылмыш иштер, жоопко тартылгандар бар эмеспи. Эч болбогондо “тергөө толук жана объективдүү жүрүп жатат” деген түр көрсөтүш үчүн да саясий себепти кошуп айтышса болмок. Бул кылмыш тобу дал ушул иш үчүн атайын даярдалган. Ал күнү инимдин капчыгында 400 сом гана болгон. Көп акчасы болсо ал терезелерине темир тагып, видеокөзөмөл орнотуп, эч болбогондо дарбаза тургузуп коймок. Бул кылмышка ким буйрук берди? Мени мыйзамды бузганым эмес, бузбаганым үчүн соттошту. Бул жерде саясий себеп жок деп ким кепилдик бере алат?

Салянованын бир тууган иниси Улан Саляновду 6-ноябрда ​белгисиз бирөөлөр Бишкектин четинде жайгашкан Көк-Жар конушундагы жаңы салынган үйүнөкурал менен кирип, атып кетишкен.

Кандуу окуяга байланыштуу Кылмыш кодексинин “Адам өлтүрүү” беренесинин негизинде иш козголгон.

Оппозициялык саясатчы Саляновага 2010-жылы юстиция министринин милдетин аткарып турганда “мурдагы президенттин уулу Максим Бакиевдин өнөктөшү Алексей Елисеевдин адвокаттык лицензиясын мыйзамсыз узарткан жана бул ишти жетиштүү иликтеген эмес” деген айып тагылган. Салянова өзүнө тагылган айыптарды четке кагып келет.

Булак: “Азаттык”

Милицияга Бишкек шаарынын жашоочусу арыз менен кайрылып, ушул жылдын 12-сентябрь күнү арыздануучунун автоунаасынын терезесин сындырышып, ичинен акча каражатын жана жеке буюмдарын уурдап кеткен белгисиз адамдарга карата тиешелүү чараларды көрүп берүүлөрүн суранган. Жабырлануучуга ири суммада материалдык чыгым келтирилген. Бул туурасында Бишкек ШИИББнин Басма сөз кызматы билдирет.

Ленин райондук ички иштер башкармалыгынын кызматкерлери тарабынан көрүлгөн ыкчам-иликтөө иш-чараларынын натыйжасында кылмыш ишине шектүү катары 27 жаштагы М.Р. аттуу жергиликтүү тургун кармалган.

Жогорудагы факты боюнча Кыргыз Республикасынын кылмыш-жаза кодексинин164-беренесинин (уурдоо) негизинде кылмыш иши козголгон.

Кармалган адам Бишкек шаарындагы №1 тергөө абагына камалып, иликтөө иштери жүрүп жатат.

Аксы жана Сузак райондорунда жүргүзүлгөн “Авто-розыск” рейди учурунда белгисиз адамдар талаада жүргөн 1 баш бодо мал жана 3 баш койду уурдап, мал базарга алып келип сатып жиберишкени маалым болгон. Натыйжада Сузак, Аксы районунун тургундары жалпысынан 50 миң сомдук материалдык зыянга учурган. Бул туурасында Жалал-Абад ОИИБнин Басма сөз кызматы билдирет.

Жалал-Абад ОИИБнин кызматкерлери тарабынан ыкчам-иликтөө иш-чаралары уюштурулуп, кылмыштын изин суутпай жогорудагы кылмыш ишине шектүү катары Аксы районунун 23, 27 жаштагы тургундары, ошондой эле Сузак районунун 50 жаштагы жашоочусу (аял киши) кармалган. Жогорудагы факты боюнча Кыргыз Республикасынын кылмыш-жаза кодексинин 165-беренеси (мал уурдоо) менен кылмыш иши козголуп, тергөө амалдары жүрүп жатат. Ал эми шектүүлөр райондук соту тарабынан үй камагына чыгарылды.