КРИМИНАЛДЫК ХРОНИКА ЖАНА ОКУЯЛАР

2017-жылдын 26-октябрь күнү болжол менен саат 14:15 чамасында Жайыл районунун ички иштер бөлүмүнүн милициянын аймактык ыйгарымдуу өкүлү өзү тейлеген аймакта текшерүү иштерин жүргүзүү учурунда, жергиликтүү тургундардан Алтын айылындагы үйлөрдүн биринин короосунда белгисиз аялдын сөөгү көмүлгөнү тууралуу маалымат алган. Бул туурасында Чүй ОИИББнин Басма сөз кызматы билдиретю

Аймактык тескөөчү аталган маалымат боюнча көрсөтүлгөн үйдүн короосунун ичинде шектүү жерди казып, болжол менен 30-35 жаштагы белгисиз аял кишинин жансыз денесин тапкан.

Жогорудагы факты боюнча Жайыл РИИБнин нөөмөт бөлүмүнө билдирген. Аталган дарекке Жайыл районунун ыкчам-тергөө тобу чыгып, териштирүү иштерди жүргүзүшкөн. Ыкчам-издөө иш-аракеттердин натыйжасында бул кылмышка шектүү катары 36 жаштагы Ш.К. аттуу үйдүн ээсинин жээни кармалып, күнөөсүн толугу менен мойнуна алып, төмөндөгүдөй көрсөтмө берген.

2017-жылдын 19-октябрь күнү кызганычтан улам экөө уруша кетишип, Ш.К. катуу нерсе менен аялын баш тарапка чаап жиберген. Алган жаракатынан улам жарандык никедеги аялы окуя болгон жерден көз жумган. Ошол замат кылмышты жаап-жашыруу максатында жансыз денени ошол үйдүн короосуна көөмүп салгандыгын билдирген. Тергөө учурунда каза болгон аял Талас облусунун А.Ч. аттуу тургуну экендиги аныкталган.

Бул окуя боюнча Жайыл РИИБнин тергөө кызматы тарабынан Кыргыз Республикасынын кылмыш-жаза кодексинин 97-беренеси (Адам өлтүрүү) менен кылмыш иши козголгон. Кармалган жаран Жайыл районунун ИИБнин убактылуу кармоочу жайына камакка алынган. Учурда тергөө иштери жүрүүдө.

Кыргыз Республикасынын ИИМдин кызматкерлери алдамчылыкка шектүү Африка өлкөсүнүн эки жаранын кармашты. Бул туурасында ИИМдин Басма сөз кызматы билдирет.

Маалымат боюнча, кармалган жарандар жарандарга кагаздан жасалма доллар акча каражатын жасап берүү боюнча өздөрүнүн кызматын сунушташкан. Ошондой эле, Африка Республикасынын тургундары биздин өлкөгө келгенден кийин, жабырлануучулардан ири суммадагы акча каражатын алышып, аны эки эсе көбөйтүп беребиз деп убада берип, алдап жүрүшкөн. Алар жөнөкөй кара кагазды кантип акчага айлантышаарын дагы көргөзүп беришкен. Кылмышкерлер ишенчээк адамдарды өз туткунуна илүү үчүн издеп жүрүшкөн.

Жакында ИИМге чет өлкөлүктөр Бишкек шаарынын жашоочусун өздөрү жашаган батирге чакырышып, жөнөкөй кагаздан кантип акча жасаларын көрсөтүшкөндүгү тууралуу ыкчам маалымат келип түшкөн. Кылмышка шектүүлөр жаранды ири суммадагы акча каражатын алып келсең, аны биз эки эсе көбөйтүп беребиз деп убада беришкен.

ИИМдин кызматкерлери жогорудагы кылмышка шектүү чет өлкөлүктөрдүн өздүгүн тактоо максатында ыкчам-иликтөө иш-чараларын жүргүзүү учурунда алар өздөрүнө тиешелүү жасалма доллар акча каражаттарын жасоо үчүн жарандан жалпы суммасы 20 миң евро акча талап кылышканын аныкташкан. ИИМдин кызматкерлери тарабынан көрүлгөн иликтөө иш-чараларынын негизинде Бишкек шаарынын Калык Акиев көчөсүнөн Камеруна мамлекетинин 1964-жылы туулган Б.Ж. жана Гвинея өлкөсүнүн 1967-жылы туулган Н.Н. аттуу жарандары кармалган. Кармалган жарандар алдамчылык иш-аракеттерине шектелүүдө.

Жогоруда көрсөтүлгөн жарандардын убактылуу жашоочу батирин текшерүү учурунда ар кандай аспаптар (медициналык бет кап, конверттер, кара майда, тунук суюктук) табылып алынган. Жогорудагы факты боюнча кылмыш иши козголуп, чогултулган материалдар Бишкек шаарынын Ленин райондук ички иштер башкармалыгына катталды. Кармалган чет өлкөлүк жарандар Бишкек ШИИББнин убактылуу кармоочу жайына киргизилип, тергөө амалдары жүрүп жатат.

Ленин райондук ички иштер башкармалыгына Бишкек шаарынын жашоочусу арыз менен кайрылып, 2016-жылдын ноябрь айында “Дилим” аттуу бейтаанышы (аял киши) соода-борборлордун биринин ичинен алдоо жолу менен арыздануучунун ишенимине кирип, жалпы суммасы 544 000 сомдук товарын алып, 2017-жылдын февраль айында жогорудагы көрсөтүлгөн акча каражатын кайрып берем деп, ушул күнгө чейин жашырынып качып жүргөн. Бул туурасында Бишкек ШИИББнин Басма сөз кызматы билдирет.

Жогорудагы факты боюнча Кыргыз Республикасынын кылмыш-жаза кодексинин 166-беренесинин (алдамчылык) негизинде кылмыш иши козголгон.

Милиция кызматкерлери тарабынан жүргүзүлгөн ыкчам-иликтөө иш-чараларынын натыйжасында, 30 жаштагы борбор шаарыбыздын Э.Д. аттуу тургуну кармалган. Кармалган жаран Бишкек шаарындагы №1 тергөө абагына киргизилген. Ошондой эле тергөө учурунда шектүү башка дагы кылмыш иштерине тиешеси бар экендигин аныкташкан.

Учурда иликтөө иштери жүрүп жатат.

2017-жылдын 25-октябрь күнү болжол менен саат 18:15 чамасында Нарын ШИИБнин нөөмөт бөлүмүнүн куралдарды тапшыруучу бөлмөсүнөн Нарын шаары боюнча Кыргыз Республикасынын ИИМдин МАККББнын кызматкери, милициянын ага сержанты 1991-жылы туулган М.Н. аттуу “Макаров” үлгүсүндөгү тапанчасын тапшырып жатып, ок атуучу куралды этиятсыздык менен колдонуп, Нарын шаары боюнча Кыргыз Республикасынын ИИМдин МАККББнын кызматкери, милициянын старшинасы Ж.А. аттуу кесиптешин атып алган. Бул туурасында Нарын ОИИБнин Басма сөз кызматы билдирет.

Маалымтка ылайык, милиционер тапанчаны карап жаткан учурда атылып кеткен. Атылган ок кесиптешинин төшүнө тийип, жабырлануучу алган жаракатынан окуя болгон жерден каза болгон. Нарын шаары боюнча МАККББнын эки кызматкери кызмат мөөнөтүнөн кийин, тапанчасын тапшыруу үчүн куралдарды тапшыруу бөлмөсүнө алып келишкен.

Жогорудагы факты боюнча Кыргыз Республикасынын кылмыш-жаза кодексинин 316-беренесинин (Шалаакылык, этиятсыздыктын айынан адам өлүмүнө алып келүү) негизинде кылмыш иши козголду.

Милициянын ага сержанты М.Н. аттуу Кыргыз Республикасынын кылмыш-процессуалдык кодекстин 94-беренесине ылайык убактылуу кармоочу жайга киргизилди.

Толук жана ар тараптуу иликтөөнү Нарын шаары боюнча Кыргыз Республикасынын МУККБгы жүргүзүп жатат. Тергөө амалдары жүрүүдө.

“Окуя болгон жерге Ички иштер министринин орун басары Алмаз Орозалиев Кыргыз Республикасынын ИИМдин Ички иликтөө кызматынын кызматкерлери менен биргеликте табелдик куралды этиятсыздык менен колдонгондугунун айынан МАККББнын кызматкери каза болгон фактыны ар тараптуу жана калыс иликтөө үчүн келишкен. Кызматтык иликтөөнүн жүрүшүндө өздөрүнүн кызматкерлерин кызматтык даярдоо жүргүзбөгөндүктөрү үчүн жетекчилеринин иш-аракеттерине дагы тиешелүү баа берилип, дисциплинардык мүнөздөгү катуу чаралар көрүлөт”, – деп жазылат маалыматта.

2017-жылдын 26-октябрь күнү Бишкек шаарында кылмышкердин колунан Биринчи май РИИБнин криминалдык милиция кызматынын ыкчам өкүлү, милициянын лейтенанты 25 жаштагы Майрамбеков Уларбек Уланбекович каза болду. Бул туурасында Бишкек ШИИББнин Басма сөз кызматы билдирет.

Кырсык болоор күндөн мурда Майрамбеков Уларбек жумушу аяктагандан кийин өзүнүн өндүрүш материалдарын жана табелдик куралын тапшырып, андан кийин, үйлөнүп жатканына байланыштуу эмгек өргүүсүнө чыгууга билдирме жазган. Жумушунан чыккандан кийин, Уларбек өзүнүн кесиптешин Бишкек шаарынын көчөлөрүнүн бирине жеткирип коюну суранган жана жеткирген жеринде калган.

Кийинчерээк, кызматкер бычактан алган жаракатынан каза болгону маалым болгон. Жогорудагы факты боюнча Кыргыз Республикасынын кылмыш-жаза кодексинин 97-беренесинин (адам өлтүрүү) негизинде кылмыш иши козголду. Тиешелүү экспертизалар дайындалып, тергөө амалдары жүрүүдө.

Кыргыз Республикасынын ИИМдин, Бишкек ШИИББдин, Биринчи май РИИБдин жетекчилиги жана ардагерлери, ички иштер органдарынын өздүк курамы Майрамбеков Уларбек Уланбековичтин каргашалуу каза болгонуна байланыштуу аза күтөт. Каза болгон кызматкердин жакындарына жана туугандарына терең кайгыруу менен көңүл айтат. Биз жоготуу кайгысын бирге бөлүшөбүз. Кесиптештеринин арасында жоопкерчиликтүү, чынчыл, мыкты кызматкер катары эстеринде калат. Бул биз үчүн чоң жоготуу болду. Биз үй-бүлөөсү менен бирге кайгырып, азасын тең бөлүшөбүз. Майрамбеков Уларбек Уланбековичтин жаркын элеси биздин жүрөгүбүздө түбөлүк кала берет!

Биринчи май РИИБнин криминалдык милиция кызматынын ыкчам өкүлү, милициянын лейтенанты Майрамбеков Уларбек Уланбекович Жалал-Абад облусунун Ноокен районуна караштуу Масы айылында 1992-жылы туулган. 2014-жылы Россиянын ИИМдин Академиясын аяктаган. 2014-жылдан баштап ички иштер органдарында милициянын аймактык тескөөчүсү катары кызматын өтөп баштаган. Милициянын кызматкерин акыркы сапарга узатуу иш-чарасы 27-октябрь күнү Жалал-Абад облусунун Масы айылында өтөт.